1 Corintios 5:11 - Kashibo-Kakataibo Biblia

¹¹ Ësaquinshi cana mitsu caisa tanin. Axa —ꞌëx cana Jesucristomi sináncë ꞌai —quibi cëmëcë unibë camina nitima ꞌain. Jesucristonainsa quiquinbia ainanmabi xanu cuëënbëquincë uni ꞌimainun xanúxmabi uni itsibëribi ꞌicë uni ꞌimainun bëtsi unin ñu cuëëncë uni ꞌimainun Nucën Papa Diosmi sinánquinma unin ꞌacë ñu rabicë uni ꞌimainun ñuianancë uni ꞌimainun paë́ncë uni ꞌimainun mëcamacë uni, usa unibubë camina nitima ꞌain, abëtanbi camina pitima ꞌain.

Nukën 'Ibu Diosan ain unikama 'inan ain bana

¹¹ Ësaquinshi cana mitsu caisa tanin. Axa —'ëx cana Jesucristomi sináncë 'ai —quibi cëmëcë unibë camina nitima 'ain. Jesucristonainsa quiquinbia ainanmabi xanu cuëënbëquincë uni 'imainun xanúxmabi uni itsibëribi 'icë uni 'imainun bëtsi unin ñu cuëëncë uni 'imainun Nucën Papa Diosmi sinánquinma unin 'acë ñu rabicë uni 'imainun ñuianancë uni 'imainun paë́ncë uni 'imainun mëcamacë uni, usa unibubë camina nitima 'ain, abëtanbi camina pitima 'ain.

1 Corintios 5:11 ပူးပေါင်းရင်းမြစ်များ

Mateo 18:17

Usaquin ꞌacëxunbia min bana cuaisama tancëbëtan camina axa ꞌëmi catamëcë Nucën Papa Diosan unicamax timë́cë a ñuixunti ꞌain. Ñuixuncëxun ca atúnribi a uni ꞌësëti ꞌicën. ꞌËsëcëxunbia atun bana cuaisama tania camina, a unix ca axa Nucën Papa Diosmi sináncëma unisa ꞌianan an ꞌapu buánmiti curíqui bicë uni ꞌicësaribiti ꞌuchañu ꞌicë quixun isti ꞌain.

Mateo 23:25

An Moisésnën cuënëo bana ꞌunáncë unicama ꞌimainun fariseo unicama, mitsun camina usabi oquin ꞌacë ꞌixun unicama paranin. Paránquin camina Nucën Papa Diosainsa mitsun nuitu upí isnun quixun xanpa ꞌimainun ñutë acama aín caxu chucain. Usaquin ꞌaquinbi camina mitsun nuitu mëu upíma ñu sinanin. Uni paránquin camina aín ñua mitsu ꞌinánun quixun sinánmianan ñunshínquin mitsun cuëëncë ñu biti acama sinanin. Mitsúxmi usa ꞌicë ca Nucën Papa Diosan uisa cara mitsu oti ꞌicë usoquin ꞌati ꞌicën.

Lucas 18:11

Cuanx, nitsax abë banaquin ca fariseo unin ësaquin Nucën Papa Dios caxa: Nucën Papa Dios, ꞌëx uni raírisama ꞌixun cana mi, asábi ca cain. Raírinëx ca an uni paránquin aín curíqui bicë uni ꞌimainun upí sinánñuma uni ꞌimainun aín xanuma ꞌaínbia uni itsin xanubë ꞌicë uni, usa ꞌicën. Usa unicama ꞌaisama ꞌaínbi cana ꞌëx usai ꞌima. An ꞌapu buánmiti curíqui bicë, ënë uníxribia ꞌaisama ꞌaínbi cana ꞌëx usai ꞌiman.

Lucas 21:34

Usa ꞌain camina mitsux cuëëncë ñuishi ꞌanan paë́anan ënë nëtënu ꞌicë ñucamaishi sináncë ꞌitin rabanan bërúancacë ꞌiti ꞌain. Usai bërúancacëma ꞌaish camina mitsúnmi sináncëbëmabi ꞌëx ucëbë ꞌë isi rabínti ꞌain.

