1 Samuel 12:3 - Kashibo-Kakataibo Biblia

³ ënu kana bërí mitsubë ꞌain: Usa ꞌain kamina uisai karana ꞌia ꞌë kakanti ꞌain, bëtsin ꞌarakakë vaca ꞌanan karana aín burro ꞌënamabi mëkamaxun ꞌibuanan, karana ami kuaikin ꞌën kuëënkësa okin an a unikaman ka bëríbi Nukën ꞌIbun ismainun kanan anbia kaískë mitsun ꞌapu ënën kuamainunbi ꞌë kati ꞌikën, bërí kana ui karana ribini a kupíoti ꞌain.

1 Samuel 12:3 ပူးပေါင်းရင်းမြစ်များ

2 Samuel 22:22

ꞌën kana añu ꞌanun kara ꞌë kaia ashi ꞌaxunkin aín bana kuakëmasa ꞌixun ñu ꞌatima ꞌakin aín bana kikësama okin ꞌaxunkinma kana ¡uínsaranbi ꞌën Diosan bana ënkëma ꞌain!

Salmos 15:5

ꞌianan aín kuríki bëtsi uni ꞌinánkin na ꞌinánkë a inumikian ꞌinánun kixun ubíokëma; ꞌimainun bëtsi uni ñu ꞌatima ꞌakëmabi bëtsi ꞌatima onun kixun kupíokëxunbi, usokin ñu ꞌati kuëënkinma ꞌakëma. Uni ax ka uisa ñubi ꞌinutima upitax tsóti ꞌikën.

Éxodo 20:17

Bëtsi unin xubu ꞌimainun anu ꞌikë aín ñukama kamina minan ꞌinun bisatantima ꞌain: usa ꞌixun kamina aín xanu an ñu mëëxunkë uni ꞌimainun an ñu ꞌaxunkë xanu aribi kuëëntima ꞌain, ꞌimainun kamina an ꞌarakakë ñuinakama, vaca ain asno akamaribi bisatantima ꞌain.

Mateo 22:21

Cacëxun ca atun cacëxa: —Ax ca Césarnën bëmánan tanquian ꞌacë ꞌimainun Césarnën anë ꞌicën. Usaquin cacëxun ca Jesusan cacëxa: —Ami mitsun ꞌatia César cuëëncë a ñu camina ꞌati ꞌain, axa mitsun ꞌapu ꞌain. ꞌAnan camina ami mitsun ꞌatia Nucën Papa Dios cuëëncë a ñu ꞌati ꞌain, axa mitsun Papa Dios ꞌain.

Lucas 19:8

Usa ꞌain ca manámi chairuquin Zaqueonën Jesús cacëxa: —ꞌËn cana mi cain, bërí cana ꞌën curíquicama mësú usaribi ꞌënan ꞌinun bianan usaribi ñuñuma unicama ꞌinani cuanin. ꞌInánan cana ꞌën aín curíqui mëcama uni, ꞌën ainan mëcama inumiquin rabë́ ꞌimainun rabë́ oquin ꞌinánti ꞌain.

Hechos 20:33

ꞌËn cana curíqui ñucánan chupa uibi ñucácëma ꞌain.

2 Corintios 12:14

Rabëti cana mitsu isi cuan. Amiribishi mitsu istëcëni cuanti cana sinanin. ꞌËn ꞌacësabi oquin cana curíqui ꞌinánanmi ꞌë ñu ꞌináncanun mitsu ñucátima ꞌain. Mitsun ꞌë ñu ꞌinánquinmabimi mitsun ꞌë nuibati ashi cana cuëënin. Aín bëchicënën ca uni curíqui timëxuntima ꞌicën. Aín papan cuni ca aín bëchicë curíqui timëxunti ꞌicën. Usa ꞌain cana ꞌëx mitsun papasa ꞌixun mitsun curíqui bitima ꞌain.

1 Tesalonicenses 2:10

Mitsun camina ꞌunanin, Nucën Papa Diosanribi ca ꞌunania, nux cananuna mitsúxmi Jesucristomi catamëcë ꞌain mitsubë ꞌixun uisa ñu ꞌatimabi ꞌaima upí ꞌia quixun. Usai ꞌia ca uinu ꞌicë unínbi nu ꞌuchocëma ꞌicën.

