1 Reyes 18:12 - Kashibo-Kakataibo Biblia

¹² Usa ꞌaínbi ka bërí ꞌëx mi ëbiani kuankëbëtan Diosan bëru ñunshinan anua ꞌën mi ꞌunántima menu buánti ꞌikën. Usa ꞌain ka mi ñuikin kakëx ukinbi mi mërakinma Ahabnën ꞌë rëtëti ꞌikën. An mi ñu mëëxunti uni ënën ka bëná ꞌixunbi Dios kuëënkësa okinshi ñu ꞌakëxa.

1 Reyes 18:12 ပူးပေါင်းရင်းမြစ်များ

1 Reyes 18:11

¡Usa ꞌaínbi kaina bërí min ꞌën a ñu mëëxunkë uni ënu kamina uá kixun katánun ꞌë kain!

2 Reyes 2:11

Ësai kia a rabëtax kanankiani kuankëbëbi ka Diosanbi ꞌimikëx, bënëtishi achúshi caballonan nirinkë anu tsi rëkirukësa ꞌimainun caballonuribi tsi rëkirukësa ax mërakëxa, mërakëbëa Elías abë ënanani anu ꞌiruia ka suñúan kushiira mañákë anbi birubiankin naíkamë ꞌëonu buánkëxa.

2 Reyes 2:16

ꞌikin ka ësokin kakankëxa: —Ka kuat, ënu kananuna an mi ñu ꞌaxúnti cincuenta uni ain sinan kushibu ꞌain. Usa ꞌain kamina an mi ñu ꞌunánmikë uni a baritanun nukama xuti ꞌain, Diosan bëru ñunshina atuma buánxun aín bashinu niananbi me sapanubu nia istánun. ꞌAínbi ka Eliseonën ësai kiabi atu kakëxa: —Usama ka uibi kamina mitsun a baritanun xutima ꞌain.

Proverbios 8:13

Uin kara Diosan kakësokin ꞌaia an ka ñu ꞌatimakama a timati ꞌikën. ꞌËx kana rabiakakë ꞌimainun, bëtsi unibëtan sënë́nma kana ꞌai kikë uni ami ꞌianan, ꞌatima ñu ꞌakë ꞌimainun këmëi banakë uni amiribi nishin.

Ezequiel 37:1

Nukën ꞌIbu Diosan aín mëkën ꞌënu nankësa okin ꞌaia ka aín kushin chikínbiankin buántankëxun, me sapan anua xo ëskikë ꞌaisamaira bukukiankë anu ꞌë bëbamiakëxa.

Mateo 2:16

Usa ꞌain ca —an ñu ꞌunáncë unicaman ca ꞌë paránxa —quiax Herodes ꞌaisamairai nishacëxa. Nishquin ca an ñu ꞌunáncë unin ñuicë bana sinánquin Jesús isa rabë́ baritia aín bacë́ncë ꞌicë quixun sináncëxa. Sinánxun ca aín uni xuacëxa, camabi Belénu ꞌicë rabë́ baritiañu bëbu tuácama ꞌanan rabë́ baritiañuma bëbu tuácamaribi ꞌabianxun a ꞌurama ꞌicë ëmacamanuaribi bariquin cëñunun quixun.

Mateo 4:1

Nashimicë ꞌicë ca Nucën Papa Diosan Bëru Ñunshin Upitan Jesús anu uni ꞌicëma menu cuanti sinánmiacëxa, anuxun ca ñunshin ꞌatimanën ꞌapun ñu ꞌatima ꞌamicatsi quixun ꞌati ꞌicë quixun ꞌunánquinbi.

Lucas 1:15

Ax ca Nucën Papa Diosan iscëx uni itsisama ꞌiti ꞌicën. ꞌIanan ca an vino ꞌimainun ñu cachacë xëatima ꞌicën. Aín titaxa bacë́ncëma pain ꞌaíshbi ca Nucën Papa Diosan Bëru Ñunshin Upíñu ꞌiti ꞌicën, usabi ꞌinux.

Hechos 12:19

Usa ꞌain ca —ꞌaíma ca —quixuan ñuia cuaquin Pedro barinun quixun Herodesnën suntárucama cacëxa. Cacëxun bariquinbi ca mërama ꞌicën. Mëracëbëtanma ca an Pedro sipunua bërúoncë suntárucama a ñucátancëxun ꞌanun quixun raíri cacëxa. Usomitancëx ca Herodes Judea menuax Cesárea ëmanu tsoti cuancëxa.

Hechos 8:39

A nashimitancëx caman ꞌiruiaishia Nucën Papa Diosan Bëru Ñumshin Upitan buáncëx nëtëtia ca a unin Felipe istëcëanma ꞌicën. Istëcënímabi cuëënquiani ca aín menu cuancëxa.

2 Timoteo 3:15

Chamará ꞌixunbi ꞌá ꞌixun camina Nucën Papa Diosan bana ꞌunanin. A banacama ꞌunánquin camina uisai caramina ꞌiti ꞌai quixun ꞌunánan, uisari caramina Jesucristomi catamëti Nucën Papa Diosnan ꞌinux ië́ti ꞌai quixun ꞌunánti ꞌain.

1 Samuel 16:2

—¿Uisokin karana anu kuanuxun ꞌati ꞌain? —kixun ka Samuelnën kakëxa—. ¡Saúlnën usakin ꞌakë ꞌunánkin ka ꞌë ꞌati ꞌikën! Kakëxunbi ka Nukën ꞌIbun kakëxa: —Vaca bërí kanikë ain xanu bibiania iskin uínbi kara mi ñukákëxun kamina ꞌë kamina ñuina xaroxuni kuani kixun kati ꞌain.

1 Samuel 2:18

Usokia atun ꞌamainun ka, bëná ꞌixun Samuelnën efod kakë chupa upíira lino ꞌakë a pañukë ꞌixun Nukën ꞌIbun ñu mëëti ënkinma abi ꞌakëxa.

1 Samuel 2:26

Usa ꞌain ka Samuel bërunani kanikin upíokin ñu ꞌaia Nukën ꞌIbun ismainun unikamanribi upí tuá ꞌixuan upíokin ñu ꞌaia ꞌunánkëxa.