1 Samuel 10:1 - Kashibo-Kakataibo Biblia

¹ Usa ꞌain ka Samuelnën ñunu ꞌarukë a xëni bikin anun ꞌikúkin aín maxkánu tutukakin Saúl kakëxa: —Nukën ꞌIbu ka mixmi bërí Israelkaman ꞌapu ꞌinun ꞌimiti ꞌikë kixun ka kakëxa. Mix atun ꞌapu ꞌixun kamina a ꞌurama ꞌikë ami nishkë uni kamabë ꞌakananun ꞌimitima ꞌain. ꞌImainun ka aín unikaman ꞌapu ꞌimikëx kaina uisai ꞌi tantia Diosan mi ꞌimikë ꞌikën.

1 Samuel 10:1 ပူးပေါင်းရင်းမြစ်များ

2 Samuel 1:14

¿Kakëxun ka uisa kupí kaina ꞌatimokin ꞌakin Diosan ain unikaman ꞌapu ꞌinun kaískë uni a ꞌan? —kakin ka munuma banakin Davidtan,

2 Samuel 19:39

Usakin kamainun ka kamabi unikama Jordán kakë baka sikarakëakëxa. Sikákëbëtan ka ꞌapun Barzilai kana kuantëkëni kixun kakin achúshi okin bëtsuku kakëxa. Usokin ꞌaxun kuantanun ëbiani ka Barzilai anuaxa ukë ꞌain xubunubi kuantëkëankëxa.

2 Samuel 5:2

Bërámabi ka Saúlnën ax ꞌapu ꞌixun minmi asérabi Israel kama ꞌakanani kuania buánun ꞌamiakëxa. Usa ꞌikë ka Nukën Ibun mi Israel kaman ꞌapu ꞌixunmi upiokin ꞌakinun ꞌimiaxa.”

1 Reyes 1:34

usa ꞌain kamina min sacerdote Sadoc ꞌimainun an Dios kikë bana uni ñuixunkë Natán abëtan aín maxkánu xëni tutukakin axa Israelkaman ꞌapu ꞌinun anëti ꞌain, usakin ꞌaxun kamina raíri unikaman carnero manchan banomainun ka raírinëxribi munuma kuënkëni sharati kikanti ꞌikën: ¡Salomón mix kamina ꞌitsa baritia ꞌimi nun ꞌapu ꞌiti ꞌain ësaiki ka munuma sharati kikanti ꞌikën!

1 Reyes 19:18

ꞌAínbi kana ꞌën siete mil Israel uni an Baal rabi ami rantinpuruni ꞌikin bëtsukukakëma a uisabi okinma ënti ꞌain.”

Salmos 2:12

usa ꞌain kamina Dios ax nishkima mitsu, ꞌaisama okin tëmëramia usa ꞌain rabikanti ꞌain. ¡Diosan ka axa ami katamëkë unikama chuámarua tania ami sinani kuëënun ꞌimia ësai ka Diosan kaískë unikama kiakëxa!

Hechos 13:21

Usaía ꞌicëbëa Samuel anu ꞌain ca Israel unicamax ꞌapuñu ꞌiisa tancëxa. Usa ꞌain ca Nucën Papa Diosan Benjaminën rëbúnqui, Cis cacë unin bëchicë, Saúl, a cuarenta baritia ꞌapu ꞌimiacëxa.

Deuteronomio 32:9

usakin ka Nukën ꞌIbu Jacobnën rëbúnkikama, aín uni ꞌiti kaisakëxa.

1 Tesalonicenses 5:26

Jesucristo cupí mitsun nuitu upí ꞌixun camina axa Jesucristomi catamëcë unicama bërúanxa ꞌinun cati ꞌain.

Hebreos 2:10

Nucën Papa Diosan ca camabi ñu ainan ꞌinun uniocëxa. Usoquin ꞌá ꞌaish ca, an aín bana cuacë aín bëchicëcamaxa aín nëtënu abë ꞌiti cuëënia. Usa ꞌixun ca axa uni ꞌaish tëmëranan paë tani bamacë cupíshi Nucën Papa Diosan ainan ꞌinun uni ië́minun Jesucristo ꞌimiacëxa.

Apocalipsis 5:8

Bicëbë ca ꞌitsa bëruñu rabë́ ꞌimainun rabë́ ñu, axribia bamatimoi tsócë, acama ꞌimainun mëcën rabë́ ꞌimainun taë rabë́ ꞌimainun rabë́ ꞌimainun rabë́ caniacëcë unicamaribi, Carnero ꞌicësaribitia unin ꞌucha cupí bama ami bësucë ꞌaish a rabi rantin purúanxa. A caniacëcë unicaman ca arpa cacë ñu a ꞌai cuëëni cantati, a ꞌimainun curi ꞌacë manë xanpa anua sanutanun nëënti tsëpasa ñu ꞌicë, acama tuíanxa. A xanpanuax cuin tëxë́quianxa ꞌirucë, ax ca aín unicaman Nucën Papa Dios rabianan ñucácë banacama a ꞌiaxa.

1 Samuel 12:3

ënu kana bërí mitsubë ꞌain: Usa ꞌain kamina uisai karana ꞌia ꞌë kakanti ꞌain, bëtsin ꞌarakakë vaca ꞌanan karana aín burro ꞌënamabi mëkamaxun ꞌibuanan, karana ami kuaikin ꞌën kuëënkësa okin an a unikaman ka bëríbi Nukën ꞌIbun ismainun kanan anbia kaískë mitsun ꞌapu ënën kuamainunbi ꞌë kati ꞌikën, bërí kana ui karana ribini a kupíoti ꞌain.

1 Samuel 13:14

Usa ꞌaínbi ka mi ꞌimainun min rëbúnkikama uínsaranbi ꞌapu ꞌinuxuma ꞌaia. Usa ꞌain ka Nukën ꞌIbun achúshi uni an kuëënkësabi okin an ꞌati barixun aín unikama ꞌapu ꞌinun ꞌimiti ꞌikën, min kamina an kakësokin ain bana kuaisama tan.

1 Samuel 15:1

Achúshi nëtën ka Samuelnën Saúl kakëxa: —Nukën ꞌIbun ka ꞌën mi utankëxun anbia kaisa Israel kaman aín ꞌapu ꞌinun, mi anënun kixun ꞌë kaxa. Usa ꞌain kamina, ësokin mi kanun kikë bana kamainun kuati ꞌain.

1 Samuel 15:17

Usa ꞌain ka Samuelnën kakëxa: —Minbi kamina ꞌapu ꞌisama ꞌixun ꞌëx kana añubi ꞌisama ꞌai kixun sinánkën, ꞌaínbi kamina bërí israel unibunën ꞌapu ꞌain, usaími ꞌinun ka Nukën ꞌIbun mi ꞌimiaxa.

1 Samuel 16:1

Achúshi nëtën ka Nukën ꞌIbun Samuel kakëxa: —¿Uínsaran kaina Saúl sinani mix masá nuitukë a ënti ꞌain? ꞌËx kana abia Israel kaman ꞌapu ꞌiti kuëënima. Usa ꞌain kamina ñuina manchan anu ꞌaruti ꞌakë anu xëni ꞌarubiani kuanti ꞌain, Jesé Belénnu ꞌikë ain xubunu, ꞌën kana ꞌain bakë bëchikë achúshi axa ꞌapu ꞌinun kaísan.

1 Samuel 16:13

Kakëxunshi ka ñuina manchanua ꞌarukë xëni bikin aín xukë́n apankama ismainunbi David kakë uni bëná aín maxkánu axa ꞌapu ꞌinun anëkin xëni tutukaxa. Usokëbëshi ka Nukën ꞌIbun bëru ñunshin anu uax ꞌiruakëxa. Usokin ꞌabiani ka Samuel kana kuanin kixun atu kabiani Ramánu ꞌikë aín xubunu kuantëkëankëxa.

1 Samuel 2:10

Nukën ꞌIbun ka axa ami nishkë unikama këñunun ꞌimiti ꞌikën, ꞌimikin ka naíkamë ꞌëonuax kanákamë ꞌëo banarui ꞌikin atunu ꞌibúkin këñunun ꞌimiti ꞌikën. Usakin ka Nukën ꞌIbun kamabi menu ꞌikë unikama ꞌati ꞌikën; ꞌanan ka anbia ꞌapu ꞌinun kaiskë ꞌapu a kamabi nëtëan kushiñu ꞌinun ꞌimiti ꞌikën.

1 Samuel 24:6

aín suntárukama munura baxëxokin kakëxa: ¡Nukën ꞌIbun ka ax ꞌapu ꞌikë uisabi oxuma ꞌanun ꞌë ꞌamitima ꞌikën! ¡Ax ka asérabi ꞌapu ꞌikën! ¡Usaia ꞌikë ax ka Nukën ꞌIbun usai ꞌiti kaisa ꞌikën!

1 Samuel 8:19

ꞌAínbi ka Israel kaman Samuel an kakëxun kuakinma ësakin kakëxa: —Usama ka. Nuxribi kananuna nun ꞌapuñu ꞌiti kuëënin kixun kakëxa,

1 Samuel 8:9

Usa ꞌain kamina, añu ꞌaxúnun kara mi kaia a ꞌaxúnti ꞌain; ꞌaínbi kamina ësokin pain atu kati ꞌain, axa atun ꞌapu ꞌiti uni an kara uisokin atu ꞌanuxun ꞌaia kixun ñukáti ꞌain.”

1 Samuel 9:16

“Imë́ishi ënë horanbi kana achúshi, Benjamínën rëbúnki aín menu tsókë xuti ꞌain, akamina ꞌain maxkánu xëni chikukin mamëti ꞌain, ax ka Israel unikaman ꞌapu ꞌiti ꞌikën. An ka filisteo unikaman ꞌatimoiabi ꞌën uni Israelkama ꞌakinti ꞌikën, ꞌënbi kana ꞌitsaira tëmërai kikania kuakin atu ꞌakinti sinan.”

1 Samuel 9:27

kuankëbë abë ëmanuax chikíkiani kuankin ka Samuelnën Saúl kakëxa: —Min ñu mëëmikë uni a kamina axpain rëkuë́nkianun xuti ꞌain, ꞌë pain kamina kaínti ꞌain, ꞌën kana Diosan usakin mi kanun ꞌë kakë bana mi kaisatanin.