1 Corintios 4:5 - Kashibo-Kakataibo Biblia

⁵ Usa ꞌain camina Jesucristo utëcëncëma pain ꞌain, uisa uni cara uni itsi ꞌicë quixun sinántima ꞌain. Utëcënxun ca Nucën ꞌIbu Jesucristonën, camabi uni an unë́xun ñu ꞌacëcama ꞌimainun aín nuitu mëúa sináncë ñucamaribi, an upí oquin ꞌunánun ꞌunánmiti ꞌicën. ꞌUnánmicëbëtan ca Nucën Papa Diosan ui unicaman cara aín ꞌucha tërë́ncë ꞌixun ñu upí ꞌaxa, a usaribi oquin —upí oquin camina ꞌa —quixun caquin cuëënmiti ꞌicën.

Nukën 'Ibu Diosan ain unikama 'inan ain bana

⁵ Usa 'ain camina Jesucristo utëcëncëma pain 'ain, uisa uni cara uni itsi 'icë quixun sinántima 'ain. Utëcënxun ca Nucën 'Ibu Jesucristonën, camabi uni an unë́xun ñu 'acëcama 'imainun aín nuitu mëúa sináncë ñucamaribi, an upí oquin 'unánun 'unánmiti 'icën. 'Unánmicëbëtan ca Nucën Papa Diosan ui unicaman cara aín 'ucha tërë́ncë 'ixun ñu upí 'axa, a usaribi oquin —upí oquin camina 'a —quixun caquin cuëënmiti 'icën.

1 Corintios 4:5 ပူးပေါင်းရင်းမြစ်များ

Jeremías 23:25

Ësai ka Nukën ꞌIbu kiakëxa: ꞌËn kana kuan an bana ñuikë unikamax ka atúnbi namátankëx këmëi ꞌën isana namámikin atu ká kiax kia.

Malaquías 3:18

Usa ꞌain kamina mitsun amiribishi uisa ñux kara upí ꞌikë, uisa ñux kara upíma ꞌikë a ꞌunankanti ꞌain, ꞌimainun kana uin kara Dios ꞌikë asérabi ꞌë rabia, uin kara ꞌë rabima akamaribi ꞌunánkanti ꞌain.

Mateo 10:26

Ësaquinribi ca Jesusan aín ꞌunánmicë unicama bana ñuixuntanun xuquin cacëxa: —Unían mitsu bëtsi bëtsi ocëxbi camina an mitsu bëtsi bëtsi ocë unicamami racuë́tima ꞌain. Unían uni itsi paránxun ñu ꞌacëxbi ca camabi unían ꞌunáncë ꞌiti ꞌicën. Usaribiti ca unían ñu upí unë́xun ꞌacëxbi camabi unían ꞌunáncë ꞌiti ꞌicën.

Mateo 24:30

Usaía ꞌicëbëtan ca uni ꞌinux Nucën Papa Diosnuax uá, ꞌëx utëcënia isti ꞌicën. Isi ca camabi menu ꞌicë ui unicamax cara Nucën Papa Diosmi sináncëma ꞌicë, acamax masá nuituti bënëti inti ꞌicën. Usai ꞌiquin ca uni ꞌinux Nucën Papa Diosnuax uá, ꞌën nëtë cuin mëúxun ꞌën cushin pëcabëtsinia isnuxun ꞌaia.

Mateo 24:46

Cuanx anu ꞌitancëx utëcënquin ca an ñu mëëxuncë unin cara an cacësabi oquin ꞌaia quixun isti ꞌicën. Isquinbi an cabiancësabi oquin ꞌaia iscëx ca an a uni ñu mëëxuncë uni ax chuámarua tani cuëënti ꞌicën.

Mateo 25:21

Cacëxun ca an a ñu mëëmicë unin caxa: Camina upí oquin ꞌën curíquinën ñu ꞌan. Minmi ꞌitsamashi ꞌaínbi a curíquinën upí oquin ꞌacë cupí cana mi ꞌitsaira anúnmi ꞌë ñu ꞌaxúnun ꞌinánti ꞌain. Usa ꞌaish camina ꞌëx cuëëncësaribi oi ꞌëbë cuëënti ꞌain.

Mateo 25:23

Cacëxun ca an a ñu mëëmicë unin caxa: Camina upí oquin ꞌën curíquinën ñu ꞌan. Minmi ꞌitsamashi ꞌaínbi a curíquinën upí oquin ꞌacë cupí cana mi ꞌitsaira anúnmi ꞌë ñu ꞌaxúnun ꞌinánti ꞌain. Usa ꞌaish camina ꞌëx cuëëncësaribi oi ꞌëbë cuëënti ꞌain.

Lucas 6:37

Bëtsi uni ami manánquin ꞌuchocëma ꞌicë ca Nucën Papa Diosan mitsuribi ꞌuchotima ꞌicën. ꞌImainun ca ꞌuchoquinmi uni, bëtsi uni castícanmicëma ꞌicë Nucën Papa Diosan mitsuribi ꞌuchoquin castícantima ꞌicën. Uni itsíxa mitsumi ꞌuchacëxunbi camina abë mëníonanquin manumiti ꞌain. Usoquin ꞌaími unibë mëníonania ca Nucën Papa Diosan mitsux ami ꞌuchacëxunbi mitsun ꞌucha tërë́nquin manuti ꞌicën.

Juan 21:22

Cacëxun ca Jesusan cacëxa: —ꞌImitisa tanquin ꞌën ꞌimicë́xa ꞌëx utëcëntamainun ënë unix ënë nëtënu tsócëbëbi camina uisa cupí cara usai ꞌia quixun sinani bënëtima ꞌëx cuëëncësabi oíshi ꞌiti ꞌain.

Juan 21:23

Usaquian cacëxun cuaxun ca an Jesusan bana cuacë unicaman —a uni sapi ca bamatima ꞌicë —quixun sinánxun chaniocëxa. Usa ꞌaínbi ca Jesusan —Juan ca bamatima ꞌicë —quixun Pedro cáma ꞌicën. Caquinma ca ësoquinshi cacëxa: “ꞌImitisa tanquin ën ꞌimicë́xa ꞌëx utëcëntamainun ënë unix ënë nëtënu tsócëbëbi camina uisa cupí cara usai ꞌia quixun sinani bënë́tima ꞌai” quixun.

Juan 5:44

Nucën Papa Dios axëshi Dios ꞌixun mitsu upíoti cuëënima camina mitsúxbi upíonani rabiananti cuëënin. ¿Nucën Papa Diosan mitsu upí oti cuëëncëma ꞌaish caramina uisax ꞌëmi catamëti ꞌain? Camina ꞌitima ꞌain.

Romanos 14:4

Mitsux camina bëtsi unin ñu mëëmicë uni a ñui —an ca ꞌatima ñu ꞌaia —quitima ꞌain. Aín ꞌibúinshi ca ꞌunánti ꞌicën, cara upí oquin ꞌaia, cara upí oquin ꞌaima quixun. Usaribi oi camina mitsux Nucën ꞌIbu Diosan uni itsi ñui, —ñu aisama ca ꞌaia —quitima ꞌain. Aín ꞌIbúinshi ca ꞌunánti ꞌicën. Nucën ꞌIbu Diosan ca aín unicama ax cuëëncësabi oíshia ꞌinun ꞌimiti ꞌicën.

Romanos 2:1

Mitsúnmi uni itsi ꞌuchocëbëtanbi ca uni raírinën ꞌunánti ꞌicën, mitsun camina usa ñu ꞌati ca ꞌucha ꞌicë quixun ꞌunanin. Usa ꞌain camina minribi usa ñu ꞌatancëx —ꞌunánxunma cana ꞌa —quitima ꞌain.

Romanos 2:29

Axa aín nuitu mëu upiti Nucën Papa Diosmi sináncë uni ax ca asérabi judío uni ꞌicën. ꞌUnántioracacë uni ax ca Moisésnën cuënëosabi oquin aín namishi usoquin ꞌacë cupíma aín nuitu mëu Nucën Papa Diosmi sináncë cupí asérabi judío uni ꞌicën. Usa uni ca unían upí isiamabi Nucën Papa Diosan upí isia.

Romanos 2:7

Axa —Nucën Papa Diosan ca ꞌë upí isquin abë nëtë́timoi tsónun ꞌimiti ꞌicë —qui cuëëncë uni, an ca ënquinma Nucën Papa Dios cuëëncësabi oquin ñu ꞌaia. Usoquin an ꞌacë uni a ca Nucën Papa Diosan xënibua ꞌaínbi abë ꞌinun ꞌimia.

1 Corintios 1:7

Usa ꞌixunmi Nucën ꞌIbu Jesucristo utëcënti nëtë cainia ca Nucën Papa Diosan aín unicama ꞌaquincësaribi oquin ami ꞌunánun mitsu ꞌaquinia.

1 Corintios 11:16

Axa ënë bana cuati cuëbicanáncë unicama cana cain, usai ca xanu ꞌiti ꞌicë quixun cananuna camabi uni cain. Axa Jesucristomi catamëcë unicama timë́cëcamanribi ca —usai ca ꞌiti ꞌicë —quixun sinania.

1 Corintios 11:26

Usa ꞌain ca Nucën ꞌIbu Jesucristo utëcëntamainun aín unicaman ësoquin pán ꞌimainun bimi baca ꞌati ꞌicën. Usaquian aín unicaman ꞌaia isquin ca unin ꞌunánti ꞌicën, atun ꞌucha cupía Jesucristo bama ꞌain ca a sinánquin usoquin ꞌaia quixun.

1 Corintios 15:23

Nucën Papa Diosan mëníosabi oi ca Cristo pain baísquiacëxa. Baísquitancëx naínu cuan ꞌaísha ax utëcëncëbë ca aín unicama baísquiti ꞌicën.

1 Corintios 3:14

An a ñuiquin bana ñuixuncëxun cuati ami catamëquian unin Jesucristo quicësabi oquin ꞌacë ꞌain ca an atu bana ñuixuncë uni a Nucën Papa Diosan, upí oquin camina uni ꞌë ñuiquin bana ñuixuancë quixun caquin cuëënquin upí oquin cupíoti ꞌicën.

1 Corintios 3:8

Ainra paían uni bana ñuixuncë uni asaribi ca anribia uni bana ꞌunánmitëcëncë uni ax ꞌicën. Uisoquin cara aín ñu mëëti ꞌaxa istancëxun ca Nucën Papa Diosan a unicama cupíoti ꞌicën.

2 Corintios 10:18

Axa rabiacacë uníxma, axa Nucën ꞌIbu Jesucristonën iscëx upí ꞌicë uni, ax cuni ca asérabi upí ꞌicën.

2 Corintios 10:9

Racuë́oti cupí cana mitsu quirica buánmi quixunmi sináncanti cana cuëëniman.

2 Corintios 4:2

Uni itsimi unë́xunu ꞌacë ñucama ënquin cananuna a ꞌaínu rabínti ñu ꞌatimaribi ꞌaiman. Uni paránti sinánquinma cananuna Nucën Papa Diosan banaribi bëtsi oquinma ax asérabi quicë banaishi uni ñuixunin. Usaquin ñuixunia cuaquin ca camabi unin ꞌunánti ꞌicën, Nucën Papa Diosan iscëxun cananuna ax quicësabi oquin aín bana ñuixuni quixun.

2 Corintios 5:10

Utëcëntancëxun ca Cristonën unicama achúshi achúshi uisaquin cara ënë nëtënuxun ñu ꞌaxa quixun isti ꞌicën. Usoquin ca, atun ñu ꞌacë cara upí ꞌicë, cara upíma ꞌicë quixun isti ꞌicën. Atun ñu ꞌacësabi oquin istancëxun ca raíri ax cuëëncësabi oquin ꞌacë, axa cuëënun ꞌimianan raíri an aín bana quicësabi oquin ꞌacëma uni a uisoquin cara ꞌati ꞌicë usoquin ꞌati ꞌicën.

1 Tesalonicenses 5:2

Mitsun camina upí oquin ꞌunanin, unían sinánmabia an ñu mëcamacë uni imë́ ucësa usaribi ca anúan Nucën ꞌIbu Jesucristo uti nëtë ꞌiti ꞌicën.

Hebreos 4:13

Axa an unio ꞌaish Nucën Papa Diosmi unë́ti uisa ñubi ca ꞌaíma ꞌicën. An uni aín ñu ꞌacë cupí, uisa cara oti ꞌicë quixun ꞌunáncë, Nucën Papa Dios, an ca camabi ñua unin ꞌaia ꞌunánan aín nuitu mëúa chiquinaquinma sináncë ñubi ꞌunania.

Santiago 4:11

ꞌËn xucë́antu, cana mitsu cain, Jesucristomi sináncë ꞌaish camina axribia ami sináncë unicamabë ñuianantima ꞌain. Axa abëa Jesucristomi sináncë uni ñui —ax ca ꞌaisama ꞌicë —quicë uni ax ca —Nucën Papa Diosan banax ca ꞌaisama ꞌicë —quicësa ꞌicën. Usai qui camina mitsux Nucën Papa Diosan bana quicësabi oquin ꞌaíma a banax ca cuatima ꞌicë quicësa ꞌain.

Santiago 5:7

ꞌËn xucë́antu, Nucën ꞌIbu Jesucristo utámainun camina tëmëraibi bënë́quinma anúan uti nëtë caínti ꞌain. An ñu ꞌapácë unin ca ñu ꞌapátancëxun anun aín bimi biti nëtë sënë́ntamainun cainia. Usa ꞌixun ca mitabutancëxa sënë́ncëbëtan ñu ꞌapátancëxun bënë́quinma canitancëxuan tuaia aín bimi binuxun cainia.

