1 Reyes 8:20 - Kashibo-Kakataibo Biblia

²⁰ Usa ꞌain ka Diosan usaía ënë ñukama ax kiásabi oi ꞌinun ꞌimiaxa. Usa ꞌain kana ꞌën papa Davidtan ꞌama ꞌikëbi anuxun Dios rabiti achúshi xubu an Israel unibu ꞌikë nu ꞌakian Dios ꞌaxuanan bërí Israel unikaman ꞌapu ꞌëx ꞌain.

1 Reyes 8:20 ပူးပေါင်းရင်းမြစ်များ

2 Samuel 7:12

usa ꞌain kana anúnmi ñuti nëtë ꞌikëbëtan min bakë bëchikë achúshi nëtë́timokin mëramikin axa ꞌapu ꞌinun ꞌimiti ꞌain.

1 Reyes 1:48

ësai kiakëxa: “Israelkaman Dios ax ka upíokin rabikë ꞌiti ꞌikën, usa ꞌixun ka ꞌën bakë bëchikë achúshi ꞌënbi ismainun ꞌapu ꞌimiaxa, usakin rabikin ꞌaia kana isan kixun ka, Jotamnën ñuixunkin atu kakëxa.”

1 Reyes 8:15

ësai kiakëxa: Israel unikaman Dios ax ka upíokin rabikë ꞌiti ꞌikën, an ka ꞌën papa David kásabiokin ꞌaxa, usa ꞌaish ka ësai kiakëxa:

Nehemías 9:8

Min iskëx ka ax achúshi uni mimira sinani katamëkë ꞌiakëxa, usa ꞌixun kamina abëtan achúshi ñu ꞌakinmi min rëbúnkikama kana anua cananeos unibu ꞌimainun hititas, amorreos, ferezeos, jebuseos ꞌimainun gergeseos; ¡a unikaman me ꞌinánuxun ꞌai kixunmi kásabiokin ꞌakën, min kamina asérabi mix kikësabiokin ñu ꞌain!

Isaías 9:7

Ax ka anua David tsóa anubi tsóti ꞌikën; usa ꞌikë ka ax kushiira ꞌixuan ñu ꞌaia kamabi menuxun kuati ꞌikën ꞌimainun ka chuámarua uni tsóti ax këñutima ꞌikën; usa ꞌixun ka uínsaranbi axa ꞌapu ꞌia ax ënkëma anubi ꞌiti ꞌikën, usa ꞌain ka an ꞌakë ñukama ax upíokin ꞌakë ꞌianan, an bërí pëukin ñu ꞌakë ax uínsaranbi nëtë́tima usabi ꞌiti ꞌikën. Ësokin ka Dios kamabi kushiñuira an ꞌitsaira unikama nuibakin ꞌati ꞌikën.

Ezequiel 37:14

Usa ꞌain kamina ꞌën mitsu anun tsóti uin ꞌinánkë amiribishi tsótëkëkanti aín; usakin ꞌatankëxun kana mitsun menubi tsónun mitsu ꞌimiti ꞌain. Usakin ꞌakëxun kamina ꞌëx Dios ꞌixun kana ꞌëx kikësabiokin an kixun ꞌunánkanti ꞌain. ꞌËx mitsun ꞌIbu asérabi ꞌaish kana ësai kin.

Miqueas 7:20

¡ꞌËn ꞌIbu mix upí ꞌixun nu nuibakin kamina bërámami nun chaitiokëkama Abraham ꞌimainun Jacob kásabiokin nuribi ꞌakinti ꞌain!

Hechos 7:47

Usoquin sinánxunbia ꞌama ꞌain ca aín bëchicë Salomón an cuni a xubu ꞌacëxa.

Romanos 4:21

Rabiquin ca, an ca asérabi cushi ꞌixun ax quicësabi oquin ñu ꞌati ꞌicë quixun sináncëxa.

Filipenses 1:6

Cana ꞌunanin, an mitsu Jesucristomi catamënun sinánmicë ꞌixun ca axa utëcë́nti nëtë ꞌitámainun Nucën Papa Diosan Jesucristosaribi ꞌaish upí ꞌinun mitsu ꞌimia.