San Mateo 9:13 - Kaqchikel Santo Domingo (Xenacoj)

¹³ Titijaꞌ iqꞌij tiwetamaj ri achike ndirajoꞌ ndubꞌij ri rutzij ri Dios, ri kereꞌ ndubꞌij: Riyin más niwojoꞌ chi ndipoqonaj kiwech ri wineq, ke chuwech ngeꞌisujlaꞌ chikap pariꞌ ri altar. Keriꞌ nibꞌij chiwa, porque riyin ma xinuqaqa ta chikikanoxik wineq ri pa kiwech rejeꞌ kikꞌuan jun chojmilej kꞌaslen. Riyin xinuqaqa chikikanoxik aj mak teq wineq.

နောက်ထပ်ဗားရှင်းများ

Kaqchikel Santa Maria de Jesus

¹³ Inreꞌ man xipa ta chi ncaꞌnvayuoj ri choj quicꞌaslien choch ri Dios, xa ja ri cꞌo qui-pecados, chi niquiyaꞌ can ri qui-pecados y niquiꞌan ri nrajoꞌ ri Dios. Rumareꞌ quixꞌin y tivatamaj chica ntiel chi tzij: Inreꞌ más nika chinoch chi ntijoyovaj quivach ri vinak, que choch ri chicop ri nquiꞌquimisaj chi ntiyaꞌ chinoch.

Kaqchiquel Bible

¹³ K'ari' xubij chik: Yin man xipe ta chikikanoxik ri winaqi' ri choj kik'aslen. Yin xipe chikikanoxik ri man choj ta kik'aslen richin nitzolej-pe kik'u'x. Kixbiyin k'a chukanoxik chupan ri pixa' y chi retamaxik ri achike nik'ulun-wi ri nubij ri Dios: Yin ninwajo' chi rix kan ta rik'in ronojel iwánima yiniwajo' y man ja ta ri kamelabel ri nisujula-pe chinuwech, nicha' ri pixa', xcha'.*f16*

Kaqchikel Central Guatemala

¹³ Yin man xipe ta chiquicanoxic vinek ri choj quic'aslen. Yin xipe chiquicanoxic ri aj-maqui', ri nic'atzin chi nitzolej-pe quic'u'x riq'uin ri Dios. Y rix man choj queri' tibij-pe ri ch'abel nabey, xa quixbiyin c'a chutz'etic y chiretamaxic ri achique nic'ulun-vi ri nubij ri Dios: Yin más nika' chinuvech chi ja ta ri joyovanic ri c'o iviq'uin, que chuvech ri chicop ri ye'isuj chuve.

Re C'ac'a Testamento pa Kach'abal

¹³ Yen man ximpa-ta chiquicanoxic vinak re choj quic'aslen. Yen ximpa chiquicanoxic re c'o quimac, re nic'atzin che nijalataj quic'aslen chach re Dios. Y yex man chak xaxe tal choj quire' titorola-pa re itzij nabey, xa quixbiyin chutz'etic y chutamaxic re andex ne'c'ulun-va che tzij re nubij re Dios: Re más nika chinoch yen ja-ta che yex nijoyovaj quivach re vinak, que chach ye'sujula' chicop je'quimisan chinoch.

Kaqchikel Western Solola

¹³ Riyin ma xipe ta chiquicanoxic winek ri choj quic'aslen. Riyin xipe chiquicanoxic ri aj maqui', ri rajawaxic chi nitzolin pe quic'u'x riq'ui ri Dios. Quixbiyin c'a chiretamaxic ri achique ntel wi chi tzij ri ruch'abel ri Dios tek nubij: Riyin ri más nika chinuwech chi niben riyix ya chi nijoyowaj quiwech ri winek, ya c'a ri' ri más nika chinuwech, que chuwech ri chicop ri yecamisex y ye'itzuj (ye'isuj) chinuwech.

San Mateo 9:13 ပူးပေါင်းရင်းမြစ်များ

Marcos 2:17

Atoq ri Jesús xrakꞌaxaj ri ndikibꞌilaꞌ ri fariseos, xubꞌij chake: Ri ma ngeyawej ta, ma ndikꞌatzin ta aqꞌomanel chake, xa ja ri ngeyawej. Riyin ma xinuqaqa ta chikikanoxik ri pa kiwech rejeꞌ kikꞌuan jun chojmilej kꞌaslen, riyin xinuqaqa chikikanoxik aj mak teq wineq.

