1 Corintios 2:14 - Kashibo-Kakataibo Biblia

¹⁴ An sinánmicëma uni an ca Nucën Papa Diosan Bëru Ñunshin Upitan sinánmicë ñu ꞌunanima. A ñucamax ca an iscëx ꞌusani ami cuaitisa ꞌicën. Unin ca a ñu ꞌunánti ꞌicën, Nucën Papa Diosan Bëru Ñunshin Upitan ꞌunánmicëxuinshi.

Nukën 'Ibu Diosan ain unikama 'inan ain bana

¹⁴ An sinánmicëma uni an ca Nucën Papa Diosan Bëru Ñunshin Upitan sinánmicë ñu 'unanima. A ñucamax ca an iscëx 'usani ami cuaitisa 'icën. Unin ca a ñu 'unánti 'icën, Nucën Papa Diosan Bëru Ñunshin Upitan 'unánmicëxuinshi.

1 Corintios 2:14 ပူးပေါင်းရင်းမြစ်များ

Mateo 16:23

Usaquin cacëx cuainacëquin ca Jesusan Pedro ñu caquin cacëxa: —Min camina ñunshin ꞌatimanën ꞌapu, Satanás, an sináncësa oquin sinanin. Usaquin sinánxunma ca ꞌat. Min camina ꞌë ñu ꞌatima ꞌamitisa tanin. ꞌËn Papa Dios cuëëncësabi oi ꞌiáxma ꞌëx ꞌinun quixun sinánquin camina unin sináncësa oquinshi sinanin.

Juan 10:20

Sinani ca ꞌitsa uni —ñunshin ꞌatimañu ca a uni ꞌicën, ca ñunshíanxa. ¿Uisa cupí caramina aín bana cuatin? —quiacëxa.

Juan 12:37

ꞌItsa oquin Jesusan uni itsin ꞌacëma ñu ꞌaia isquinbi ca judíos unicaman ax ca asérabi Cristo ꞌicë quixun sinánma ꞌicën.

Juan 14:17

Ax ca Nucën Papa Diosan Bëru Ñunshin Upí ꞌicën, an Nucën Papa Diosan sináncë ñucama ꞌunáncë, a. A ca an Nucën Papa Diosan bana sináncëma unin ui cara ax ꞌicë quixun ꞌunántima ꞌicën, ca a istima ꞌicën. Usa ꞌaish ca atux Nucën Papa Diosan Bëru Ñunshin Upíñu ꞌitima ꞌicën. Usa ꞌaínbi camina mitsun a ꞌunánti ꞌain, axa mitsunu ꞌianan xënibua ꞌaínbi mitsubë ꞌicë cupí.

Juan 14:26

Usa ꞌaínbi ca Nucën Papa Diosan ꞌë cupíshi aín Bëru Ñunshin Upí, an uni ꞌaquinti, xuti ꞌicën. Xucëxun ca an camabi ñu ꞌunánmianan ꞌën ñuixuncë banacama manutimoquin mitsu sinánmiti ꞌicën.

Juan 15:26

Unicamax ꞌëmi nishcë ꞌaínbi ca aín Bëru Ñunshin Upí, an Nucën Papa Diosan sináncë ñucama ꞌunánan uni ꞌaquincë, an uisa carana ꞌëx ꞌai quixun mitsu ꞌunánmiti ꞌicën. Ax ca an Nucën Papa Diosan sináncë ñucama ꞌunáncë, a ꞌicën. A cana Nucën Papa Dios cuëëncësabi oquin mitsubëa ꞌinun xuti ꞌain.

Juan 5:44

Nucën Papa Dios axëshi Dios ꞌixun mitsu upíoti cuëënima camina mitsúxbi upíonani rabiananti cuëënin. ¿Nucën Papa Diosan mitsu upí oti cuëëncëma ꞌaish caramina uisax ꞌëmi catamëti ꞌain? Camina ꞌitima ꞌain.

Juan 8:43

¿Uisa cupí caina mitsun ꞌën cacëxun cuatiman? Mitsúnbi cuaisama tanquin camina ꞌën, bana ñuixuncëxunbi cuatiman.

Hechos 16:14

A xanucama achúshi ca Lidia cacë ꞌiacëxa. Ax ca Tiatira ëmanu ꞌicë xanu ꞌianan, an chupa upí minanën pucucësa marucë ꞌiacëxa. Usa ꞌaish ca ami sinánquin Nucën Papa Dios rabicë ꞌiacëxa. Usa ꞌixuan Pablonën bana ñuia cuatia ca Nucën ꞌIbu Diosan Jesucristomi catamëtía ainan ꞌinun sinánmiacëxa.

Hechos 17:18

Cananmainun ca raíri unicama usa isa uni ꞌiti icë quixun epicúreo cacë unicaman bana ñuia cuacë, ꞌimainun estoico cacë unicamanribia bëtsi bana ñuia cuacë, a unicamaxribi uax Pablobë banacëxa. Abë banatancëx ca raírinëx quiacëxa: —¿Añu cara banañuira ꞌixun ënë unin nu ñuixuinsa tanin? Quicëbë ca raírinëx Pablonëan Jesús ñuianan —bama ꞌaish ca uni baísquiti ꞌicë —quixun cacëxun cuax quiacëxa: —Nun rabicë diosma, bëtsi dios ñui sapi ca quia.

Hechos 17:32

Usaquian bamatancëx ca Jesús baísquiacëxa quixun ñuia cuati ca uni raírinëx Pablomi cuaiacëxa. Cuaimainun ca raírinën Pablo cacëxa: —Minmi ñuicë bana ënëmi ñuitëcënia cananuna bëtsi nëtën cuatëcënti ꞌain.

Hechos 18:15

ꞌAínbi ca an mitsun cuati banaishi ñuixunquin, usai ca quia quixun ñuixunia. Usa ꞌain camina mitsúnbi mëníoti ꞌain. ꞌËn cana ënë ñu mitsu mëníoxuntima ꞌain.

Hechos 25:19

Quimabi ca ësai cuni quiaxa, nuxnu usai ꞌiti bana quicësabi oi ꞌima ꞌianan ca Pablonën, uni achúshi Jesús cacë, ax isa bamaxbi baísquiacëxa quixun ñuia quiax.

1 Corintios 1:18

Cristo ca unin ꞌucha cupí i curúsocënu bamacëxa quixun ñuicë bana a ca an Nucën Papa Dios cuëëncëma unicaman —a banax ca cëmë ꞌicë —quixun ñuiquin ꞌusania. Usa ꞌaínbi ca axa Nucën Papa Diosbë ꞌinux ië́ti unicaman a bana cuaquin, aín cushin ꞌimicëx cananuna nun ꞌuchacama tërë́ncë ꞌaish Nucën Papa Diosnan ꞌai quixun ꞌunania.

1 Corintios 1:21

Nucën Papa Diosan upí oquin sinánquin mëníosabi oi ca uni anbi aín sinanënbi sinani Nucën Papa Diosnan ꞌitima ꞌicën. Usa ꞌaínbi ca aín bana cuati ami catamëcë unicama ainan ꞌinun ꞌimia, raírinëxa —a bana ca ñancáishi ꞌicë —quicëbëtanbi.

1 Corintios 1:23

A unicamaxa usa ꞌaínbi cananuna nun i curúsocënu matáscë Cristo, a ñuiquin unicama bana ñuixunin. A bananu nun unicama ñuixuncëbë ca judíos unicamax rabini, uisa ꞌaish caraisa Cristo i curúsocënu bamati ꞌicë quixun sinani, ami catamëisama tania. Usaía judíos unicama ꞌimainun ca judíosma unicaman —Diosan Bëchicë ca i curúsocënuax bamacëxa —quixun ñuiquin ꞌusania.

1 Corintios 1:25

Nucën Papa Diosan Cristo i curúsocënuaxa bamanun ëncë, ax ca ꞌaisama ꞌicë uni quicëbëtanbi ca axa usai quicë unicaman sináncësamaira oquin sinánquin Nucën Papa Diosan Cristo nun ꞌucha cupí i curúsocënuax bamanun ëancëxa. —Ax cushima ꞌixun ca Diosan Jesucristo bamanun ëanxa —quixun sináncancëbëtanbi ca Nucën Papa Diosan unin cushisamaira ꞌixun ië́mitsinxunbi camabi unin ꞌucha cupía bamanun Cristo ꞌimiacëxa.

1 Corintios 15:44

Ënë menua tsócë unicamax ca aín nami, aín xo, acamax chëquiti ꞌicën. Usa ꞌaíshbi ca bama ꞌaish baísquitancëx aín nami, aín xo, acamax bëtsi ꞌaish chëquitima ꞌicën. Axa chëquiti nami, xo acamañu ꞌiá ꞌaíshbi ca axa chëquitima nami, xo, acamañu ꞌinuxun ꞌaia.

1 Corintios 15:46

Axa chëquitima namiñu pain ca uni ꞌitima ꞌicën. Axa chëquiti namiñu pain ꞌitancëx ca uni axa chëquitima namiñu ꞌiti ꞌicën.

1 Corintios 2:12

Nucën Papa Diosan ca nu axa Jesucristomi sináncëma unían sináncësaribi oquin sinánun ꞌimicëma ꞌicën. Ama, uisaira oquin cara an nu ꞌimiti ꞌicë quixun nun ꞌunánun ca Nucën Papa Diosan aín Bëru Ñunshin Upí nubë ꞌinun nu ꞌinánxa.

1 Corintios 3:1

ꞌËn xucë́antu, ëx mibë ꞌixun cana axa aín Bëru Ñunshin Upitan sinánmicëx upiti Nucën Papa Diosmi catamëcë unicama ꞌunánmicësa oquin mitsu ꞌunánmiama ꞌain. Ama, an ënë menu ꞌicë ñuishi sinánquin ëncëma pan unisa ꞌicë cana mitsu ꞌunánmiacën, bërími Cristo ꞌunáncë ꞌicë.

Santiago 3:15

Usaquin sináncë unix ca Nucën Papa Diosan sinánmicëma ꞌicën. Ax ca an ënë menu ꞌicë ñuishi sináncë unin sináncësa ꞌicën. Ñunshin ꞌatimanën sinánmicë ca usa uni ꞌicën.

1 Juan 2:20

Usa ꞌaínbia Cristo cupí Nucën Papa Diosan Bëru Ñunshin Upí mitsubë ꞌain camina ꞌunanin, atúan Jesucristo ꞌatimaquin ñuicë banacamax ca cëmë ꞌicë quixun.

1 Juan 2:27

Atúxa usa ꞌaínbi ca Jesucristonën aín Bëru Ñunshin Upí mitsubëa ꞌinun ꞌináncë, ax mitsubë ꞌixun uni itsían ꞌunánmiamabi an mitsu ꞌunánmia. An mitsu ꞌunánmicë ñux ca asérabi ꞌaish cëmëma ꞌicën. Usa ꞌain camina aín Bëru Ñunshin Upitan ꞌunánmiquin sinánmicësabi oi camabi nëtën Cristobë ꞌiti ꞌain.

1 Juan 5:20

ꞌUnánan cananuna ësaquinribi ꞌunanin, aín Bëchicënën ca ënë menu ax uá ꞌaínu ami catamëtia uisa cara Nucën Papa Dios, axëshia asérabi Dios, ax ꞌicë quixun nu ꞌunánmia. Aín Bëchicë, Jesucristo, ax nubë ꞌain cananuna an ꞌaquincëx ax cuëëncësabi oi tsotin. Ax ca axëshi asérabi Dios ꞌaínu nux ainan ꞌaish abë xënibua ꞌaínbi ꞌiti a ꞌicën.

Judas 1:19

Usa unicamax ca an ënë nëtënuxun aín cuëëncësa oquin ñu ꞌatishi sináncë a ꞌicën. A unicaman ca uni raírimia nishnun quixun unicama sinanamia. Nucën Papa Diosan Bëru Ñunshin Upitan sinánmicëma ca atux ꞌicën.