San Juan 20:31 - Kaqchikel Santo Domingo (Xenacoj)

³¹ Pero ri retal ruchuqꞌaꞌ ri Dios ri xetzꞌibꞌex kan chupan re wuj reꞌ, xetzꞌibꞌex chin nditaqij chi ja ri Jesús ri taqon pe roma ri Dios chukolik ri rutinamit y chi ja rijaꞌ ri Rukꞌajol ri Dios. Y xetzꞌibꞌex chuqaꞌ chin keriꞌ rix ri ngixtaqin, ndikꞌojeꞌ ikꞌaslen rikꞌin rijaꞌ.

နောက်ထပ်ဗားရှင်းများ

Kaqchikel Santa Maria de Jesus

³¹ Pero ri i-tzꞌibꞌan can chupan va libro va, can i-tzꞌibꞌan can chi quireꞌ ixreꞌ tinimaj chi ri Jesús jareꞌ ri Cristo ri Rucꞌajuol ri Dios. Y antok xtinimaj, can xtivil ri cꞌaslien ri man xtiqꞌuis ta.

Kaqchiquel Bible

³¹ Jak'a ri e tz'ibatel kan, kan e tz'ibatel richin chi rix tinimaj k'a chi ri Jesús jari' ri Cristo ri ruk'ajol ri Dios. Y toq xtinimaj, xtik'ul ri ik'aslen ri man k'isel ta, roma kan xikuquba' ik'u'x rik'in.

Kaqchikel Central Guatemala

³¹ Jac'a ri e tz'ibatel can chupan re vuj re', can e tz'ibatel can, richin chi rix tinimaj c'a chi ri Jesús jari' ri Cristo ri Ruc'ajol ri Dios. Y tok xtinimaj, xtic'ul ri ic'aslen ri man q'uisel ta, roma can xicukuba' c'a ic'u'x riq'uin.

Re C'ac'a Testamento pa Kach'abal

³¹ Jac'a re je'ntz'iban can chupan re libro re', can je'ntz'iban can chin che yex tinimaj che re Jesús can jare' re Cristo re Ruc'ajol re Dios. Y tak xtinimaj, xtic'ul re ic'aslen re man niq'uis-ta, roma can xiban confiar-ivi' riq'uin reja'.

Kaqchikel Western Solola

³¹ Yac'a ri ye tz'ibatal ca chupan re wuj re', can ye tz'ibatal ca riche (rixin) chi riyix ninimaj c'a chi ri Jesús yari' ri Cristo ri Ruc'ajol ri Dios, y riche (rixin) chuka' chi tek riyix xtinimaj, xtic'ul ri c'aslen riche (rixin) xtibe k'ij xtibe sek, ruma can xicukuba' c'a ic'u'x riq'ui.

San Juan 20:31 ပူးပေါင်းရင်းမြစ်များ

San Mateo 16:16

Y ri Simón Pedro xubꞌij: Ja rat ri Rukꞌajol ri Kꞌaslik Dios, ri Jun taqon pe roma ri Dios chukolik ri rutinamit.

San Mateo 27:54

Ri ki-jefe 100 soldados y ri soldados ri ekꞌo apu chiriꞌ chin ndikichajij ri Jesús, atoq xkinaꞌ ri kobꞌraqen y xkitzꞌet nojel ri ndajin, santienta xkixibꞌij qa kiꞌ y ndikibꞌilaꞌ: ¡Kin qetzij chi re achi reꞌ Rukꞌajol ri Dios!

San Mateo 4:3

Y ri itzel ri nditaqchiꞌin richin xbꞌeqaqa apeꞌ kꞌo ri Jesús y xubꞌij chare: Rat ri rat Rukꞌajol ri Dios, tabꞌij chi re abꞌej reꞌ keꞌok qa kaxlan wey.

Marcos 16:16

Ri xtitaqin ri utzulej teq tzij chin kolotajik y xtubꞌen bautizar riꞌ, kin ndikolotej wi. Pero ri castigo ri nduyaꞌ ri Dios ndiqaqa pa ruwiꞌ ri ma xtitaqin ta.