1 Tesalonicenses 2:5

Mitsúnbi camina ꞌunanin, uisa ꞌaíshbi cananuna mitsúnmi nux cuëëncësa oquin nu ñu ꞌaxúnun quixun sinani cëmëi banacëma ꞌain. Mitsun curíqui binuxun cananuna mitsu paráncëma ꞌain. Nucën Papa Diosanbi ca usai ꞌia nu isaxa.

1 Pedro 5:2

Atun cushicama ꞌixun camina Nucën Papa Diosan unicama bana ñuixunquin, atúxa upí nuituñu ꞌaish chuámarua bucunun ꞌaquinti ꞌain. An carnero bërúancë unin aín carnero ꞌacësaribi oquin camina a unicama upía ꞌinun bërúanti ꞌain. Usoquinmi ꞌanúan mitsu unin caíscë cupíshima camina asérabi ꞌaisa tanquin ꞌati ꞌain. ꞌAnan camina curíqui biti sinánxuinshima minbi asérabi ꞌaquinsa tanquin ꞌati ꞌain.

1 Samuel 10:1

Usa ꞌain ka Samuelnën ñunu ꞌarukë a xëni bikin anun ꞌikúkin aín maxkánu tutukakin Saúl kakëxa: —Nukën ꞌIbu ka mixmi bërí Israelkaman ꞌapu ꞌinun ꞌimiti ꞌikë kixun ka kakëxa. Mix atun ꞌapu ꞌixun kamina a ꞌurama ꞌikë ami nishkë uni kamabë ꞌakananun ꞌimitima ꞌain. ꞌImainun ka aín unikaman ꞌapu ꞌimikëx kaina uisai ꞌi tantia Diosan mi ꞌimikë ꞌikën.

1 Samuel 12:4

Ësokian kakëxunbi ka timë́kë unikaman kakëxa: —Uínsaranbi kamina nun ñu mëkamanan nu paránan usokinbi ꞌakin këmënuxun nun kuríki bianan uisokinbi nu ꞌakëma ꞌain.

1 Samuel 12:5

Usai kia ka Samuelnën atu kakëxa —Nukën ꞌIbu ꞌimainun anbia kaískë mitsun ꞌapu an ka mitsux mi kikë bana ꞌunánxa, usa ꞌain kamina ꞌatimai banakin ꞌë ꞌucha okankëma ꞌain —kixun ka Samuelnën unikama kakëxa. —Asérabi ka usa ꞌikë —kixun atúnribi kakëxa.

1 Samuel 2:35

Usai ꞌikëbëtan kana ꞌënbi achúshi sacerdote min aintsima bëtsi uni ꞌën kakësabiokin ꞌaisa uni bariti ꞌain, an ka ꞌën kakësabiokin ꞌati ꞌikën, ꞌianan kana a asaribi okin aín rëbúnkikamanribi ax kikësa okían ꞌën ꞌimia ꞌapu ñu mëëxunun ꞌimiti ꞌain.

1 Samuel 24:11

“Min ka upíokin is ꞌën ꞌapu añu karana tuian kixun kakëxa: Ënëx ka min pañukë tari aín kuëbí tukakin ꞌën bikë ꞌikën, ësokin ꞌakin kana mi ꞌakë ꞌitsían. Usa ꞌain kamina ꞌunánti ꞌain ꞌën kana mi uisabi oisamatan kixun, ꞌianan kana këmëxun mi ꞌati kuëënkëma ꞌain. ꞌAínbi kamina mix ꞌapu ꞌixunbi ꞌakatsi kixun ꞌë barin.

1 Samuel 24:6

aín suntárukama munura baxëxokin kakëxa: ¡Nukën ꞌIbun ka ax ꞌapu ꞌikë uisabi oxuma ꞌanun ꞌë ꞌamitima ꞌikën! ¡Ax ka asérabi ꞌapu ꞌikën! ¡Usaia ꞌikë ax ka Nukën ꞌIbun usai ꞌiti kaisa ꞌikën!

1 Samuel 24:7

Ësokin kakin ka Davidnën aín suntárukama kananuna uisabi otima ꞌai kixun sinánmikin Saúl uisabi omiama ꞌikën, usakin uisabi okëxma ka anua atsínkë bashi kini anuax chikíkiani kuankëxa.