1 Corintios 13:2 - Kashibo-Kakataibo Biblia

² ꞌËn Nucën Papa Diosan a sinánmicë ñu ñuiquin unicama ñuixuanan, camabi ñu ꞌunánquin uni itsin ꞌunáncëma ñuribi ꞌunánan, —Nucën Papa Diosan ca ꞌë ꞌaquinti ꞌicë —quixun sinánquin aín cushin aín bashibi amanu tacuiabi, ca uni itsi nuibaquin ꞌacëma ꞌicë Nucën Papa Diosan ꞌë upí isima.

Nukën 'Ibu Diosan ain unikama 'inan ain bana

² 'Ën Nucën Papa Diosan a sinánmicë ñu ñuiquin unicama ñuixuanan, camabi ñu 'unánquin uni itsin 'unáncëma ñuribi 'unánan, —Nucën Papa Diosan ca 'ë 'aquinti 'icë —quixun sinánquin aín cushin aín bashibi amanu tacuiabi, ca uni itsi nuibaquin 'acëma 'icë Nucën Papa Diosan 'ë upí isima.

1 Corintios 13:2 ပူးပေါင်းရင်းမြစ်များ

Mateo 13:11

Ñucácëxun ca cacëxa: —Uni itsían ꞌunaniamabi camina mitsun Nucën Papa Diosan sinánmicëxun an ꞌunánmicë ñu ꞌunanin. Usa ꞌaínbi ca raíri unin ꞌunanima.

Mateo 17:20

Cacëxun ca Jesusan cacëxa: —Mitsun camina uisaira cushi cara Nucën Papa Diosan cushi icë quixun sinaniman. Mostaza bëru ax ca chamaratsu ꞌicën. Asaribi ꞌaish ꞌitsamaratsushi Nucën Papa Diosmi sináncë ꞌixun, Ënë ñu cana ꞌatima ꞌai, quixun sinánquinbi asérabi ami catamëquin ñucáquin camina uisa ñu caramina ꞌaisa tani a ꞌati ꞌain. Mitsux ami ꞌitsamashi catamëcë ꞌixunbimi ënë matá, Ënuax ca ꞌuri tacút, cacëx ca ꞌuri tacúti ꞌicën.

Mateo 21:19

Pananquiani cuanquin ca higuera cacë i, bai cuëbí nicë, isbiani anu cuanquinbi tuáñuma ꞌaísha aín pëchishi ocëxa. Usa ꞌicë isquin ca Jesusan cacëxa: —Min camina tuatëcëntima ꞌain. Usaquian cacëxëshi ca higuera i chushi xanáncëxa.

Mateo 21:21

Cacëxun ca Jesusan cacëxa: —ꞌËn cana asérabi mitsu cain, Nucën Papa Diosax ca cushiira ꞌianan ca ax quicësabi oquin ꞌaia quixun ꞌunáncë ꞌixun camina —ca ꞌatima ꞌicë —quixun sinánquinma —ca asérabi ꞌati ꞌicë —quixun sinánti ꞌain. Usaquin sináncë ꞌixunmi ꞌën ënë higuera ꞌacësoquinshi ñu ꞌaquinma ënë matáribi “ënuax ca parúmpapanu racati cuantan” quixun cacëx ca usai ꞌiti ꞌicën.

Hechos 13:1

Antioquíanu ꞌicë axa Jesucristomi catamëcë unicama raírinëx ca an Nucën Papa Diosan sinánmicëxun bana uni ñuixuncë uni ꞌiacëxa, raírinëx ca an aín bana unicama ꞌunánmicë ꞌiacëxa. Usa ꞌain ca Bernabé ꞌimainun Simeón ꞌicëbi Tunan Uni caquinribi anëcë, a ꞌimainun Cirene menu ꞌicë uni, Lucio, a ꞌimainun Manaén, axa Galilea menu ꞌicë ꞌapu Herodes, abë canicë, a ꞌimainun Saulo, acamax Antioquíanu ꞌiacëxa.

Romanos 11:25

ꞌËn xucë́antu, mitsux judíosma uni ꞌixun —nux cananuna judíos unían ꞌacësamaira oquin Cristomi catamëquin Nucën Papa Diosan aín unicama ꞌunánmiti ñu ꞌunáncë ꞌai —qui rabíaxma ꞌinun quixun cana ësaquin unin ꞌunáncëma ñu a ñuiquin mitsu cain: Judíosma unibu uicama cara Cristomi catamëti ꞌicë acamax pain ami catamëtamainun ca Nucën Papa Diosan judíos unicama aín patsan Jesucristomi catamëcëma ꞌaish usabi ꞌinun ëanxa.

Romanos 15:14

ꞌËn xucë́antu, ꞌën cana ꞌunanin, mitsun camina bëtsibë bëtsibë nuibanani ꞌaquiananquin Nucën Papa Diosan bana Cristonën ñuicë a upí oquin ꞌunanin. ꞌUnánan camina ami cushicë ꞌinux raíri unibë ꞌësëanánti ꞌunanin.

