Apocalipsis 19:9 - Nukën 'Ibu Diosan ain unikama 'inan ain bana

⁹ Usai quicëbëtan ca ángelnën 'ë caxa: —Ësaquinribi ca cuënëot: “Uicamax cara Carnero 'icësaribitia unin 'ucha cupí bama, anúan aín unicama abë 'iti nëtë́an abë 'inun camicë 'icë, acamax ca cuëëinra cuëënti 'icën, unían xanu biquin abëtan pi unun camicë unicamax cuëëncësamaira oi”. Ësaquinribi ca 'ë caxa: —Ënë bana a 'ën mi cacë ax ca Nucën Papa Diosaxa quicë 'icën. Ca asérabi 'icën.

Kashibo-Kakataibo Biblia

⁹ Usai quicëbëtan ca ángelnën ꞌë caxa: —Ësaquinribi ca cuënëot: “Uicamax cara Carnero ꞌicësaribitia unin ꞌucha cupí bama, anúan aín unicama abë ꞌiti nëtë́an abë ꞌinun camicë ꞌicë, acamax ca cuëëinra cuëënti ꞌicën, unían xanu biquin abëtan pi unun camicë unicamax cuëëncësamaira oi”. Ësaquinribi ca ꞌë caxa: —Ënë bana a ꞌën mi cacë ax ca Nucën Papa Diosaxa quicë ꞌicën. Ca asérabi ꞌicën.

Apocalipsis 19:9 ပူးပေါင်းရင်းမြစ်များ

1 Timoteo 1:15

Ënë banax ca asérabi 'icën. Usa 'ain ca camabi unin —asérabi ca —quixun 'unánti 'icën: Camabi uni aín ñu 'aisama 'acë cupía tëmërati 'icëbi Nucën Papa Diosnan 'inun ië́minux ca Cristo Jesús ënë menu uacëxa. Uni itsi 'icësamairai 'uchacë 'icëbi ca ainan 'inun 'ë ië́miacëxa.

1 Timoteo 4:9

Usai ca 'iti 'icë quicë banax ca asérabi 'icën. Usa ca quixun ca camabi unin upí oquin 'unánti 'icën.

2 Timoteo 2:11

Ësaía quicë bana ënëx ca asérabi 'icën: Nun 'uchacama ëni Cristobë bamacësa 'itancëx abë baísquicësa 'aish cananuna abë 'iti 'ain.

Tito 3:8

Ënë banacamax ca asérabi upí 'icën. Usa 'aían ax quicësabi oi camabi uni 'iti ca asábiira 'icën. Usa 'ain camina axa ami catamëcë unicama Nucën Papa Dios cuëëncësabi oi 'iquian ënquinma ñu upíshi 'anun upí oquin 'ësëti 'ain.

Apocalipsis 1:1

Nucën Papa Diosan ca ënë quiricanu cuënëocë ñucama Jesucristo ismiaxa, xënibuiracëma 'aínshi ca ësai 'iti 'icë quixuan aín unicama isminun. Nucën Papa Diosan a ismicë ñucama aín unicaman 'unánun ca Jesucristonën aín ángel achúshi Juan isminun xuaxa.

Apocalipsis 1:19

A min iscë ñucama 'imainun a min isti ñucama, acama camina usai ca 'ia quixun ñuianan usai ca 'icëma 'aíshbi ñu 'iti 'icë quixun cuënëoti 'ain.

Apocalipsis 10:4

Caná banacëbëtan a banacama cuënëoti 'ixunbi cana naínuaxa ësai banaia cuan: —Canacaxa quicëcama camina uisai quicë cara quixun unin 'unánun cuënëotima 'ain.

Apocalipsis 14:13

Usai ángel banaia cuatancëxun cana naínuaxa ësaquin 'ë cai banaia cuan: —Ënë bana ca cuënëot: Ax Nucën 'Ibu Jesucristomi catamëcë unicamax ca bamatancëx chuámarua tani cuëënti 'icën. Naínuaxa banai quicësaribi oi ca Nucën Papa Diosan Bëru Ñunshin Upí ësai quia: Usa unicaman ca bamatancëxun tëmëratëcënquin paë tantëcëntima 'icën. Añu ñucama cara Jesucristonan 'ixun a 'axuanxa, acama ca Nucën Papa Diosan manuquinma sinania. Usa 'ain ca a unicama chuámarua tani cuëënti 'icën.

Apocalipsis 17:1

Usai 'icëbëtan ca xanpañu mëcën achúshi 'imainun rabë́ ángelcama, a achúshinëx 'ënu uquin, xanu ñuicësoquinbi Babilonia ñuiquin ësaquin 'ë caxa: —'Aisama 'aish ca Babilonia ëmanu 'icë unicamax ënë xanusa 'icën. Ca ut. Mi cana xanu 'atima, axa parúnpapa camánan tsócë, a cara aín 'ucha cupí uisoquin Nucën Papa Diosan castícanti 'icë quixun mi ismiti 'ain.

Apocalipsis 17:17

Usaía 'inun ca Nucën Papa Diosan a mëcën rabë́ 'apucama bëtsin sináncësaribi oquían sinánun 'imiaxa. Nucën Papa Diosan 'imicëxun ca atun, anua a xanu tsócë ñuinacan'ëon cacësabi oquin 'anan atúan 'ibuacë unicama usaribi oquin 'anun 'amiaxa. Aín banacama sënë́ntamainun usai 'inun ca Nucën Papa Diosan 'imiaxa.

