2 Corintios 6:10 - Kaqchikel Santo Domingo (Xenacoj)

¹⁰ Roj yoꞌon chi bꞌis, pero jumul ngojkikot, maneq ok qachajin, pero qabꞌanun chake ekꞌiy chi xbꞌeyomer kikꞌaslen rikꞌin ri rutzij ri Dios, y achel maneq ndutzꞌen qaqꞌaꞌ, pero nojel qichin roj.

နောက်ထပ်ဗားရှင်းများ

Kaqchikel Santa Maria de Jesus

¹⁰ Y mesque nkojbꞌisuon, pero siempre nkojquicuot. Ojreꞌ oj puobra, pero nakayaꞌ chica ri nicꞌaj chic chi ncaꞌbꞌayomer. Y mesque man jun kax cꞌo kiqꞌuin, xa nojiel cꞌo kiqꞌuin.

Kaqchiquel Bible

¹⁰ Kan achi'el yojbison yojtzu'un, jak'a xa kan yojkikot. Stape' ojk'o pa meba'il, jak'a kan ek'o ri xebeyomer qoma roj. Y stape' chuqa' kan man jun ok k'o qik'in, xa kan yojtikir niqabij chi kan ronojel k'o qik'in.

Kaqchikel Central Guatemala

¹⁰ Y stape' yojbison, xa can yojquicot chuka'. Roj ojc'o pa meba'il, pero chuka' c'o ri c'o kiq'uin richin nikaya' chique ri ch'aka', richin chi yebeyomer. Y stape' chuka' can man jun c'o kiq'uin, xa can yojtiquir nikabij chi can ronojel c'o kiq'uin. Y ronojel c'a re' nuc'ut chi can oj rusamajela' vi ri Dios.

Re C'ac'a Testamento pa Kach'abal

¹⁰ Y astapa' yojbison, pero chuka' can yojqui'cot. Yoj meba', pero can yojtiquir ye'kato' re nic'aj chic vinak, chin che ye'biyomar. Y astapa' man jun cosa c'o kaq'uin, pero yojtiquir nakabij che ronojel c'o kaq'uin. Y ronojel c'a re' can nuc'ut che yoj can yoj rusamajela-va re Dios.

Kaqchikel Western Solola

¹⁰ Y astape' c'o bis, xa can yojquicot chuka'. Riyoj yojc'o pa meba'il, pero c'o nikaya' chique nic'aj chic, riche (rixin) chi yebeyomer. Y astape' chuka' chi xa majun c'o kiq'ui, xa can yojcowin nikabij chi can ronojel c'o kiq'ui. Y ronojel c'a re' nuc'ut chi can yoj rusamajel wi ri Dios.

2 Corintios 6:10 ပူးပေါင်းရင်းမြစ်များ

San Juan 16:22

Keriꞌ chuqaꞌ rix ngixbꞌison wokami, pero riyin ngixuntzꞌetaꞌ chik jumbꞌey, y ja atoq riꞌ ri iwánima kin xtikikot chik jumbꞌey, y nixta jun xtitiker xtubꞌen chiwa chi man ta ngixkikot.

2 Corintios 8:9

Porque rix iwetaman ri favor ruyoꞌon ri Qajaw Jesucristo, chi roma rujoyowaxik iwech, rijaꞌ maske kin pa ruqꞌaꞌ kꞌo nojel, xuꞌok achel jun ri maneq ok ruchajin chochꞌulew, y roma ri keriꞌ xurubꞌanaꞌ, rix xiwil ri bꞌeyomal chin chikaj.

Apocalipsis 2:9

Riyin wetaman ri kꞌayew ndaqꞌasaj y chi maneq ok achajin, pero pa nuwech riyin kin rat bꞌeyon. Wetaman chuqaꞌ chi ri ngebꞌiꞌin chi e-israelitas pero xa kiqꞌabꞌan kiꞌ, tzꞌan itzel teq tzij ndikibꞌilaꞌ chawij. Rejeꞌ xa jun bꞌotzaj wineq ri koqan rutijonik ri itzel.

Santiago 2:5

Nu-hermanos ri tzꞌan ngixinwojoꞌ, tiwakꞌaxaj re nibꞌij chiwa: Ri Dios eruchaꞌon ri maneq ok kichajin chochꞌulew chin ndikitaqij rijaꞌ, y riꞌ kin nimalej bꞌeyomal, y eruchaꞌon chuqaꞌ chin ngeꞌok pa ru-reino ri Dios, reino ri sujun chake konojel ri ngeꞌojowan richin.

Hebreos 10:34

Porque xipoqonaj kiwech ri xetzꞌapix pa cheꞌ, y hasta xixkikot atoq xmaj chiwech ri ichajin, porque iwetaman chi chikaj ichajin más yalan teq achike ri ma ngekꞌis ta.

1 Timoteo 4:8

Porque ri ndabꞌen ejercicio qꞌij-qꞌij ndukꞌen pe jubꞌaꞌ utz chare ri a-cuerpo. Pero ri ndakꞌuaj jun utzulej kꞌaslen chuwech ri Dios kꞌo utz ndukꞌen pe chare nojel akꞌaslen, porque kꞌo utz ndukꞌen pe chare ri akꞌaslen chireꞌ wokami y chare ri akꞌaslen nduyaꞌ ri Dios más chiqawech apu.

Filipenses 4:4

Jumul kixkikot roma xe jun ibꞌanun rikꞌin ri Ajaw. Y nibꞌij chik jumbꞌey chiwa: ¡Kixkikot!

1 Tesalonicenses 1:6

Y xe jampeꞌ xikꞌen qa pa iwánima ri utzulej teq tzij riꞌ, iqꞌasan pe santienta kꞌayew pa kiqꞌaꞌ wineq, pero ri Espíritu Santo ruyoꞌon pe pa iwánima chi ngixkikot. Y romariꞌ ri rukꞌuaxik ri ikꞌaslen, ja achel nukꞌaslen riyin y achel rukꞌaslen ri Ajaw.

Colosenses 3:16

Kin ta xtinoj ri iwánima rikꞌin ri rutzij ri Cristo, y kin ta xtikꞌojeꞌ jumul chiriꞌ. Kin ta xtikusaj nojel ri utzulej nojibꞌel ri pataneq rikꞌin ri Cristo chin nditijoj y ndipixabꞌaj iwiꞌ chiwech. Rikꞌin nojel iwánima keꞌibꞌixaj salmos, himnos y chꞌaqa chik bꞌix ri nduyaꞌ ri Espíritu Santo chiwa chin ngixmatioxin chare ri Dios.

Filipenses 2:17

Porque rix kuqul ikꞌuꞌx rikꞌin ri Dios y romariꞌ ndibꞌen ri rusamaj. Ri keriꞌ ngixtajin rikꞌin, kin achel rix jun ofrenda ri ndiyaꞌ chare rijaꞌ. Y si riyin ngikamisex, ri nukamik ndok rutzꞌaqat ri ofrenda riꞌ, kin achel ri vino rutzꞌaqat ri ofrenda ri ndisujeꞌ cho altar. Y maske xkikamisex, kin xkikikot junan iwikꞌin rix iwonojel, porque rix y riyin ndiqayaꞌ qiꞌ chi ofrenda chare ri Dios.

Romanos 11:12

Y roma xetzaq ri israelitas, xkꞌojeꞌ ri favor nduyaꞌ ri Dios pa kiwiꞌ jalajaj kiwech wineq chochꞌulew. Ri israelitas kin ma xkil ta ri favor nduyaꞌ ri Dios, y romariꞌ xkꞌojeꞌ ri favor nduyaꞌ ri Dios pa kiwiꞌ ri ma israelitas ta. Y romariꞌ, ¡kin más kꞌiy favor ndukꞌen pe, atoq ri israelitas nditzolij chi pe kánima rikꞌin ri Dios!

1 Pedro 4:13

Pa rukꞌexel chi ndisach ikꞌuꞌx, xa kixkikot chi jajun rix ndiqꞌasaj jubꞌaꞌ kꞌayew achel xuqꞌasaj ri Cristo iwoma, chin keriꞌ atoq nduruqꞌalajrisaj riꞌ chupan ri nimalej ruqꞌij, rix chuqaꞌ kin santienta xkixkikot rikꞌin.

2 Corintios 4:7

Y re samaj yoꞌon pa qaqꞌaꞌ chin ndiqabꞌen, kin achel jun bꞌeyomal, jakꞌa ri qa-cuerpo achoq ikꞌin ndiqabꞌen re samaj reꞌ, xa achel ok jun bꞌambꞌel bꞌanun rikꞌin chꞌabꞌeq, chin keriꞌ nditzꞌetetej chi ri nimalej uchuqꞌaꞌ ndiqasamajij, ja ri Dios yoyon pe y ma qichin ta roj.

2 Corintios 2:4

Santienta bꞌis xinnaꞌ y tzꞌan xqꞌaxa wánima atoq xintzꞌibꞌaj e ri jun wuj chiwa, hasta santienta xinoqꞌ. Pero ma chin ta xinbꞌen chiwa chi xixbꞌison xintzꞌibꞌaj e, xa chin tiwetamaj jarupeꞌ ngixinwojoꞌ.

Romanos 15:13

Y ri Dios ri nditoꞌon kichin ri wineq chin ndikoyobꞌej ri rusujun kan, kin ta xtubꞌen chiwa chi ngixkikot y kin ta xtuyaꞌ chuqaꞌ uxlanen pa iwánima roma itaqin rijaꞌ. Y keriꞌ rikꞌin ri ruchuqꞌaꞌ ri Espíritu Santo, rix rikꞌin nojel iwánima ndiwoyobꞌej ri rusujun kan ri Dios.

Romanos 12:15

Kixkikot kikꞌin ri ngekikot, y kixoqꞌ kikꞌin ri ngeꞌoqꞌ.

Hechos 5:41

Ri apóstoles xeꞌel pe chiriꞌ chikiwech ri achiꞌaꞌ israelitas kꞌo uchuqꞌaꞌ pa kiqꞌaꞌ, y tzꞌan ngekikot roma ndikinaꞌ chi jun favor rubꞌanun ri Dios chake chi ndikiqꞌasaj kꞌayew y ndibꞌan itzel chake roma ndikiyaꞌ utzulej rutzijol ri Jesús.

San Lucas 6:21

Kin jabꞌel roꞌiqꞌij rix ri ndichꞌumuyaj ipan, porque kin xkixtzuq yan chik hasta janipeꞌ xkixnanoꞌ. Kin jabꞌel roꞌiqꞌij rix ri ngixoqꞌ wokami, porque kin xkixkikot yan chik.

San Mateo 5:4

Kin jabꞌel rokiqꞌij ri ngeꞌoqꞌ chuwech ri Dios, Porque kin xtibꞌochiꞌix ri kánima.

1 Timoteo 6:18

Tabꞌij chake chi tikibꞌanaꞌ ri utz, chi tikikusaj ri kibꞌeyomal chin ngekitoꞌ chꞌaqa chik, ma tikikꞌekꞌej ndikiyaꞌ ri kichajin, y ma tikichꞌiquj kiꞌ chin ngetoꞌon.

1 Tesalonicenses 5:16

Jumul kixkikot.

Hechos 3:6

Pero ri Pedro xubꞌij chare: Riyin maneq qꞌanapueq nixta saqipueq wikꞌin, pero ri yoꞌon chuwa nisipaj chawa. Pa rubꞌiꞌ ri Jesucristo aj Nazaret, kayakatej y kabꞌiyaj.

Colosenses 1:24

Riyin ngikikot roma ri kꞌayew niqꞌasaj iwoma, porque rikꞌin ri keriꞌ niqꞌasaj pa nukꞌaslen, nitzꞌaqatisaj pa nu-cuerpo ri kꞌayew qꞌaton pa nuwiꞌ chin niqꞌasaj pa rubꞌiꞌ ri Cristo koma ri ralkꞌuaꞌl ri Dios, y riꞌ ja roj ri roj okuneq ruwachinel ruqꞌa-raqen ri Cristo.

Efesios 3:16

Y nikꞌutuj chare rijaꞌ ri kꞌo nimalej ruqꞌij ri kin achel jun bꞌeyomal, chi nduyaꞌ santienta ruchuqꞌaꞌ iwánima roma ri Espíritu Santo.

Efesios 3:8

Y riyin maske maneq ok weqalen ke chuwech ri más maneq ok ruqꞌij chikikajal ri loqꞌolej rutinamit rijaꞌ, chuwa riyin yoꞌon ri favor chi nitzijoj chake ri ma israelitas ta ri utzulej teq tzij chin kolotajik ri kin jun bꞌeyomal rukꞌamon pe ri Cristo, jun bꞌeyomal ri ma ngojtiker ta ndiqakꞌoxomaj janipeꞌ reqalen.

2 Corintios 4:15

Y nojel ri ndiqaqꞌasaj pa qakꞌaslen, ndiqaqꞌasaj chin kꞌo utz ndukꞌen pe chiwa, chin keriꞌ qꞌij-qꞌij más santienta wineq ndikil ri ru-favor ri Dios y más kꞌiy matioxinik ndukꞌen pe pa kánima y keriꞌ ndikiyaꞌ ruqꞌij ri Dios.

1 Corintios 1:5

Y roma rijaꞌ ri achoq ikꞌin xe jun ibꞌanun, xixbꞌeyomer rikꞌin nojel ruwech etamabꞌel pataneq rikꞌin rijaꞌ, y rikꞌin chuqaꞌ ri jabꞌel rubꞌixik ndibꞌen ri etamabꞌel riꞌ.

Romanos 9:2

Riyin santienta bꞌis y kꞌayew ninaꞌ koma ri nuwinaqul.

Romanos 8:32

Ri Dios hasta ri Rukꞌajol ma xupoqonaj ta xuteq pe chochꞌulew chin xken chujoyowaxik qawech roj ri qataqin rijaꞌ. Y si xuteq yan pe ri Rukꞌajol, ¿ruyon kꞌa ma xtuyaꞌ ta pe ri chꞌaqa chik ru-favor chaqe?

Hechos 16:25

Pero pa nikꞌaj aqꞌaꞌ laꞌeq, ri Pablo y ri Silas ndikibꞌen orar y ngebꞌixan ndikiyaꞌ ruqꞌij ri Dios, y ri chꞌaqa chik ri etzꞌapel pa cheꞌ ngekakꞌaxaj.

San Mateo 5:12

Santienta kixkikot porque kin nim rajel-rukꞌexel ndiyoꞌox chiwa chikaj, porque keriꞌ chuqaꞌ xetzeqlebꞌex ri ru-profetas ri Dios ri xekꞌojeꞌ nabꞌey chiwech rix, y xyoꞌox nim rajel-rukꞌexel chake.

Apocalipsis 21:7

Chare ri xtitiker ndubꞌen ri nubꞌiꞌin kan, kin niyaꞌ nojel reꞌ chare, y kin xtiqꞌalajin chi ja riyin ri ru-Dios y ja rijaꞌ ri walkꞌuaꞌl.