Romanos 16:25

Cananuna Nucën Papa Dios asérabi rabiti ꞌain. Mitsux ainan ꞌaish Jesucristomi catamëtia ca an mitsu upíira upiti ami sinánun mitsu cushioti ꞌicën. Usoquin ca ꞌati ꞌicë quixun ca aín unicaman mitsu ꞌunánmiaxa. ꞌËnribi cana usoquin unicama ñuixunin. Ënë mecama uniocëma pain ꞌixun ca Nucën Papa Diosan, usai ca Jesucristo ꞌiti ꞌicë quixun sináncëxa. A ñucama unin ꞌunánma ꞌaínbi ca bërí Jesucristo ucë cupí unin ꞌunánti ꞌicën.

1 Corintios 11:4

Axa Jesucristomi catamëcë unicama timë́cëbëtan ca nucë bënë unin Nucën Papa Diosbë banaquin aín mañuti mañutima ꞌicën. Usaribi oquin ca Nucën Papa Diosan sinánmicë bana uni ñuixunquin aín mañuti mañutima ꞌicën. Usoquian unin aín mañuti mañucëx ca ꞌaisama ꞌiti ꞌicën.

1 Corintios 12:28

Nucën Papa Diosan mëníosabi oquin ca axa Jesucristomi catamëcë unicaman bëtsi bëtsi ñu ꞌaia. Raíri unix ca aín bana ñuixunuan Jesucristonën caíscë ꞌia. Raíri unin ca Nucën Papa Dios quicë bana unicama ñuixunia. Raíri unin ca axa Jesúsmi catamëcë unicama aín bana ꞌunánmia. Raíri unin ca uni itsin ꞌacëma ñu ꞌaia. Raíri unínribi ca uni ñucë pëxcuia, raíri unin ca unicama ꞌaquinia, raíri unix ca Nucën Papa Diosan bana cuatia timë́cë unicama aín cushi ꞌia, raíri uníxribi ca Nucën Papa Dios rabi unían cuatima banan banaia.

1 Corintios 13:1

ꞌËx bëtsi bëtsi banan bananan anun ángel banacë banánribi banacëxbi ca uni nuibacëma ꞌaish ꞌën bana rata tancácësa ñancáishi ꞌicën.

1 Corintios 13:3

ꞌËn ñucama ñuñuma uni ꞌinánan upí ñu ꞌacë cupí bëtsi unin nëëncëx bamaiabi ca uni nuibati ꞌicëma ꞌicë, Nucën Papa Diosan ꞌë upí isima.

1 Corintios 13:8

Ënë nëtëcama cëñúcëbëtan camaxunbi a ꞌunáncë cupí ca uinu ꞌicë unínbi Nucën Papa Dios quicë bana unicama ñuixuntëcëntima ꞌicën, uinu ꞌicë uníxbi ca Nucën Papa Dios rabi unin cuatima banan banatima ꞌicën, unían bëtsi uni ꞌunánmiti ca ꞌaíma ꞌiti ꞌicën. Usai ꞌiti a ꞌaíma ꞌaínbi ca nux nuibananti ax cëñutima, bamatancëxribi cananuna Nucën Papa Diosan nëtënu ꞌaish anuaxribi bëtsibë nuibananti ꞌain.

1 Corintios 14:29

Usaribi oquin camina Nucën Papa Diosan sinánmicëxun aín bana ñuixuinsa tanquin rabë́xuinshi unicama ñuixunti ꞌain. Ñuixuanan camina rabë́ ꞌimainun achúshixuinshi ñuixunti ꞌain. Ñuixunia camina raírinën —a unin banax cara asérabi Nucën Papa Diosan sinánmicëxa quicë ꞌicë —quixun cuati ꞌain.

1 Corintios 14:39

ꞌËn xucë́antu, cana mitsu cain, an Nucën Papa Diosan sinánmicëxun aín bana uni ñuixuncë ꞌiti camina sinánti ꞌain. Usa ꞌixunbi camina Nucën Papa Dios rabia unin cuacëma banan banaxma ꞌinun uni catima ꞌain.

1 Corintios 14:4

Axa Nucën Papa Dios rabi unin cuacëma banan banacë uni ax ca axbi Jesucristo upiti sinania. Usa ꞌaínbi ca an Nucën Papa Diosan sinánmicëxun aín bana unicama ñuixuncë uni an axa Jesucristomi catamëcë unicaman ami catamëquin an cacësabi oquin ꞌanun ꞌunánmia.

1 Corintios 15:51

Unin ꞌunánma ñu cana mitsúnmi ꞌunánun quixun ësaquin ñuin, camáxira cananuna bamatima ꞌain. Bamacëma ꞌaíshbi cananuna camáxbi bëtsi ꞌiti ꞌain.

1 Corintios 16:22

Ui unin cara Nucën ꞌIbu Jesucristo sinaníma ax ca Nucën Papa Diosan iscëx ꞌaisama ꞌicën. Nucën ꞌIbu Jesucristo axa uti cana ꞌëx cuëënin.

1 Corintios 4:1

Mitsun camina ꞌunánti ꞌain, nux cananuna an ꞌamicëxun Cristomi catamënun unicama aín bana ñuixuncëishi ꞌain. Usa ꞌaish cananuna unían ꞌunánma ꞌicëbi, usai Cristomi catamëti ca uni ainan ꞌinux ië́ti ꞌicë quixuan Nucën Papa Diosan sinan bana, a uni ñuinun ꞌimicë ꞌain.

1 Corintios 7:19

ꞌUnánti oracacë ꞌianan ꞌunánti oracacëma ꞌixunbia aín bana quicësabi oquin ꞌaia cuni ca Nucën Papa Diosan uni upí isia.

1 Corintios 8:4

Unínbi ꞌacë ñu rabiquin ñuina rëcë aín nami piti cara asábi ꞌicë quixunmi ꞌë ñucácë bana a ñuiquin cana ësaquin mitsu cain. Cananuna ꞌunan, unin ꞌacë ñu ax ca ñuishi uniocë ꞌaish asérabi diosma ꞌicën. Nucën Papa Dios ax ca achúshi ꞌicën, bëtsi dios ca ꞌaíma ꞌicën.

2 Corintios 12:11

Mitsúnmi ꞌë rabicëma cupí cana sinánñuma uni banacësari rabiacan. Mitsúxira ꞌë rabi upiti banatisa ꞌixunbi camina —Pablosamaira ꞌaish ca an Pablo ñuicë unicama ënëx Nucën Papa Diosan uni ꞌicë —quixun sinánan ꞌën bana isa ñancáishi ꞌicë quixun sinánquin a unicaman mitsu ñuixuncë bana cuacanin. Usaquinmi mitsun sináncëbëbi cana ꞌëx a unicama meuma ꞌain, ꞌënbi ꞌaquinma, Nucën Papa Diosan aín cushin ꞌamicëxuinshi ꞌën ꞌacë cupí.

Gálatas 5:16

ꞌËn cana mitsu cain, mitsux cuëëncësabi oquin ñu ꞌatima ꞌaquinma camina Nucën Papa Diosan Bëru Ñunshin Upitan sinánmicësa oquinshi sinánquin ñu ꞌati ꞌain.

Gálatas 5:22

Usa ꞌaínbi ca Nucën Papa Diosan Bëru Ñunshin Upitan sinánmicëxuan an sináncë uni ax ësai ꞌia: unicama nuibacë, chuámarua ꞌaish cuëëncë, uisa ñu cara ꞌicëbëbi chuámarua ꞌaish bënë́cëma, an ꞌatimocëxunbi uni cupicëma, cuëmëninínshi banacë, upí nuituñu, ꞌimainun Jesucristomi upiti catamëcë,

Gálatas 6:3

Ui unin cara asérabi upí ꞌixunmabi ax isa upí uni ꞌicë quixun sinania, ax ca aín sinanëinshi cëmëia.

Efesios 3:4

ꞌËn mitsu buánminuxun cuënëocë bana ënë isquin camina ꞌunánti ꞌain, ꞌën cana uisai quicë cara Cristo ñui quicë bana ꞌicë ꞌunani quixun.

Efesios 6:19

Ñucáxuanan camina aín bana unicama racuë́quinma ñuixunuan uisoquin carana ñuixunti ꞌai quixun ꞌë sinánminun Nucën Papa Dios ꞌë ñucáxunti ꞌain, Cristo ñui quicë bana a bëráma unin upí oquin ꞌunánma ꞌicëbi bërí unin ꞌunánun.

Colosenses 1:26

Uínsaran nëtë́nbi uinu ꞌicë unínbi a bana ꞌunánma ꞌicëbi ca bërí aín unicama, an iscë́xa upí ꞌicë, Nucën Papa Diosan ꞌunánmia.

1 Timoteo 3:16

Asérabia unin ꞌunáncëma ñu Nucën Papa Diosan aín unicamaishi ꞌunánmicë ꞌain ca nun ñuicë bana ënëx asérabi ꞌicën: Jesucristo ax ca Diosribi ꞌaish ënë menuax uni ꞌiacëxa. Jesucristonën ca aín nuitu upí ꞌixun upí ñuishi ꞌaia quixun ca Nucën Papa Diosan Bëru Ñunshin Upitan unicama sinánmiacëxa. ꞌImainun ca Jesucristonëx ángelnënribia iscë ꞌiacëxa. Usa ꞌain ca a ñuiquin aín unicaman camabi menuxun uni ꞌunánmia. A ñuicë banax ca asérabi ꞌicë quixun sinani ca camabi menuax, uni ami catamëtia. Usa ꞌaish ca ënë menu ꞌitancëx aín Papabë ꞌi aín nëtënu cuancëxa.

1 Juan 4:8

Nucën Papa Dios ax ca an unicama nuibairacë a ꞌicën. Usa ꞌain ca an bëtsi uni nuibacëma uni ax Nucën Papa Dios ꞌunáncëma ꞌicën.