San Lucas 1:35

Y ri ángel xubꞌij chare: Ri Espíritu Santo rikꞌin ruchuqꞌaꞌ ri nimalej Dios kin xtuqaqa pa awiꞌ, romariꞌ ri chꞌuti alaꞌ ri ndikꞌojeꞌ chiꞌaqꞌaꞌ, kin xtubꞌiniꞌaj Loqꞌolej y Rukꞌajol ri Dios.

San Lucas 1:4

chin keriꞌ ndawetamaj utz-utz ri qetzij ri rat tijon pe pa ruwiꞌ.

San Lucas 24:47

y ndubꞌij chuqaꞌ chi pa nubꞌiꞌ riyin ndetzijox chake nojel kiwech wineq chi ndikꞌatzin ndikiyaꞌ kan ri mak y ndikiyaꞌ kánima rikꞌin ri Dios chin ndikuyutej ri kimak. Y chireꞌ pa tinamit Jerusalén nditzꞌukutej e rutzijoxik.

San Juan 1:49

Ja atoq riꞌ ri Natanael xubꞌij chare ri Jesús: Tijonel, ja rat ri Rukꞌajol ri Dios y ja rat ri Rey pa qawiꞌ roj israelitas.

San Juan 10:10

Ri eleqꞌon nduqaqa xe chin ndeleqꞌan, ndikamisan y ndukꞌis ruqꞌij nojel, jakꞌa riyin xinuqaqa chin niyaꞌ kikꞌaslen ri enukarneꞌl, jun kꞌaslen tzꞌaqet ri ma ndikꞌis ta.

San Juan 19:35

Y ri xtzꞌeto nojel reꞌ, ndubꞌij chi kin keriꞌ wi xbꞌanatej, y ri ndubꞌij rijaꞌ kin qetzij wi. Rijaꞌ retaman chi qetzij ri ndubꞌij, chin keriꞌ rix nditaqij chuqaꞌ.

San Juan 20:28

Ja atoq riꞌ ri Tomás xubꞌij: ¡Ja rat ri Wajaw y ja rat ri nu-Dios!

San Juan 3:18

Ri castigo ri nduyaꞌ ri Dios ma ndiqaqa ta pa ruwiꞌ jun wineq ri xtutaqij chi ja ri Rukꞌajol ri Dios ri rukolonel, pero ri ma xtutaqij ta, kin kꞌo chik ri castigo pa ruwiꞌ, porque ma rutaqin ta chi rukolonel ri junayon Rukꞌajol ri Dios.

San Juan 3:36

Ri nditaqin chi ja ri Rukꞌajol ri Dios ri Kolonel, kꞌo ri kꞌaslen ma ndikꞌis ta rikꞌin. Pero jun ri ma ndunimaj ta ri ndubꞌij ri Rukꞌajol ri Dios, ma ndikꞌojeꞌ ta ri kꞌaslen ma ndikꞌis ta rikꞌin, xa kꞌa keriꞌ kꞌo chuxeꞌ ri nimalej royowal ri Dios.

San Juan 5:24

Kin qetzij nibꞌij chiwa chi ri ndakꞌaxan ri tzij nibꞌij y ndutaqij ri taqayon pe wichin, kin kꞌo chik ri kꞌaslen ma ndikꞌis ta rikꞌin. Pa ruwiꞌ rijaꞌ ma ndiqaqa ta ri castigo nduyaꞌ ri Dios, xa kin kolotajneq chi pe chuwech ri kamik y qꞌaxneq chi apu chupan ri kꞌaslen ma ndikꞌis ta.

San Juan 6:40

Porque ri rurayibꞌel ri Nataꞌ ri taqayon pe wichin, jareꞌ: Konojel ri ndiketamaj achike riyin y nginikitaqij, ndikil ri kꞌaslen ma ndikꞌis ta, y riyin ngenkꞌastajbꞌaꞌ e chikikajal ri animaꞌiꞌ pa rukꞌisibꞌel qꞌij.