San Lucas 19:10

Porque riyin ri aj chikaj ri xinuꞌalex chiꞌikajal xinuqaqa chikikanoxik y chikikolik ri esachineq pa mak, xchajeꞌ ri Jesús.

San Lucas 5:32

Riyin ma xinuqaqa ta chikikanoxik wineq ri pa kiwech rejeꞌ kikꞌuan jun chojmilej kꞌaslen, riyin xinuqaqa chikikanoxik aj mak teq wineq chin ndikiyaꞌ kan ri mak y nditzolij pe kánima rikꞌin ri Dios.

San Mateo 12:7

Y xa ta qetzij ikꞌoxoman ri rutzij ri Dios, man ta ndibꞌij chi xajan ngetajin rikꞌin la nu-discípulos. Porque ri Dios kereꞌ ndubꞌij: Riyin más niwojoꞌ chi ndipoqonaj kiwech ri wineq, ke chuwech ngeꞌisujlaꞌ chikap chuwech ri altar.

2 Pedro 3:9

Keriꞌ nibꞌij chiwa, porque ri Ajaw kꞌajani tuqaqa, ma roma ta chi ndilayaj, achel ndikibꞌij jujun wineq chi ma jumbꞌey ndibꞌanatej ri rubꞌiꞌin kan. Rijaꞌ kꞌajani tuqaqa roma ma qꞌaxneq ta rukꞌuꞌx chi rix royobꞌen, porque ma ndirajoꞌ ta chi kꞌo jun man ta ndikolotej, xa kin ndirajoꞌ chi konojel ndikijel kinoꞌoj y ndikiyaꞌ kánima rikꞌin.

Hechos 3:19

Romariꞌ, tiyaꞌ chiwij chi ma utz ta ri xibꞌen, titzolij pe iwánima rikꞌin ri Dios y titaqij ri Jesús, chin ndikuyutej ri imak.

Hechos 11:18

Atoq ri israelitas ri kitaqin ri Jesucristo pa tinamit Jerusalén xkakꞌaxaj ri xubꞌij ri Pedro, ma jun chik achike xkichꞌojij chare, xa kin xkiyaꞌ ruqꞌij ri Dios rikꞌin ri kereꞌ xkibꞌij: ¡Wokami kin qetzij qetaman chi jajun chake ri ma israelitas ta, ri Dios ruyoꞌon qꞌij chi ndikijel kinoꞌoj y ndikiyaꞌ kánima rikꞌin, chin ndikil ri kꞌaslen ma ndikꞌis ta!

San Mateo 3:2

Y kereꞌ ndubꞌij chake ri wineq: ¡Tiyaꞌ kan ri mak, y titzolij pe iwánima rikꞌin ri Dios, porque naqaj chik kꞌo ri qꞌij atoq ri aj chikaj Dios ndutzꞌuk ndubꞌen reinar pa kikꞌaslen ri wineq!

Hechos 5:31

Ri Dios xubꞌen chi pa rikiqꞌaꞌ rijaꞌ xbꞌekꞌojeꞌ ri Jesús rikꞌin nimalej ruqꞌij, y xubꞌen chare chi ndubꞌen mandar pa ruwiꞌ nojel y chi ja rijaꞌ ri Kolonel, chin keriꞌ roj israelitas nditzolij qánima rikꞌin ri Dios y ndikuyutej qamak.

San Lucas 24:47

y ndubꞌij chuqaꞌ chi pa nubꞌiꞌ riyin ndetzijox chake nojel kiwech wineq chi ndikꞌatzin ndikiyaꞌ kan ri mak y ndikiyaꞌ kánima rikꞌin ri Dios chin ndikuyutej ri kimak. Y chireꞌ pa tinamit Jerusalén nditzꞌukutej e rutzijoxik.

San Mateo 4:17

Y xe jampeꞌ atoq riꞌ, ri Jesús xutzꞌen rutzijoxik re tzij reꞌ: Tiyaꞌ kan ri mak y titzolij pe iwánima rikꞌin ri Dios, porque naqaj chik kꞌo ri qꞌij chi ri aj chikaj Dios ndutzꞌuk ndubꞌen reinar.