Hechos 1:15

Usa ꞌaish ca anu timë́ax Jesucristomi sináncë unicama ax ciento veinte xucë́nsa ꞌiacëxa. Usa ꞌain ca Pedronën atu nëbë́tsi niruxun cacëxa:

Hechos 9:17

Usaquian Jesusan cacëx ca Ananías anua Saulo ꞌicë xubunu cuancëxa. Cuanx atsínxun ca aín mëcënan ramëquin Saulo cacëxa: —ꞌËn xucën Saulo, axa anúnmi ucë bainuax mibë banaëxancë, Nucën ꞌIbu Jesús, an ca minu unun ꞌë xuaxa, amiribishi istëcëananmi aín Bëru Ñumshin Upíñu ꞌinun.

Romanos 13:13

Ami cushicë ꞌaish cananuna upitaxëshi niti ꞌain. Paë́nti, paë́anx cuëëni sharáti, uni aín xanuma xanu itsibë ꞌiti, ñunshínquin ñu ꞌatima ꞌati, cuamianani nishananti, unimi nutsiti, a ñucama ënquin cananuna usa ñu ꞌatima ꞌain.

Romanos 16:17

ꞌËn xucë́antu, cana mitsu cain, bëtsi bëtsi unix Jesucristomi catamëcë ꞌaish mitsubë timë́cë ꞌixunbi ca an mitsu bana ñuixuncë unin ꞌunánmicësabi oquin ꞌaima. Usa unin ca uni raíri bëtsibë bëtsibë cuëbicanánmiquin ꞌatimaquin sinánun ꞌimia. Usai ꞌicë uni abë camina nitima ꞌain. Abë camina ënánanti ꞌain.

1 Corintios 10:14

ꞌËn nuibacë xucë́antu, unínbi ꞌacë ñu a camina ami ꞌunánquin rabitima ꞌain.

1 Corintios 11:21

Usa ꞌixun camina uni raíri tënánan micama raírinën mitsun bëcë ñu pin. Uni raírinëxa ꞌacëñuma ꞌaish panántamainun camina micama raírinëx ꞌaisamaira oquin pitancëx paënin.

1 Corintios 6:10

ꞌimainun an ñu mëcamacë uni ꞌimainun an bëtsi unin ñu cuëëncë uni, ꞌimainun axa ñuianancë uni ꞌimainun paë́ncë uni ꞌimainun an uni paránxun aín ñu bicë uni, acamax ca Nucën Papa Diosan nëtënu ꞌitima ꞌicën.

1 Corintios 6:6

¿Axa Jesucristomi catamëcë uníxa bëtsi ñui ami manani, axa Jesucristomi sináncëma ꞌapunu cuanti cara asábi ꞌic?

1 Corintios 6:9

¿Aín nëtënu abë ꞌiisa ꞌaíshbi ca an ñu ꞌaisama ꞌacë uni aín nëtënu Nucën Papa Diosbë ꞌitima ꞌicë quixun caramina ꞌunaniman? Camina ꞌunánti ꞌain, ainanmabi xanu cuëëncë unicama ꞌimainun an Nucën Papa Diosmi sinánquinma unin ꞌacë ñu rabicë unicama ꞌimainun aín xanuma ꞌaínbi bëtsi unin xanubë ꞌicë uni ꞌimainun xanúxmabi uni itsibë ꞌicë uni,

1 Corintios 7:12

Ënë banaribi ñuiquin cana Nucën ꞌIbu Jesusan ꞌë sinánmicëma, ꞌënbi sinánquin, ësaquin mitsu cain: axa Jesucristomi catamëcë unin ca aín xanúxa Jesucristomi catamëcëma ꞌaíshbi abë upí ꞌixun ëinsama tancëxun ëntima ꞌicën.

