Lucas 24:41 - Dios Chani

⁴¹ Jatsi ja ranicaniquë ra. Jari shinati pi ja cahëyamacani quiha. Ja ratëcaniquë. Jatsi, —¿Jahuë ya ni mato piti? —i jato qui Jesu niquë.

Lucas 24:41 ပူးပေါင်းရင်းမြစ်များ

Marcos 16:11

Ja yoaha ca nicaxo tsi ja chahahuayamacaniquë pë. Jatsi, —Bëso xo Jesu ra. Jisquë ëa ra —i jato qui ja niquë.

Marcos 16:13

Jato xobo qui cahëxo tsi quiha Jesu ja jiscana ca ja yoacaniquë huëtsa bo qui. Jama, ja yoacana ca ja chahahuayamacaniquë pë.

Marcos 16:14

Jarohari tsi quiha jahuë rabëti yoi bo oriquino tsi jato qui Jesu jisiquiniquë. Jisiquixo tsi quiha jato ja raahaniquë. Quëstoria ca chahahuatimaxëni ja icani quiha. Jabi bëso Jesu iqui ca jisnish cabo ja chahahuayamacani quiha pë jato chani nicaxo na.

Marcos 8:7

Jasca, huësti huësti ca sani mishni ja jayacaniquë. Naa sani bixo tsi quiha “Gracias” i Dios qui Jesu niquë. Jatsi jahuë rabëti bo qui sani ja mëaniquë nohiria bo taati.

Lucas 24:11

Jama, yoxa bo nicaxo tsi quiha Jesu rabëti bá chahahuayamaniquë, ja paracanai ca quëscahuaquí na.

Lucas 24:40

Toca tsi chanipama tsi jahuë mëquënë, jahuë tahë, tihi cabo jato ja jismaniquë.

Lucas 24:42

Jatsi ja qui imaha ca sani ja acaniquë piti.

Juan 16:22

Jascaria tsi jaboqui cohuë xo mato ri. Jama, ranixëqui mato, mato ë jistëquëquë no. Mato quima mëbitimaxëni ixëhi quiha ma ranixëhaina ra.

Juan 21:5

Jatsi, —¿Japa? ¿Mëquë ya ni mato, joni bá? —i noqui ja niquë. —Yamaha rë —i no niquë.

Hechos 12:14

Caxo Pedro quënahai ca joi ja nicaniquë. Nicahax jahari ja jabaniquë ranihi na. Caiti japëcati ja shina-bënoni quiha. —Joquë Pedro ra. Caití nii xo pa —i jato qui ja niquë.