Apocalipsis 2:1

Catancëxun ca ësaquinribi 'ë caxa: —An axa Efesonuax 'ëmi catamëcë unicama 'ë ñui quicë bana ñuixuncë uni, a buánminuxun camina ësoquin cuënëoti 'ain: An aín mëcën mëqueu 'icë anun mëcën achúshi 'imainun rabë́ 'ispa tuíncë 'ianan axa mëcën achúshi 'imainun rabë́ anu lamparín nanti nëbë́tsi nicë, Jesús, an ca anuaxa timë́cë unicamami ësaquin a caxúnun quixun mi caia:

Apocalipsis 2:12

Usaquin catancëxun ca ësaquinribi cuënëonun Jesusan 'ë caxa: —An axa Pérgamonuax 'ëmi catamëcë unicama 'ë ñui quicë bana ñuixuncë uni, a buánminuxun camina ësoquin cuënëoti 'ain: Axa machitusa manë xëtocë amo rabë́bi cuënucëñu an ca ësaquin mi caia:

Apocalipsis 2:18

Usaquin catancëxun ca ësaquinribi cuënëonun Jesusan 'ë caxa: —An axa Tiatíranuax 'ëmi catamëcë unicama 'ë ñui quicë bana ñuixuncë uni, a buánminuxun camina ësoquin cuënëoti 'ain: Nucën Papa Diosan Bëchicë, axa cushiira 'aish aín bëru rabë́ tsi rëquirucë ënxáira iscësa 'ianan aín taëx cashtá manë́xa niba nibaquicë 'aish ichúcësa, an ca ësaquin mi caia:

Apocalipsis 2:8

Usaquin catancëxun ca ësaquinribi cuënëonun 'ë caxa: —An axa Esmiranuax 'ëmi catamëcë unicama 'ë ñui quicë bana ñuixuncë uni, a buánminuxun camina ësoquin cuënëoti 'ain: Axa ñu 'aíma pan 'ain 'iá 'aish camabi ñu cëñúcëbë usabi 'iti, axa bamaxbi bamatëcëntimoi baísquicë, Jesús, an ca ësaquin mi caia:

Apocalipsis 21:5

A bana 'ën cuacëbë ca Nucën Papa Dios, axa anu 'Apuira 'aish tsócë, ax ësai quiaxa: —Camina 'unánti 'ain, cana camabi ñu ió 'inun 'atëcënin. Quianan ca ësairibi quiaxa: —'Ëx quicësabi oi ca asérabi 'iti 'icën. Usa 'ain camina 'ëx quicë banacama ënë cuënëoti 'ain.

Apocalipsis 22:6

Ismitancëxun ca a ángelnën 'ë caxa: —'Ën mi cacësabi oi ca asérabi 'iti 'icën. Nucën 'Ibu Dios, an ax quicë bana uni ñuixuncë unicama sinánmicë, an ca uisai cara xënibucëma 'aínshi ñu 'iti 'icë quixuan, aín unicaman 'unánun, aín ángel xuaxa.

Apocalipsis 3:1

Usaquin catancëxun ca ësaquinribi cuënëonun Jesusan 'ë caxa: —An axa Sardisnuax 'ëmi catamëcë unicama 'ë ñui quicë bana ñuixuncë uni, a buánminuxun camina ësoquin cuënëoti 'ain: Axa Nucën Papa Diosan Bëru Ñunshin Upíñu 'ianan an aín mëcënan 'ispa mëcën achúshi 'imainun rabë́ tuíncë, an ca ësaquin mi caia: —Mitsúnmi ñu 'acëcama cana 'unanin. Unin ca mitsux camina Nucën Papa Diosbë upí 'ai quixun ñuia. Ñuicëxbi camina usama 'aish bamacë unisa 'ain.

Apocalipsis 3:14

Usaquin catancëxun ca ësaquinribi cuënëonun Jesusan 'ë caxa: —Axa Laodiceanuax 'ëmi catamëcë unicama an Nucën Papa Diosan bana ñuixuncë, a buánminuxun camina ësoquin cuënëoti 'ain: Ax upíira upí 'ixuan uisa cara Nucën Papa Dios 'icë quixun paránquinma uni 'unánmicë, an Nucën Papa Diosbëtan camabi ñu unio, an ca ësaquin mi caia:

Apocalipsis 3:20

Ënëx ca ësa 'icën. Bëtsi uni isi cuanxun ca unin aín xëpúti taxcaquin a xëocaxunun quixun caia. An aín xëpúti taxcaquin uni itsi cuëncë uni usaribi cana 'ëx 'ain. A unisaribi 'ixun cana ui unin cara 'ëmi sinánquin 'ëx abë 'inun 'ë caia a unibë 'iti 'ain. Usai 'iquin cana unían abëtan piquin uni itsi 'unáncësaribi oquian 'ë 'unánun a uni 'imiti 'ain.

Apocalipsis 3:7

Usaquin catancëxun ca ësaquinribi cuënëonun Jesusan 'ë caxa: —An axa Filadelfianuax 'ëmi catamëcë unicama 'ë ñui quicë bana ñuixuncë uni, a buánminuxun camina ësoquin cuënëoti 'ain: A aín chaitiocë David 'iásaribi 'Apu 'inun Nucën Papa Diosan 'imicë, Jesús, axa 'uchañuma 'aish aín bana asérabi 'ice, ax ca an xëcuë bërúancë unisaribi 'icën. An xëcuë bërúancë 'ixuan an xëocaia ca uinu 'icë unínbi xëcuë xëputima 'icën. 'Imainun ca an xëpuia uinu 'icë unínbi xëcuë xëocatima 'icën. Usaribi oquin ca ui unix cara ainan 'iti 'icë, ui unin cara aín bana unicama ñuixunti 'icë, acama ainshi mëníoia. Usoquian an mëníocë 'ain ca uinu 'icë unínbi —usama ca —catima 'icën. Ax usa 'ixun ca ësaquin mi caia: