1 Corinto 9:18 - El Nuevo Testamento

¹⁸ Y entonces, cosa man el recompensa para conmigo? El recompensa amo el satisfaccion ta sinti yo si ta predica yo el Buen Noticia sin pagar conmigo ningunos. Cay ta hace yo este trabajo sin pago, y hende yo ta usa el derecho que tiene yo para recibi mantencion si ta predica yo el Buen Noticia.

1 Corinto 9:18 ပူးပေါင်းရင်းမြစ်များ

Juan 4:36

El quien ta corta con el maga frutas ta recibi el pago, y este fruta ta representa el maga alma quien ay vivi hasta para cuando. Despues aquel quien ta sembra pati el quien ta corta, ay puede tene alegria junto.

Maga Apostoles 18:3

Ya queda le alla y ya trabaja le junto con ese maridable cay el busca vida di suyo ta hace lang tolda igual como ta hace esos.

Roma 14:15

Si ta causa ustedes estorbo na conciencia del otro maga hermano por causa del comida que ta come ustedes, entonces ustedes ta dale mira que nuay ustedes el amor de Dios para canila. Poreso no debe ustedes destrosa el fe del di ustedes hermano por causa de comer el cosa prohibido para con ele, cay el Cristo ya muri tamen para con ele.

1 Corinto 10:33

Ese man yo el ta hace para proba yo satisface con todo el maga gente. Hace lang ustedes como ta hace yo, cay hende man yo ta pensa para el di mio lang bien, sino para el bien del maga otro gente, para mucho di ila ay tene salvacion.

1 Corinto 3:8

Nuay man diferencia na importancia entre el gente quien ta sembra y el gente quien ta rega, y Dios ay dale cada uno di ila el pago conforme el di ila trabajo.

1 Corinto 7:31

Y para con aquellos quien ta negocia cosas de este mundo, sila hende debe vivi lang para este tiempo de ganancia, cay temporario lang man este mundo y todo ese maga cosas.

1 Corinto 8:9

Pero ustedes maga creyente, tene cuidao para no queda el di ustedes libertad un causa para man landuk na pecado el maga hermano quien ta falta pa fe.

1 Corinto 9:12

Si ta puede gane ustedes otorga mantene con otro maga maestro, entonces came tamen mas tiene el derecho espera cosas material con ustedes, cay came ya predica una el Buen Noticia con ustedes. Pero came nuay usa este derecho para pidi con ustedes. Al contrario, ya aguanta came todo el lisut con paciencia, para nuay cosas ay sangga de hacer calayat el Buen Noticia di Jesucristo.

1 Corinto 9:15

Pero nuay yo usa ni uno de ese maga derecho que tiene yo para pidi mantencion. Ni hende gane yo ta escribi este carta para usa yo ahora ese maga derecho. Mas mejor yo muri de hambre en vez de pidir mantencion con ustedes, cay alegre gayot yo predica el Buen Noticia sin pidir pago.

1 Corinto 9:17

Si yo ta ofrece para hace este trabajo, entonces ta merece yo tene pago. Pero nuay man yo ofrece hace este, sino este un responsabilidad que el Señor ya dale conmigo.

2 Corinto 4:5

Hende gane came ta predica acerca di amon mismo, sino ta predica came acerca di Jesucristo el Señor. Y came maga servidor lang di ustedes por amor di Jesucristo.

1 Tesalonica 2:6

Nuay gane came precura saca honra con el maga gente, masquin con ustedes y ni con ningunos.