1 Pedro 3:9 - Kashibo-Kakataibo Biblia

⁹ An mitsu ꞌatimocë unicama camina cupiquin aribi ꞌatimotima ꞌain. Axa mitsumi ꞌatimati banacë unimi camina mitsúxribi ꞌatimati banatima ꞌain. Usai ꞌimi bëtsibë nuibanani upitax bucunun ca Nucën Papa Diosan ainan ꞌinun mitsu caísacëxa.

Nukën 'Ibu Diosan ain unikama 'inan ain bana

⁹ An mitsu 'atimocë unicama camina cupiquin aribi 'atimotima 'ain. Axa mitsumi 'atimati banacë unimi camina mitsúxribi 'atimati banatima 'ain. Usai 'imi bëtsibë nuibanani upitax bucunun ca Nucën Papa Diosan ainan 'inun mitsu caísacëxa.

1 Pedro 3:9 ပူးပေါင်းရင်းမြစ်များ

Génesis 42:25

Usokin ꞌamitankëxun ka Josénën aín unikama kakëxa, trigo aín pishanu buchuokin ꞌaruxuanan, kamina atun kuríkiribi atun pisha ꞌukëmëu achúshi achúshi pishanubi ꞌaruxuntënkëti ꞌain, ꞌanan kamina kuankian bainuxun pibianti aribi ꞌinánti ꞌain. Ësokian Josénën kakëxun ka an kakësabiokin aín unikaman ꞌakëxa.

Mateo 19:29

Ësaquinribi cana mitsu cain, uinu ꞌicë unin cara ꞌëx cuëëncësabi oquin ꞌanuxun aín xucën, aín chirabacë, aín papa, aín tita, aín bëchicë, aín naë, añu ñu cara, abi ëanxa, a unix ca ëncë ñuñu ꞌicësamaira oi ñuñu ꞌiti ꞌicën. ꞌIanan ca Nucën Papa Dios quicësabi oi aín nëtënu abë nëtë́timoi ꞌiti ꞌicën.

Mateo 25:34

Usai ꞌitancëxun cana ꞌëx ꞌApuira ꞌixun axa ꞌën mëqueu ꞌicë unicama cati ꞌain: ꞌËn Papa Diosan ca mitsu upí oquin sinánxunia. Mecama ꞌimainun anu ꞌicë ñucama unioquin ca an mitsu sinánxunquin anu mitsux abë ꞌiti mëníocëxa. Ax quiásabi oi camina bërí anu ꞌiti ꞌain.

Mateo 5:39

Usai quiá ꞌaínbi ꞌën mitsu cain, mitsua ꞌatimocëxunbi camina ami nishquin cupiquin ꞌatimotima ꞌain. Usoquin ꞌaquinma camina mitsua mëqueu bëtáshcacëxun ꞌaisa tania amoribia mitsu bëtáshcanun ꞌamiti ꞌain.

Mateo 5:44

Usai quiá ꞌaínbi cana ꞌën mitsu cain, axa mimi nishcë unicama nuibaquin ꞌaquianan camina axa mimi ꞌatimati banacë unicama ꞌimainun an mi bëtsi bëtsi ocë unicama Nucën Papa Dios ñucáxunti ꞌain.

Marcos 10:17

Baían Jesús cuancëbëbi ca achúshi uni abácuatsini uacëxa. Ai rantin puruni tsóbuquin ca ñucáquin cacëxa: —Mix camina asérabi upí uni ꞌain. Usa ꞌixun camina ꞌë ñuixunti ꞌain, ¿ꞌëx nëtë́timoi Nucën Papa Diosan nëtënu abë ꞌinuxun carana añu ꞌati ꞌain?

Lucas 10:25

An Moisésnën cuënëo bana ꞌunáncë uni achúshinën ca uisoquin caraisa caia quixun ꞌunáncatsi quixun sinánquin Jesús ësaquin ñucácëxa: —¿Añu carana ꞌëx ainan ꞌaish xënibua ꞌaínbi Nucën Papa Diosbë ꞌinuxun ꞌati ꞌain?

Lucas 18:18

Aín cushi uni achúshinën ca Jesús ësoquin cacëxa: —Mix camina asérabi upí uni ꞌain. Usa ꞌixun camina ꞌë ñuixunti ꞌain, ¿ꞌëx nëtë́timoi Nucën Papa Diosan nëtënu abë ꞌinuxun carana añu ꞌati ꞌai? quixun.

Romanos 12:14

Axa mitsumi nishcë uni a camina ami nishquinma axribi upí ꞌinúan ꞌaquinun Nucën Papa Dios ñucáxunti ꞌain. Ami nishquin a ꞌatimonun quixun caquinma camina axa upí ꞌinúan ꞌaquinun Nucën Papa Dios a uni ñucáxunti ꞌain.

Romanos 12:17

An paían mimi nishquin ꞌatimocëxunbi camina uisa uni cara, abi mixribi ami nishquin aribi cupitima ꞌain. Mitsun camina usa ñu ꞌati ca upí ꞌicë quixuan camabi unin ꞌunáncë a ñucamaishi ꞌati ꞌain.

Romanos 8:28

Cananuna ꞌunanin, Nucën Papa Diosan ca uisa ñu cara ꞌia abi, ax ami sináncë unicamaxa an ꞌaquincëx, upí ꞌinun mëníoxunia, atúan ax cuëëncësabi oquin ñu ꞌamainun. A unicama ax cuëëncësabi oquin ainan ꞌinun sinánmicë ꞌixun ca Nucën Papa Diosan usoquin ꞌaia.

Romanos 8:30

Uicamax cara usai ainan ꞌiti ꞌicë quixun ꞌunánquin ca Nucën Papa Diosan acama an sinánmicëxa ami catamëtia atun ꞌuchacama tërë́nquin ainan ꞌimiaxa. ꞌImiquin ca atux aín nëtënu abë ꞌiti ꞌimiaxa.

Gálatas 3:14

Nucën Papa Diosan Abraham cásabi oía judíosma unicamaxribi Nucën Papa Diosnan ꞌinun ca Cristo Jesús ꞌuchañuira uni ꞌicësari bamacëxa. Ax usai bama cupí ca axa ami catamëcë unicama Nucën Papa Diosan aín Bëru Ñunshin Upí ꞌinania, ax quiásabi oquin.

Efesios 4:32

Usai ꞌima camina abë nuibanani uni itsibë ꞌaquiananti ꞌain. Mitsumi nishquian unin ꞌatimocëxbi camina abë tanánantima ꞌain. Usai ꞌima camina uisa cara mi ocëxbi a manui abë upí ꞌiti ꞌain. Mitsun ñu ꞌaisama ꞌacëcama manuia, Nucën Papa Dios Cristo cupí mitsubë upí ꞌain, camina usaribiti uni itsibë ꞌiti ꞌain.

1 Tesalonicenses 5:15

Mitsu uinu ꞌicënbi camina bëtsi uni mimi nishquian ꞌatimocëxun ami nishquin aribi cupiquin nishananquintima ꞌain. Usai ꞌima bëtsibë bëtsibë ꞌaquiananquin camina camabi uni ꞌaquinti ꞌain.

Hebreos 12:17

Camina ꞌunanin, ꞌitsa baritia ꞌicëbë ca Esaú aín papan rëcuën bëchicë ꞌitëcënti sináncëxa. Usaquin sinani masá nuituti iníbi ca ꞌiáma ꞌicën. Usa ꞌain ca Esaúma, aín xucën Jacob, axa aín rëcuën bëchicësa ꞌicë, aín papan Isaacnën upí oquin sinánxunquin Nucën Papa Dios ñucáxuancëxa.

Hebreos 6:14

“Ësoquin cana asérabi ꞌati ꞌain. Cana mi upí oquin sinánxunquin bëchicëñu mi ꞌimianan min rëbúnqui ꞌitsaira ꞌinun uámiti ꞌain”.

1 Pedro 5:10

Usabi ꞌinúxmabimi tëmëracë ca Nucën Papa Diosan mitsu cushioquin Jesucristosaribi upí ꞌinun mitsu ꞌimianan —aín bana quicësabi oi cana asérabi ꞌiti ꞌai —quixun ꞌunani ami cushinun mitsu ꞌimiti ꞌicën. Ax ca an mitsu nuibaquin ꞌaquincë ꞌianan Jesucristonan cupí abë́mi xënibua ꞌaínbi upitax ꞌinun caíscë a ꞌicën.