Santiago 5:9

ꞌËn xucë́antu, Nucën Papa Diosan anun camabi uni aín nuitu ꞌunánquin uisoquin cara ñu ꞌaxa quixun isti nëtë ꞌurama ꞌain, camina mitsúxmi an ꞌuchocëma ꞌinun, uni raíribë ñuianani nishanantima ꞌain.

1 Pedro 1:7

Ënëx ca ësa ꞌicën. Asérabi cara curishi ꞌicë isnuxun ca unin curi tsi rëquirucënu xaroquin tania. Usaribiti camina mitsux caramina ami catamëcë ꞌai quixun isnuxun Nucën Papa Diosan tancë ꞌiti ꞌain. Curi ꞌaíshbi ca cëñúti ꞌicën. Usa ꞌaínbi camina tëmëraquinbi Nucën Papa Diosmi catamëquin ëncëma ꞌaish curisamaira ꞌiti ꞌain. Usaquin tancëxbimi asérabi ami catamëti ꞌain ca utëcënquin Jesucristonën —asérabi ꞌënan ꞌaish camina ꞌëbë ꞌaish cuëënti ꞌai —quixun mitsu cati ꞌicën.

1 Pedro 5:4

Usoquin ꞌaia ca Jesucristo, unin ꞌacësamaira oquian an aín unicama bërúancë, an utëcënquin mitsu —asábi ca —quixun catancëxun aín nëtënuaxmi xënibua ꞌaínbi abë cuëënun mitsu ꞌimiti ꞌicën. Ënë nëtënuax cuaiquin canania uisa ñu cara ꞌináncëxun bitsia uni cuëëncëbëbi ca an bicë ñu chëquia. Usaía uni ꞌicë ꞌaínbi camina mitsux xënibua ꞌaínbi Nucën Papa Diosbë ꞌaish cuëënti ꞌain.

2 Pedro 3:12

Usa ꞌain camina Jesucristo Nucën Papa Diosan mëníosabi oi uti caínquin unicama sinanatia ami catamënun ꞌaquinti ꞌain. A nëtën ca naíu ꞌicë ꞌuxë, bari, ꞌispa acama manë tsin rëquiruquin tsatsacacësa ꞌiti ꞌicën. Usai ꞌicëbë ca anua usa ñucama ꞌicë axribi manë tsin cëñucë ꞌiti ꞌicën.

2 Pedro 3:4

Cuai ca quiti ꞌicën: —Jesús ca utëcënti ꞌicë quiáxa uni quiá ꞌaínbi ca ucëma ꞌicën. Nucën raracama bamacëbëa ꞌiásabi oi ca camabi uni bamaia, ꞌimainun ca nëtë ióñua ꞌiásabi camabi ñu ꞌia.

Judas 1:14

Ax pain unia nucën rara Adán aín rëbúnqui nucën rara Enoc, ax ca Nucën Papa Diosan sinánmicëx usa uni ñui ësai quiacëxa: “ꞌËn iscëx ca Nucën ꞌIbu Dios camabi ꞌaisamaira aín uni upícaman nëpúamainun uaxa.

Apocalipsis 1:7

Ca is, Cristo, ax ca naí cuin mëu bëbacuatsini unuxun ꞌaia. Aia ca camabi unicaman isti ꞌicën, an manë xëtocën taro, acamánbi ca aia isti ꞌicën. Ax ucëbë ca camabi menu ꞌicë unicama ami sináncëma ꞌaish masá nuituti inti ꞌicën. Asérabi ca usai ꞌiti ꞌicën.

Apocalipsis 20:12

Usaquinribi isanan cana axa bama unicama, uni cushibu ꞌimainun uni cushimabu, acamaxa baísquitancëx anua Nucën Papa Dios ꞌicë aín bëmánon sëtë́cë isan. A unicamaxa sëtë́mainun ca quirica achúshi, anu ui unicamax cara Nucën Papa Diosbë ꞌiti ꞌicë quixun aín anë cuënëocë, ax bacacë ꞌiaxa. A isanan cana bëtsi quiricacamaribi isan. A quiricacamanu ca añu ñucama cara unicaman ꞌaxa quixun cuënëocë ꞌiaxa. A quiricacama isquin ca Nucën Papa Diosan unin cara upí ñu ꞌaxa, cara upíma ñu ꞌaxa quixun isaxa. Isun ca aín ñu ꞌacësabi oquin mëníonan an ñu upí ꞌacë uni upí ꞌimainuan an ñu upíma ꞌacë unicama tëmëranun ꞌimiaxa.