San Mateo 23:16 - Kaqchikel Santo Domingo (Xenacoj)

¹⁶ ¡Juyo iwech rix ri achel soqꞌ teq ukꞌuey kibꞌey wineq! Porque kereꞌ ndibꞌij: Si jun wineq ja ri rachoch ri Dios ndukusaj chupan ri rutzij chin ndubꞌen jurar, ma por fuerza ta ndubꞌen ri xubꞌen jurar. Pero si ja ri qꞌanapueq ri kꞌo pa rachoch ri Dios ri ndukusaj chupan ri rutzij chin ndubꞌen jurar, kin ndikꞌatzin chi ndubꞌen ri xubꞌen jurar, ngixchajeꞌ.

နောက်ထပ်ဗားရှင်းများ

Kaqchikel Santa Maria de Jesus

¹⁶ ¡Juyeꞌ ivach ixreꞌ ri nquixꞌeꞌn chi ix ucꞌuay-bꞌay y xa ix muoy! Ixreꞌ ri nquixꞌeꞌn: Xa cꞌo jun ri nuꞌon jurar pa rubꞌeꞌ ri templo, mesque man nuꞌon ta ri ruꞌeꞌn, can man jun ruchꞌoꞌj. Pero ri nuꞌon jurar pa rubꞌeꞌ ri oro ri cꞌo pa templo, can tubꞌanaꞌ ri ruꞌeꞌn.

Kaqchiquel Bible

¹⁶ Chuqa' kan toq'ex k'a iwech rix ri yixbin chi ix uk'uey-bey y xa ix moyi'. Rix nibij chi toq niya' itzij y ninataj ri rachoch ri Dios, man kan ta k'atzinel chi niben. Jak'a toq ninataj ri q'anapueq ri k'o pa rachoch ri Dios, jari' toq kan k'atzinel chi niben.

Kaqchikel Central Guatemala

¹⁶ ¡Y chuka' can tok'ex c'a ivech rix ri yixbin chi ix uc'uey-bey y xa ix moyi'! Rix ri yixbin chi vi c'o jun ri ninatan ri rachoch ri Dios richin chi nuben jurar, stape' can man nuben ta ri rubin, man jun rubanon. Jac'a ri ninatan ri k'anapuek ri c'o pa rachoch ri Dios, richin chi nuben jurar, ri' can ruc'as chic c'a ri'.

Re C'ac'a Testamento pa Kach'abal

¹⁶ ¡Y can tivok'ex chuka' ivach yex re yixbin che yix ec'uay-bey y xa yix moyi'! Yex re yixbin che vo xa c'o jun re nibano jurar pa rube' re rachoch re Dios chin che nuban jun cosa, y astapa' can man nuban-ta re rubin, man jun nuban. Jac'a re nibano jurar pa rube' re k'anapuak re c'o pa rachoch re Dios, chin nuban jun cosa, re' sí tiene que nuban, roma pa rube' re k'anapuak rubanon-va jurar.

Kaqchikel Western Solola

¹⁶ ¡Y chuka' can juyi' oc iwech riyix ri yixbin chi yix uc'uey bey y xa yix moyi'! Riyix ri yixbin chi wi c'o jun ri ninatan ri rachoch ri Dios riche (rixin) chi nuben jurar, astape' ma nuben ta ri xubij, ri' majun nuben. Yac'a ri ninatan ri k'anapuek ri c'o pa rachoch ri Dios riche (rixin) chi nuben jurar, ri' c'o chi nuben, yixcha' riyix.

San Mateo 23:16 ပူးပေါင်းရင်းမြစ်များ

San Mateo 15:14

Rix ma jun achike tibꞌij chake. Rejeꞌ xa eꞌachel soqꞌ ukꞌuey bꞌey chikiwech chꞌaqa chik soqꞌ. Si jun soqꞌ ndukꞌuaj bꞌey chuwech jun chik soqꞌ, chi ekaꞌiꞌ ngebꞌetzaq pa jul.

San Mateo 23:24

Pero ri achel ngixtajin rikꞌin, xa kin achel ndilatzꞌuj ta e jun us tzaqineq chupan ri iyaꞌ chin ma ndibꞌiqꞌ ta qa, pero nixta ndiyaꞌ cuenta chare atoq ndibꞌiqꞌ qa jun camello. ¡Xa rix soqꞌ teq ukꞌuey kibꞌey wineq!

San Mateo 23:17

¡Xa rix nakaneq y soqꞌ teq wineq! ¿Achike más kꞌo reqalen? ¿Ja ri qꞌanapueq ri kꞌo pa rachoch ri Dios, o ja ri rachoch ri Dios ri ndubꞌen loqꞌolej chare ri qꞌanapueq?

Santiago 5:12

Nu-hermanos, pa ruwiꞌ ri nubꞌiꞌin pe chiwa, nibꞌij chuqaꞌ chiwa chi ma tibꞌen jurar atoq ngixchꞌaꞌa, xaxe tibꞌij jaꞌn atoq keriꞌ wi ri ndibꞌij, o naq atoq ma ke ta riꞌ. Ma tiyaꞌ chupan ri itzij ri kaj, ri rochꞌulew o jun chik achike, chin keriꞌ ri Dios ma nduqꞌet ta tzij pa iwiꞌ roma keriꞌ xtibꞌen.

San Mateo 23:26

¡Rix fariseos, xa achel rix soqꞌ! Nabꞌey tichꞌajaꞌ rupan ri vaso chin chꞌajchꞌaj ndubꞌen nojel. Tichꞌajchꞌojrisaj ri iwánima, chin keriꞌ qetzij chꞌajchꞌaj ndubꞌen nojel pa ikꞌaslen.

San Mateo 23:19

¡Soqꞌ teq wineq! ¿Achike ri más kꞌo reqalen? ¿Ja ri ofrenda kꞌo cho altar o ri altar ri ndubꞌen loqꞌolej chare ri ofrenda?

Gálatas 5:3

Y nibꞌij chik jumbꞌey chi xa achike na achi ri ndirajoꞌ ndubꞌen circuncidar riꞌ, kin tirajoꞌ mani, ndikꞌatzin ndubꞌen nojel ri ndubꞌij ri ley chuqaꞌ.

San Mateo 23:13

¡Juyo iwech rix tijonelaꞌ chin ri ley xyoꞌox chare ri Moisés y chuqaꞌ rix fariseos, ri xa kaꞌiꞌ ipalej! Roma ndiqꞌet chikiwech ri wineq ri bꞌey chin ngeꞌok chupan ru-reino ri aj chikaj Dios, porque ma ngixok ta rix, nixta ndiyaꞌ qꞌij chake chi ngeꞌok ri ndikajoꞌ ngeꞌok.