Hechos 10:43

Konojel chuqaꞌ ri profetas kereꞌ kibꞌiꞌin kan pa ruwiꞌ ri Jesús: Konojel ri ndikitaqij rijaꞌ, ndikuyutej ri kimak roma ri ndubꞌen rijaꞌ. Keriꞌ kibꞌiꞌin kan ri profetas, xchajeꞌ ri Pedro.

Hechos 3:16

Ri xbꞌanun chi re achi reꞌ xkꞌachaj y xkꞌojeꞌ pe ruchuqꞌaꞌ, ja chi qakuqubꞌan kakꞌuꞌx rikꞌin ri Jesús. Y roma keriꞌ, kin xkꞌachaj wi chin jumul ri raqen, achel nditzꞌet rix.

Hechos 8:36

Atoq kitzꞌamon bꞌey ebꞌaneq, xebꞌeqaqa pa jun lugar apeꞌ kꞌo yaꞌ, y ri achi xubꞌij: ¡Tatzꞌetaꞌ! Kꞌo yaꞌ waweꞌ. ¿Kꞌo kami jun achike ndiqꞌato wichin chi ngibꞌan bautizar?

Hechos 8:37

Y ri Felipe xubꞌij: Si rat rikꞌin nojel awánima ndataqij ri Jesucristo, kꞌo cheꞌel ndabꞌen bautizar awiꞌ. Y ri achi xubꞌij: Jaꞌn, nitaqij chi ja ri Jesucristo ri Rukꞌajol ri Dios, xchajeꞌ.

Hechos 9:20

Ri Saulo kin ja paqiꞌ xutzꞌuk ndok pa teq sinagogas chin ndutzijoj chi ri Jesús kin Rukꞌajol wi ri Dios.

1 Pedro 1:9

Porque rikꞌin riꞌ, ndeꞌiwilaꞌ ri achike roma iyoꞌon iwánima rikꞌin ri Ajaw, y riꞌ ja ri ikolotajik.

1 Juan 4:15

Xa achike na jun ri ndutaqij chi ja ri Jesús ri Rukꞌajol ri Dios, jumul xe jun rubꞌanun rikꞌin ri Dios, y ri Dios jumul xe jun rubꞌanun rikꞌin rijaꞌ.

1 Juan 5:1

Konojel ri ndikitaqij chi ri Jesús jariꞌ ri Jun taqon pe roma ri Dios chukolik ri rutinamit, kikꞌuan chik ri kꞌakꞌakꞌ alaxik nduyaꞌ ri Dios. Y konojel ri ndikajoꞌ jun tataꞌatz, ndikajoꞌ chuqaꞌ ri ralkꞌuaꞌl ri tataꞌatz riꞌ.

1 Juan 5:20

Qetaman chuqaꞌ chi ri Rukꞌajol ri Dios xuqaqa chochꞌulew, y xuyaꞌ etamabꞌel chaqe chin ndiqetamaj runoꞌoj ri qetzij Dios. Y roj xe jun qabꞌanun rikꞌin ri qetzij Dios, porque xe jun qabꞌanun rikꞌin ri Jesucristo ri Rukꞌajol. Ja rijaꞌ ri qetzij Dios, y ja rijaꞌ ri ndiyoꞌon ri kꞌaslen ma ndikꞌis ta.

2 Juan 1:9

Xa achike na jun ri nduyaꞌ qa más ruwiꞌ ri tijonik chin ri Cristo, ma kꞌo ta ri Dios pa ránima. Jakꞌa ri jun ri jumul kꞌo chupan ri tijonik chin ri Cristo, kꞌo ri Tataꞌaj Dios y ri Rukꞌajol ri Dios pa ránima.

Apocalipsis 2:18

Tatzꞌibꞌaj reꞌ chare ri nusamajel kꞌo pa ruwiꞌ ri bꞌotzaj ralkꞌuaꞌl ri Dios ri ndikimal kiꞌ pa tinamit Tiatira: Riyin ri Jesucristo, ri Rukꞌajol ri Dios, ri pa teq nuwech achel ruxaq qꞌaqꞌ keriꞌ, y ri waqen ngetzꞌintzꞌot chuqaꞌ achel bronce jabꞌel juqun ruwech, nibꞌij kereꞌ: