Filipos 4:5 - El Nuevo Testamento

⁵ Manda sabe con todo el maga gente que bien amable ustedes, cay cerca ya gayot llega el Señor.

Filipos 4:5 ပူးပေါင်းရင်းမြစ်များ

Mateo 6:25

“Poreso ta habla yo, no man lingasa acerca del di ustedes vida si cosa ustedes ay come y toma, y no man lingasa por causa del di ustedes cuerpo si cosa ay visti. El di ustedes vida mas importante que con el comida, hende ba? Y el di ustedes cuerpo mas importante que con el ropa.

Mateo 6:34

Poreso no ustedes man lingasa acerca de cosa ay pasa mañana, cay el problema de un dia husto ya para ese dia.

Lucas 21:34

“Tene ustedes cuidao, no queda tragon o queda borracho, y no ocupa el pensamiento para man lingasa que manera ay vivi este vida, cay si ta hace ustedes ansina derrepente lang ay llega aquel dia ay vene ole el Hijo del Hombre, y ustedes pati el maga otro gente aqui na mundo ay queda cujido como un animal que ya cuji na trampa.

1 Corinto 16:22

Si quien nuay amor para con el Señor, el maldicion de Dios ay cae con ele! El di aton Señor ay vene ya ole!

1 Corinto 6:7

Que bien claro gayot mira que ustedes nuay victoria alli na grupo de creyente si ta lleva ustedes ese maga disgusto na corte! Tiene pa honor entre ustedes si ta aguanta lang el maga maltrato y el maga robo que ta hace con ustedes.

1 Corinto 8:13

Poreso, si para conmigo, si el comida ta causa peca con un hermano na fe, hende na yo ay come carne, para hende yo ay causa con un hermano quien debil pa na fe para cae na tentacion.

1 Corinto 9:25

Y todo el maga atleta quien ay competi na juego necesita pasa anay donde ta condiciona y ta diciplina el di ila maga cuerpo. Tiene di ila ta sacrifica muchas cosas que quiere sila, para puede sila gana na juego. Ta hace sila ese para gana sila un premio hende permanente, pero kita ta hace el di aton trabajo para con el Señor para puede kita gana un premio eterna.

2 Corinto 10:1

Yo, si Pablo, personalmente ta roga con ustedes, cay quiere yo sigui el ejemplo del amable corazon y del buen deseo para ayuda con otros que ya dale canaton si Jesucristo. Pero sabe yo que tiene di ustedes ta habla pa, “Este si Pablo, si taqui junto canamon, bien humilde le, pero si lejos canamon, el di suyo maga carta ta morde gayot canamon como si fuera valiente le.”

2 Tesalonica 2:2

que no queda dayun trambulicao, ni queda dayun asustao, si ta oi ustedes que el Dia del Señor ya llega ya. Hende verdad ′se! Basi ya oi ustedes con un gente quien ta habla que ele tiene dao mensaje de Dios, o con algunos quien ta predica acerca de ese llegada, o masquin quien alli ta habla que tiene dao carta ya sale canamon.

Tito 3:2

No debe sila malhabla contra el reputacion de ningunos, y no debe tene pleito, sino siempre man amable, y debe tamen tene respeto para con todo el maga gente.

Hebreo 10:25

Y no descansa de ajuntar con el maga otro creyente como otros ta hace, pero dale kita animo con uno y otro, especialmente cay cerca ya el dia cuando el Señor ay bira otra vez.

Hebreo 10:37

Cay ta habla le na Sagrada Escritura: “Hende na ay tarda ay llega ya gayot el persona con quien kita ta espera y hende le ta man duluk.

1 Pedro 1:11

Despues el Espiritu di Jesucristo ya manda sabe con el maga profeta de antes pa gayot el cosa si Jesucristo ay sufri, y ya manda sabe tamen acerca del resplandor di suyo que ay llega si ay volve le na cielo. Entonces ya precura gayot sila aberigua si cuando ese ay sucede, y si quien ba ese gente ay sufri, y si paquemodo ese cosa ay vene.

1 Pedro 4:7

Cerca ya el fin del mundo. Poreso tene ustedes pensamiento claro y esta alerto, para puede ustedes reza.

El Revelacion 22:20

Ele quien ta declara con este maga suceso ta habla, “Deporsi hende na ay tarda ay vene yo otra vez!” Amen. Vene pronto, Señor Jesucristo!

El Revelacion 22:7

Ya habla si Jesucristo, “Visia enbuenamente! Hende ay tarda ay vene yo otra vez. Bendicido el persona quien ay obedece el maga palabra del profecia de este libro!”