Hechos 2:38

Ri Pedro xubꞌij chake: Tijalaꞌ ri itzel inoꞌoj ibꞌanun chare ri Jesús y titaqij pa iwánima, y pa rubꞌiꞌ rijaꞌ tibꞌanaꞌ bautizar iwiꞌ, chin ndikuyutej imak, y keriꞌ ndiyoꞌox pa iwánima ri Espíritu Santo, ri loqꞌolej sipanik sujun kan.

San Mateo 3:8

Romariꞌ, chin ngixkolotej, ndikꞌatzin ndiqꞌalajin pa ikꞌaslen chi iyoꞌon kan ri mak y tzolijneq pe iwánima rikꞌin ri Dios.

Hechos 20:21

Chake ri israelitas y ri ma israelitas ta, xinbꞌij chi tikijalaꞌ kinoꞌoj y tikiyaꞌ kánima rikꞌin ri Dios y tikitaqij ri Qajaw Jesús.

San Mateo 21:42

Ri Jesús xubꞌij chake: Riyin nibꞌij chi ibꞌanun leer ri tzꞌibꞌan kan chupan ri rutzij ri Dios, ri kereꞌ ndubꞌij: Ri abꞌej ri pa kiwech ri bꞌanuy teq jay ma jun rikꞌaꞌtz chin ta xkikusaj, Ja abꞌej riꞌ, ri xkꞌatzin chin xok ruchuqꞌaꞌ ruxeꞌ ri jay. Re samaj reꞌ, ja ri Ajaw bꞌanayon, Y pa qawech roj, kin jabꞌel wi. Keriꞌ tzꞌibꞌan kan.

San Mateo 12:3

Y ri Jesús xubꞌij chake: ¿Ma ibꞌanun ta leer rix chupan ri rutzij ri Dios ri xubꞌen ri David ojer, atoq rijaꞌ y ri erachibꞌil xchꞌumu pe kipan?

Marcos 12:26

Pero pa ruwiꞌ ri kikꞌastajibꞌel ri animaꞌiꞌ, ¿ma ibꞌanun ta leer chupan ri wuj ri rutzꞌibꞌan kan ri Moisés, atoq ri Dios xchꞌaꞌa pe chare chupan ri zarza ndijina pa qꞌaqꞌ? Rijaꞌ kereꞌ xubꞌij chare ri Moisés: Ja riyin ri ru-Dios ri Abraham, ru-Dios ri Isaac y ru-Dios ri Jacob, xchajeꞌ.

San Juan 10:34

Y ri Jesús xubꞌij chake: Chupan ri ley yoꞌon kan chiwa, ri Dios ndubꞌij: Riyin nibꞌij chiwa chi rix dioses. Keriꞌ tzꞌibꞌan kan.

San Mateo 19:4

Ri Jesús xubꞌij chake: ¿Ma ibꞌanun ta kꞌa leer chupan ri rutzij ri Dios chi xe jampeꞌ pa nabꞌey, rijaꞌ chi achi chi ixaq xerubꞌen?

San Mateo 12:5

¿Ma ibꞌanun ta kami leer chuqaꞌ chupan ri ley ri xyoꞌox chare ri Moisés pa ruwiꞌ ri uxlanibꞌel qꞌij? Chiriꞌ ndubꞌij chi ri sacerdotes ngesamej pa rachoch ri Dios pa teq uxlanibꞌel qꞌij y ma xajan ta chuwech ri Dios ri keriꞌ ndikibꞌen.

San Lucas 10:26

Ri Jesús xubꞌij chare: ¿Achike ndubꞌij chupan ri ley pa ruwiꞌ ri ndakꞌutuj razón? ¿Y achike akꞌoxoman pa ruwiꞌ ri abꞌanun leer?

Marcos 12:33

Y ri ndawojoꞌ ri Dios rikꞌin nojel awánima, nojel anojibꞌal y nojel awuchuqꞌaꞌ y ri ngaꞌawojoꞌ ri wineq achel ndawojoꞌ awiꞌ rat, kin más kꞌo reqalen ke chikiwech nojel ri chikap ngekꞌatisex pariꞌ ri altar y ri chꞌaqa chik sipanik ngesuj chuwech ri Dios.

San Lucas 5:31

Ri Jesús xubꞌij chake: Ri ma ngeyawej ta ma ndikꞌatzin ta aqꞌomanel chake; xa ja ri ngeyawej.