1 Corintios 7:15

Usa ꞌaínbi ca axa Jesúsmi catamëcëma unin aín xanu Jesúsmi catamëcë ꞌicë ëinsa tanquin ënti ꞌicën. Usaía ꞌicëxbi ca aín xanun ꞌuchama ꞌicën. Usaribi oquin ca axa Jesúsmi catamëcëma xanun aín bënë Jesúsmi catamëcë ꞌicë ëinsa tanquin ënti ꞌicën. Usaía ꞌicëxbi ca aín bënën ꞌuchama ꞌicën. Nucën Papa Dios ca nuxnu nun xanubë ꞌatimonani cuëbícanani tsoti cuëënima.

1 Corintios 8:11

Min a nami piquin camina, minun rabanan ꞌicësaribitia anun rabananribi Cristo bama uni, a ꞌuchamin.

Gálatas 2:12

Jacobonëan xucë́xa uni raíri ucëma pain ꞌain ca Pedronën judíosma unicamabëtan piacëxa. Usaquin ꞌaxunbi ca Jacobonëan xucë unicama ucëbëtan atubëtan piquinma, judíosma unicama ëancëxa, axa Jerusalénuax ucë unicaman a ñu cati rabanan.

Efesios 5:18

Mitsux camina paë́ntima ꞌain. Paë́ncë uni ax ca uisai cara banatisa tania usai bananan, añu cara ꞌaisa tania a ꞌaia. Usai ꞌima camina Nucën Papa Diosan Bëru Ñunshin Upitan mitsubë ꞌixun anbi upí oquin cushiocë ꞌaish upiti bananan upí ñuishi ꞌati ꞌain.

Efesios 5:5

Camina asérabi ꞌunánti ꞌain, axa aín xanuma ꞌaínbi xanubë ꞌicë uni, axa xanúxmabi unibë ꞌicë uni, an ainanma uni itsin ñu cuëëncë uni, a unicamax ca Nucën Papa Diosmabi, unínbi ꞌacë ñuishi rabicësa ꞌicën. Usa unicamax ca Nucën Papa Diosan nëtë anua Cristoribi ꞌicë anu abë ꞌitima ꞌicën.

Colosenses 3:5

Usa ꞌain camina bërámami ꞌacansa oquin Nucën Papa Diosnanma unicaman ꞌacësa oquin ënë menu ꞌicë ñuishi ꞌati sinántëcëntima ꞌain. Unix ca aín xanuma ꞌaínbi bëtsi xanubë ꞌitima ꞌicën. Usaribiti ca xanu aín bënëma ꞌaínbi bëtsi unibë ꞌitima ꞌicën. ꞌImainun ca uni xanúxmabi bëtsi unibë ꞌitima ꞌicën. ꞌImainun camina ñunshinacëquin ꞌatima ñu ꞌati cuëëntima ꞌain. Camina ñuñu ꞌitishi sinántima ꞌain. Ñuñu ꞌitishi cuëëncë unix ca Nucën Papa Dios rabima, a cuëëncë ñuishi rabicësa ꞌicën.

2 Tesalonicenses 3:14

Ui unin cara nun cuënëocë bana ënë ënxun nux quicësabi oquin ꞌaisama tania, a unibë camina nitima ꞌain, axa rabíntanun.

2 Tesalonicenses 3:6

Nucën xucë́antu, Nucën ꞌIbu Jesucristonën nu sinánmicësabi oquin cananuna mitsu cain, ui unin cara Jesucristomi catamëcë ꞌixunbi nun mitsu ꞌunánmicësabi oi ꞌiisama tanan ñu mëëtisama tania, abë camina ënananti ꞌain.

1 Timoteo 3:3

Paë́ncëma ꞌianan ca unibë mëëananti sinánñuma ꞌiti ꞌicën. Usa ꞌaish ca bënëtima cuëmëninishi unibë bananan curíquiñu ꞌiisa tani bënë́tima ꞌicën.

