Efesios 6:6 - Kaqchikel Santo Domingo (Xenacoj)

⁶ Ma xe ta atoq kꞌo ri iwajaw chiꞌinaqaj utz kixsamej, xe roma ndiwojoꞌ chi utz ngixtzꞌat koma rejeꞌ. Kixsamej kin achel ta rix loqꞌon teq samajelaꞌ chin ri Cristo, tibꞌanaꞌ ri samaj bꞌiꞌin chiwa, achel ndurayij ri Dios chi ndibꞌen.

နောက်ထပ်ဗားရှင်းများ

Kaqchikel Santa Maria de Jesus

⁶ Man tiꞌan chi joꞌc nquixsamaj antok icꞌo-apa ri ivajaf iviqꞌuin, richin ntivajoꞌ nquixtzꞌiet chi ix otz chi esclavos. Ixreꞌ ix ru-siervos ri Cristo, y rumareꞌ nicꞌatzin chi riqꞌuin nojiel ivánima tibꞌanaꞌ rusamaj ri ivajaf, ruma jareꞌ ri nrajoꞌ ri Dios.

Kaqchiquel Bible

⁶ Man tiben chi xaxe toq ek'o-apo iwik'in yixsamej, xaxe richin kixnimex chi ix utz taq samajela'. Rix kan rik'in ronojel iwánima kixsamej achi'el xa ta kan rusamaj ri Cristo ri niben, roma jari' ri rurayibel ri Dios.

Kaqchikel Central Guatemala

⁶ Man tiben c'a chi xaxe tok ec'o-apo ri i-patrón iviq'uin yixsamej, xaxe richin quixnimex chi ix utz tak samajela'. Rix ix rusamajela' ri Cristo, y romari' nic'atzin chi riq'uin ronojel ivánima tibana' rusamaj ri i-patrón, roma jari' ri rurayibel ri Dios.

Re C'ac'a Testamento pa Kach'abal

⁶ Man tiban che camas yixsamaj xaxe tak jec'o-apo re i-patrón iviq'uin, xaxe chin quixnimax che yix otz tak mozos. Yex yix rusamajela' re Jesucristo, y mare' nic'atzin che riq'uin ronojel ivánma tibana' rusamaj re i-patrón, roma jare' re nurayij re Dios.

Kaqchikel Western Solola

⁶ Ma tiben ta chi xaxu (xaxe wi) tek yec'o apo ri ipatrón iwuq'ui tek yixsamej jabel, riche (rixin) chi niwajo' yixtz'etetej chi can yix utzilaj tak mozos. Riyix yix rusamajel ri Cristo, y rumari' nic'atzin chi riq'ui ronojel iwánima tibana' rusamaj ri ipatrón, ruma yari' ri ruraybel ri Dios.

Efesios 6:6 ပူးပေါင်းရင်းမြစ်များ

San Mateo 12:50

Porque ri ndibꞌanun rurayibꞌel ri Nataꞌ kꞌo chikaj, jariꞌ nchaqꞌ, wanaꞌ y nteꞌ.

San Mateo 7:21

Ma konojel ta ri ngebꞌiꞌin Ajaw, Ajaw chuwa, xkeꞌok chupan ri aj chikaj reino, xa kin xe wi ri ngebꞌanun ri rurayibꞌel ri Nataꞌ Dios kꞌo chikaj.

Marcos 3:35

Porque achike na ri ndibꞌanun ri rurayibꞌel ri Dios, jariꞌ nchaqꞌ, wanaꞌ y nteꞌ, xchajeꞌ ri Jesús.

Romanos 6:17

Jumbꞌey kan xixkꞌojeꞌ chuxeꞌ ruchuqꞌaꞌ ri mak, pero matiox chare ri Dios, wokami rikꞌin nojel iwánima iniman ri tijonik ri yoꞌon kan chiwa.

1 Corintios 7:22

Porque ri kꞌo chuxeꞌ rutzij jun ajaw atoq xoyox roma ri Ajaw Jesús, wokami achel xkꞌojeꞌ libre, roma richin chik ri Ajaw. Y ri ma kꞌo ta chuxeꞌ rutzij jun ajaw atoq xoyox, wokami kꞌo chuxeꞌ rutzij ri Cristo.

Gálatas 1:10

Y atoq keriꞌ xinbꞌij chiwa, ma chin ta niwojoꞌ chi utz ngitzꞌat koma ri wineq, xa kin chin utz ngitzꞌat roma ri Dios. Riyin ma ja ta ri ndiqaꞌ chikiwech ri wineq ngitajin rikꞌin, porque si keriꞌ ta nubꞌanun pe, man ta yin rusamajel ri Cristo.

Efesios 5:17

Romariꞌ, ma tibꞌen achel ndikibꞌen wineq ri xetal ngetajiyaj, xa kin titijaꞌ iqꞌij tiwetamaj achike ndirajoꞌ ri Ajaw chi ndibꞌen.

Filipenses 2:12

Roma kꞌa riꞌ, hermanos ri tzꞌan ngixinwojoꞌ, achel jumul xixniman, ma xe ta atoq xikꞌojeꞌ chiꞌikajal, xa kin más wokami ri ma yinkꞌo ta apu iwikꞌin, tiyaꞌ pa iwánima chi kin nimalej wi ruqꞌij ri Dios, y romariꞌ ndikꞌatzin chi ndikꞌuaj ri kꞌaslen ri rukꞌulun chi ndikꞌuaj roma rix kolotajneq chik.

Colosenses 1:9

Romariꞌ, xe jampeꞌ qakꞌaxan chi keriꞌ rubꞌanun pe ri iwánima, roj ma qayoꞌon ta kan chi ndiqabꞌen orar iwoma, y ndiqakꞌutuj chare ri Dios chi xtunojisaj ri iwánima rikꞌin ri nojibꞌel y ri etamabꞌel ri nduyaꞌ ri Espíritu Santo, chin ndiwetamaj utz-utz nojel ri rurayibꞌel ri Dios.

Colosenses 4:12

Nduteq ruxunaqil iwech ri hermano Epafras, jun iwinaq rix. Rijaꞌ jun rusamajel ri Cristo Jesús, y kin jumul ndubꞌen orar. Ndukꞌutuj chare ri Dios pa iwiꞌ chi kaw ngixpeꞌeꞌ chiraqen ri Dios y ndikꞌiy utz-utz ri ikꞌaslen chuwech, y chi kin kuqul ikꞌuꞌx iwetaman ndibꞌen ri rurayibꞌel ri Dios.

1 Tesalonicenses 2:4

Pa rukꞌexel riꞌ, ngojchꞌaꞌa porque ri Dios nabꞌey chi xuyaꞌ re samaj reꞌ pa qaqꞌaꞌ, xunikꞌoj ri kꞌo pa qánima, kꞌateriꞌ xuchilabꞌej chaqe chi ndiqayaꞌ rutzijol ri utzulej teq tzij chin kolotajik, y kin ja wi riꞌ ri ndiqatzijoj. Y ma ja ta ri ndiqaꞌ chikiwech ri wineq ri ndiqatij qaqꞌij chin ndiqatzijoj, xa kin ja ri ndiqaꞌ chuwech ri Dios ri ndinikꞌon ri kꞌo pa qánima.

1 Tesalonicenses 4:3

Porque ri rurayibꞌel ri Dios chiwa, jareꞌ: Tikꞌuaj jun loqꞌolej kꞌaslen chuwech, ma tikꞌamalaꞌ qa iwiꞌ xa achoq na ikꞌin chin ndibꞌen mak.

Hebreos 10:36

Keriꞌ nibꞌij chiwa, porque ndikꞌatzin chi qꞌij-qꞌij ngixkochꞌon, chin keriꞌ rikꞌin ri ndibꞌen ri rurayibꞌel ri Dios, ndiyoꞌox chiwa ri sujun kan roma rijaꞌ.

Hebreos 13:21

Kin ta ja Dios riꞌ, ndiyoꞌon nojel ri ndikꞌatzin chiwa chin ngixtiker ndibꞌen ri utz pa ikꞌaslen, achel ndirajoꞌ rijaꞌ, y kin ta roma ri Jesucristo, ri Dios ndubꞌen chuqaꞌ chaqe chi ngojtiker ndiqabꞌen ri ndiqaꞌ chuwech. ¡Kin ta ndiyoꞌox nimalej ruqꞌij chin jumul! Amén.

1 Pedro 2:15

Porque ri rurayibꞌel ri Dios chiwa, ja ri ndibꞌen ri utz, chin keriꞌ ri wineq ri ma pa ruchojmil ta ngenojin y xetal ngekibꞌilaꞌ tzij chiwij, atoq ndikitzꞌet ri utz ngixtajin rikꞌin, ma jun chik achike xtikibꞌij chiwij.

1 Pedro 4:2

Keriꞌ tiyaꞌ pa iwánima, chin keriꞌ ri janipeꞌ chik qꞌij ngixkꞌaseꞌ e chochꞌulew, ma tukꞌuꞌex ri ikꞌaslen roma ri itzel teq rayinik ri ndalex pe pa iwánima, y xa kin tibꞌanaꞌ ri rurayibꞌel ri Dios.

1 Juan 2:17

Y ri wineq ri ngebꞌanun ri ma utz ta chochꞌulew xa kin xkekꞌis, y ngekꞌis chuqaꞌ nojel ri itzel teq kirayinik, pero si jun ndubꞌen pa rukꞌaslen ri rurayibꞌel ri Dios, ndiril ri kꞌaslen ma ndikꞌis ta.