1 Pedro 3:11 - Kashibo-Kakataibo Biblia

¹¹ Ñu ꞌaisama ꞌati ënquin ca ñu upíshi ꞌati ꞌicën. Nishananíma ca unibë upíshi ꞌiti ꞌicën.

Nukën 'Ibu Diosan ain unikama 'inan ain bana

¹¹ Ñu 'aisama 'ati ënquin ca ñu upíshi 'ati 'icën. Nishananíma ca unibë upíshi 'iti 'icën.

1 Pedro 3:11 ပူးပေါင်းရင်းမြစ်များ

Job 1:1

Anu ka achúshi uni Job kakin anëkë ꞌiakëxa, ax ka Us kakë me anu tsóakëxa, usa ꞌixun ka uisa ñu ꞌatimabi ꞌati sinánkëma ꞌianan, Dios kuëënkësabi okinshi aín nuitu upí ꞌixun ñu ꞌakin bëtsi uni ꞌatima oti sinánkëma ꞌiakëxa.

Job 2:3

Usakin kakëxun ka Diosan kakëxa: —¿Uisa kara ꞌën uni Job ꞌikë kixun kaina ꞌunán? Asaribi uni ka ënë menu ꞌaíma ꞌikën, an ka ꞌën kuëënkësabi okinshi ꞌakin ñu upíshi ꞌai tsókin ñu ꞌatima ꞌati sinanan uisakinbi uni ꞌatimoti sinanima upiti bërúankatia. Usa ꞌain ka minmi uisa ñu ꞌatima ꞌakëmabi a ꞌatima oti sinánxun ꞌë karaishikin katankëxun ñu ꞌatima, ꞌamikëxunbi ka uisa ñu ꞌatimabi mi ꞌaxuntima ꞌikën.

Salmos 34:14

Ñu ꞌatima ꞌati a ënkin kamina ñu upí ꞌati ꞌain; usakin ꞌakin kamina ami ꞌakë ñu a ënkinma abi ꞌati ꞌain.

Salmos 37:27

Ñu ꞌatima ꞌakë ënkin kamina ñu upíshi ꞌati ꞌain, usakin ꞌai kamina anu xënibua ꞌaínbi tsóti nëtënu ꞌiti ꞌain.

Proverbios 3:7

Min sinanën kamina ꞌëx kana ñu ꞌunainra ꞌai kiax kitima ꞌain; usai ꞌikima kamina Diosmishi katamëkin ñu ꞌatima ꞌatimi sinánkë a manuti ꞌain:

Mateo 5:45

Usaquin ꞌacë ꞌaish camina asérabi mitsun Papa Dios axa naínu ꞌicë an sináncësabi oquin sináncë ꞌain. An ca camabi uni, upí uni ꞌimainun upíma uni aribia pëcanun bari urumianan camabi unin ñu ꞌapácë chabónun ꞌuíribi ꞌibúmia. Usaribi oquin camina camabi uniribi nuibaquin ꞌaquinti ꞌain.

Mateo 5:9

An raíri uni bëtsibë nishananíma nuibananun ꞌaquincë uni a ca Nucën Papa Diosan —mix camina ꞌën bëchicë ꞌai —quixun cati ꞌicën. Usa unix ca chuámarua tani cuëënia.

Mateo 6:13

Ñunshin ꞌatimanën ꞌapúan nu ñu ꞌatima ꞌamixunma ꞌanun camina nu bërúanti ꞌain. Nun ñu ꞌatima ꞌati ꞌicëbi camina nu usa ñu ꞌaxunma ꞌanun nu ië́miti ꞌain. Mix cushiira ꞌaish xënibua ꞌaínbi ꞌApu ꞌicë ca camabi unin mi rabiti ꞌicën. Usai ꞌinun min ꞌimiti cana cuëënin.

Marcos 14:7

Camabi nëtën camina ñuñuma uni isin. Isquin camina ꞌaquinsa tanquin ꞌaquinquin ñu ꞌinánti ꞌain. Usa ꞌaínbi camina mitsun xënibuquin ꞌë istima ꞌain.

Lucas 1:79

Xucëxun uquin ca axa aín ꞌucha cupí Nucën Papa Diosbë upíma ꞌianan —ꞌën bamati ca ꞌurama ꞌicë —quixun sinani racuëti masá nuituti bëánquibucënu ꞌicësa unicama atun ꞌuchacama tërë́nquin Nucën Papa Diosnan ꞌinun ꞌimianan nuxnu Nucën Papa Diosbë upí ꞌaish ax cuëëncësabi oi ꞌinun nu ꞌimiti ꞌicën. Usai ca Zacarías Nucën Papa Diosan Bëru Ñunshin Upitan sinánmicëx quiacëxa.

Lucas 6:35

Usa ꞌaínbi camina mitsun axa mitsumi nishcë uni nuibaquin ꞌaquinsa ꞌicë ꞌaquinti ꞌain. Unían mitsu ñu ñucácëxun camina —anribi ca ꞌë ꞌinántima ꞌicë —quixun ꞌunánquinbi, ꞌinánti ꞌain. Usaquin ꞌaia isquin ca Nucën Papa Dios, manámi ꞌicë, an cuëënun mitsu ꞌimiti ꞌicën. Mitsun usaquin ꞌai camina asérabi aín bëchicë ꞌaish an sináncësaribi oquin sináncë ꞌiti ꞌain. An ca uni ꞌaisama ꞌimainun an —asábi ca —quixun a cacëma uni aribi ñu ꞌinánan ꞌaquinia.

Lucas 6:9

Anua nimainun ca Jesusan an Moisésnën cuënëo bana ꞌunáncë unicama ꞌimainun fariseo unicama cacëxa: —Ësaquin cana mitsu ñucatin, ¿anun ñu mëëtima nëtën cara unin ñu upí ꞌati ꞌic? ¿Cara ñu upíma ꞌati ꞌic? ¿Anun ñu mëëtima nëtën cara unin uni itsi ꞌinsíncë ꞌaquinti ꞌic? ¿Cara bamatanun isëshiti ꞌic?

Juan 17:15

Ënë nëtënuami atu binun quixun cana mi ñucatiman. An min bana cuacëma unicamaxa atumi nishcëbëtanbimi ñunshin ꞌatimanën ꞌapun ꞌibuati rabanan bërúanun quixun cana mi atu ñucáxunin.

Romanos 12:18

Mitsux camina ax paían mimi nishcëxma uni raírimi nishtima ꞌain. Usa ꞌaish camina atúxa mitsumi nishcëxbi mitsux abë nishanantima ꞌain.

Romanos 14:17

Aín ñu picë cupíma ꞌimainun aín ñu picëma cupíma ca uni Nucën Papa Diosbë upí ꞌicën. Aín Bëru Ñunshin Upitan sinánmicë cupíshi ca unin Nucën Papa Diosnan ꞌixun upí ñu ꞌanan, bëtsibë nishananíma nuibananan cuëëni upí oquin sinani tsotia.

Romanos 14:19

Usa uni ꞌixun cananuna camáxbia bëtsibë nuibananun uni raíri nuibaquin ꞌaquinti ꞌain. ꞌAquianan cananuna Cristomia upiti sinánun bëtsibë bëtsibë sinánmiananti ꞌain.

Romanos 5:1

Usai nux Nucën ꞌIbu Jesucristomi catamëcë ꞌicë, a cupí ca Nucën Papa Diosan nu upí isia. Usaquian iscëx cananuna abë upí ꞌain, Jesucristo cupí.

Romanos 7:19

Nun ꞌaisa tancë ñu upí a cananuna ꞌaiman. Nun ꞌaisama tancë ñu ꞌatima a cananuna ꞌain.

Romanos 7:21

Nun ꞌunáncëx ca ësa ꞌicën: Ñu upíshi ꞌati sinánquinbi cananuna bënë́nquinshi ñu ꞌatima ꞌatëcënin.

Romanos 8:6

An Nucën Papa Dios cuëëncësoi ꞌiti sinánquinma ënë nëtënu ꞌicë ñuishi sináncë uni, ax Nucën Papa Diosnanma ꞌaish abë ꞌitimoi bamati ꞌicën. Usa ꞌaínbi ca an Nucën Papa Diosan Bëru Ñunshin Upitan sinánmicësabi oíshi ꞌiti sináncë uni, ax Nucën Papa Diosbë upí ꞌaish abë nëtë́timoi tsóti sinani chuámarua tani cuëënia.

Gálatas 5:22

Usa ꞌaínbi ca Nucën Papa Diosan Bëru Ñunshin Upitan sinánmicëxuan an sináncë uni ax ësai ꞌia: unicama nuibacë, chuámarua ꞌaish cuëëncë, uisa ñu cara ꞌicëbëbi chuámarua ꞌaish bënë́cëma, an ꞌatimocëxunbi uni cupicëma, cuëmëninínshi banacë, upí nuituñu, ꞌimainun Jesucristomi upiti catamëcë,

Gálatas 6:10

Usa ꞌain cananuna axa nubë Jesucristomi catamëcë unicama ꞌaquinti ꞌain. ꞌAquianan cananuna ꞌaquinsa ꞌicë uni raíriribi camabi ꞌaquinti ꞌain.

Colosenses 3:15

Usa ꞌaíshmi ꞌitsa ꞌaíshbi achúshisaishi ꞌaish chuámashirua ꞌinun ca Nucën Papa Diosan mitsu ainan ꞌimiacëxa. Usa ꞌinúan an mitsu ꞌimicëx camina usai ꞌiti ꞌain. Usai ꞌiquin camina cuëënquin a —asábi ca —quixun cati ꞌain.

1 Timoteo 6:18

Canan camina ësaquinribi atu cati ꞌain, ënquinma upí ñuishi ꞌanan ca uix cara ñuñuma ꞌaish ꞌaquinsa ꞌicë aribi ñonquinma ꞌaquínti ꞌicë quixun.

Hebreos 12:14

Nishananima camina upitaxëshi bucuti ꞌain. Aín ꞌucha ëncëma unix ca Nucën Papa Diosbë ꞌitima ꞌicën. Usa ꞌain camina nishananima upitax bucuquin uisa ꞌuchabi ꞌati sinántima ꞌain.

Hebreos 13:16

Rabianan camina uni raíri ꞌaquinquin ñu upí ꞌati manutima ꞌain. Ñuñuma uniribi camina nuibaquin min ñu mësú ꞌinánti ꞌain. Unían usaquin ꞌaia isi ca Nucën Papa Dios cuëënia.

Santiago 4:17

Ësa ca: An usaquin ꞌati ca upí ꞌicë quixun ꞌunánquinbi usaquin ꞌacëma uni ax ca ꞌuchaia.

1 Pedro 3:12

Usai ꞌiquin ca ꞌunánti ꞌicën, Nucën ꞌIbu Diosan ca an upí ñu ꞌacë unicama bërúanquin ꞌaquinquin aín bana cuaquin an ñucácësabi oquin ꞌaquinia quixun. Usa ꞌixunbi ca an ñu ꞌatima ꞌacë unicama an ꞌaquinima.

3 Juan 1:11

ꞌËn nuibacë xucë́n, an ñu ꞌatima ꞌacë unían ꞌacësa oquin ꞌaquinma camina an ñu upí ꞌacë unían ꞌacësa oquinshi ñu ꞌati ꞌain. An ñu upí ꞌacë uni ax ca Nucën Papa Diosnan ꞌicën. Usa ꞌaínbi ca an ñu ꞌatima ꞌacë uni an ainanma ꞌixun Nucën Papa Dios ꞌunáncëma ꞌicën.