1 Timoteo 6:5

Usa ꞌaish ca a unicamax usaíshi ꞌiquin uisa ñu ꞌati cara upí ꞌicë, uisa ñu ꞌati cara upíma ꞌicë quixun ꞌunanima nëtëtima nishánani cuamianania. Usai ꞌicë unicaman ca Nucën Papa Diosan bana ꞌaquin isa unin curíqui biti ꞌicë quixun sinania. A unicamabë camina nitima ꞌain.

2 Juan 1:10

Ui unin cara mitsu isi cuanxun Jesucristo ñui quicë bana —ax ca asérabi ꞌicë —quixun ñuiquinma bëtsi oquin ñuia, a camina min xubunu atsínmima ꞌianan —caina uan —quixunribi catima ꞌain.

Apocalipsis 2:14

Mitsúxmi usa ꞌicëbi cana ësaquin mitsu cain: Micama raírinën camina unían Balaanën cacëxun ꞌatima ñu ꞌásaribi oquin ꞌain. Balaanën ca an Israel unicama ñusmoisa tancë capitán, Balac cacë, a ësaquin cacëxa: Min menu ꞌicë bënëñuma xanucama camina Israel uni parania atubë ꞌinun cati ꞌain. Usai abë ꞌiquin ca ax isa dios ꞌicë quixuan min unicaman rabicë ñu a rabiquian ñu pinun ꞌimiti ꞌicën. Balaanëan usoquin sinánmia ꞌaían usaribi oquin axa mitsubë ꞌicë uni raírinënribi sinánmicëxun camina mitsu raírinën usaribi oquin ñu ꞌatima ꞌain.

Apocalipsis 2:20

Mitsúxmi usa ꞌicëbi cana ësaquin mitsu cain. Bëráma ca Jezabal ax ꞌatima xanu ꞌaíshbi judíos unicaman ꞌapu ꞌiacëxa. Usaribi oquin ca micamáxmi timë́cëbëtan achúshi xanu ꞌatimanën bana ñuixunia. An isa Nucën Papa Dios quicë bana unicama ñuixunia quiquinbi ca axa ꞌëmi sináncë unicama parania. Paránquin ca aín xanuma ꞌaínbia uni xanu itsibë ꞌiti ca asábi ꞌicë quixun ꞌunánmianan ñu ax isa dios ꞌicë quixuan unin cacë a rabiquin ñuina rëcë piti isa asábi ꞌicë quixun unicama ꞌunánmia. An usaquin ꞌatima ñu ꞌanun uni ꞌunánmiabi camina isëshitin.

Apocalipsis 21:8

Usa ꞌaínbi ca racuë́quian an ꞌëmi sinánti ëncë unicama, ꞌimainun an ꞌëmi catamëcëma unicama, ꞌimainun an ñu ꞌatima ꞌacë unicama, ꞌimainun an uni ꞌacëcama, ꞌimainun aín xanuma ꞌicëbi bëtsi xanu cuëëncë unicama ꞌimainun aín bënëma ꞌicëbi bëtsi uni cuëëncë xanucama ꞌimainun ñu xëacë ñubë́ unicama ꞌimainun an Nucën Papa Diosmabi bëtsi ñu rabicë unicama ꞌimainun cëmë unicama, acamax anuaxa ꞌianëmëꞌëosa manë tsi azufrebë rëquirucë anu ꞌiti ꞌicën, anu bamatëcëncë ꞌaish chiquítimoi ꞌinux.

Apocalipsis 22:15

Usa ꞌaínbi ca ꞌaisama unicamax a ëma ëmáinshi ꞌiti ꞌicën. An ñu ꞌaisama sináncë unicama, an ñu xëacë ñubë́ unicama, aín xanuma ꞌicëbi bëtsi xanu cuëëncë unicama, aín bënëma ꞌicëbi bëtsi uni cuëëncë xanucama, an uni ꞌacë unicama, an Nucën Papa Diosmabi bëtsi ñu rabicë unicama, axa uni paránti cuëëni cëmëcë unicama, acamax ca a ëmanu atsíntima ꞌicën. Ca ëmáinshi ꞌiti ꞌicën.