1 Pedro 1:3 - Kaqchikel Santo Domingo (Xenacoj)

³ Kin ta xtiyoꞌox ruqꞌij ri Dios, ri ru-Dios y Rutataꞌ ri Qajaw Jesucristo, ke roma ri nimalej rujoyowaxik qawech, xubꞌen chi xojalex chik jumbꞌey, roma ri Jesucristo xkꞌastajbꞌex pe chikikajal ri animaꞌiꞌ. Reꞌ ndubꞌen chaqe chi kuqul qakꞌuꞌx qoyobꞌen ri rusujun kan.

နောက်ထပ်ဗားရှင်းများ

Kaqchikel Santa Maria de Jesus

³ Kayaꞌ rukꞌij ri Dios, ri Rutataꞌ ri Kajaf Jesucristo. Jajaꞌ altíra xujoyovaj kavach, rumareꞌ xutak-pa ri Rucꞌajuol chi xcon y xcꞌastaj-pa chiquicajol ri quiminakiꞌ, chi quireꞌ xuyaꞌ jun cꞌacꞌacꞌ kacꞌaslien ri nuꞌon chika chi kayoꞌien jun cꞌaslic esperanza.

Kaqchiquel Bible

³ Tiqaya' k'a ruq'ij ri ru-Dios y rutata' ri qajaw Jesucristo. Rija' kan janila xujoyowaj qawech, roma ri' xuben chiqe chi xojalex chik jun bey rik'in ri ruk'astajibal ri Jesucristo. Y re' kan nuben k'a chiqe chi k'o jun oyobenri'il qik'in ri man k'isel ta.

Kaqchikel Central Guatemala

³ Nikaya' c'a chuka' ruk'ij ri Dios ri Rutata' ri Kajaf Jesucristo. Rija' can janíla xujoyovaj kavech, romari' tok xutek-pe ri Jesucristo richin chi xquen (xcom) y xc'astej-pe chiquicojol ri caminaki', richin chi xuya' jun c'ac'a' kac'aslen. Y re c'ac'a' kac'aslen re' can nuben c'a chike chi nikacukuba-apo kac'u'x.

Re C'ac'a Testamento pa Kach'abal

³ Takaya' ruk'ij re Dios re Rutota' re Kajaf Jesucristo. Reja' camas xujoyovaj kavach, mare' tak xutak-pa re Jesucristo chin che xcom y xc'astaj-pa chiquicojol re anama'i', chin che xuya' jun c'ac'a kac'aslen. Y re c'ac'a kac'aslen re' nuban chaka che can c'o ka-esperanza,

Kaqchikel Western Solola

³ Nikaya' c'a chuka' ruk'ij ri Dios ri Rutata' ri Kajaf Jesucristo. Riya' can sibilaj xujoyowaj kawech, y rumari' tek xutek pe ri Jesucristo riche (rixin) chi xcom y xc'astej pe chiquicojol ri caminaki', riche (rixin) chi xuya' jun c'ac'ac' kac'aslen. Y re c'ac'ac' kac'aslen re' can nuben c'a chake chi can q'ues chikac'u'x chi koyoben jun nimalaj utzil ri xtikac'ul ri chkawech apo.

1 Pedro 1:3 ပူးပေါင်းရင်းမြစ်များ

San Juan 1:13

Y rejeꞌ xeꞌalex chik jumbꞌey, pero ri alaxik riꞌ ma roma ta kikꞌuan kikikꞌel ri kite-kitataꞌ, nixta roma kirayibꞌel ri kite-kitataꞌ, nixta roma keriꞌ xunojij ri aj rochꞌulew kitataꞌ, xa kin rikꞌin ri Dios pataneq ri kꞌakꞌakꞌ alaxik.

Romanos 12:12

Tzꞌan kixkikot chiroyobꞌexik ri favor nduyaꞌ ri Dios. Tikochꞌoꞌ ri kꞌayew ndiqꞌasaj pa ikꞌaslen, y jumul tibꞌanaꞌ orar.

Romanos 15:13

Y ri Dios ri nditoꞌon kichin ri wineq chin ndikoyobꞌej ri rusujun kan, kin ta xtubꞌen chiwa chi ngixkikot y kin ta xtuyaꞌ chuqaꞌ uxlanen pa iwánima roma itaqin rijaꞌ. Y keriꞌ rikꞌin ri ruchuqꞌaꞌ ri Espíritu Santo, rix rikꞌin nojel iwánima ndiwoyobꞌej ri rusujun kan ri Dios.

Romanos 4:25

Ri Qajaw Jesús xjach pa kamik chutojik ri mak qabꞌanaloꞌon, y xkꞌastajbꞌex pe chikikajal ri animaꞌiꞌ, chin nixta jun qamak ndiqeqalej chuwech ri Dios.

Romanos 5:10

Keriꞌ nibꞌij chiwa, porque atoq kꞌa rojkꞌo contra ri Dios, rijaꞌ xrelesaj ri qamak jachayon qawech rikꞌin y xukꞌen apu qawech, y riꞌ roma ri kamik xuqꞌasaj ri Rukꞌajol. Y kami ke elesan ri mak jachayon qawech rikꞌin, kin más ndiqꞌalajin chi ngojkolotej roma rukꞌaslen ri Rukꞌajol.

Romanos 8:11

Y si kꞌo pa iwánima ri Espíritu chin ri Dios ri xkꞌastajbꞌan pe ri Jesús chikikajal ri animaꞌiꞌ, rijaꞌ ri xkꞌastajbꞌan pe ri Cristo, kin xtuyaꞌ chuqaꞌ rukꞌaslen ri i-cuerpo ri xa ndiken wi e, y keriꞌ ndibꞌanatej porque kin pa iwánima kꞌo ri Espíritu chin ri Dios.

Romanos 8:24

Y roj rukolon chin ndiqoyobꞌej ri qꞌij riꞌ, pero xa ta kꞌo chik qikꞌin ri qoyobꞌen, ¿achike ndikꞌatzin chi ndiqoyobꞌej? Y, ¿achike kꞌa jun ri ndiroyobꞌej ri kꞌo chik rikꞌin? Ma jun.

1 Corintios 13:13

Chupan re tiempo re rojkꞌo, kꞌo oxiꞌ achike pa qakꞌaslen roj wineq ri ma ndikꞌis ta kiqꞌij. Jun ja ri kuqul qakꞌuꞌx rikꞌin ri Ajaw, jun chik, ja ri qoyobꞌen chi ri Dios xtuyaꞌ chaqe ri rusujun, y ri jun chik ja ri ngojojowan rikꞌin nojel qánima. Pero chikiwech ri oxiꞌ riꞌ, ri más kꞌo reqalen ja ri ngojojowan rikꞌin nojel qánima.

1 Corintios 15:20

Pero ri qetzij xbꞌanatej jareꞌ: Ri Cristo xkꞌastajbꞌex pe chikikajal ri animaꞌiꞌ. Ja rijaꞌ ri nabꞌey xkꞌastajbꞌex pe chin jumul chikikajal ri animaꞌiꞌ y romariꞌ qetaman chi ri animaꞌiꞌ ngekꞌastajbꞌex pe chin jumul chuqaꞌ. Rijaꞌ kin achel ri nabꞌey ruwech jun tikoꞌ. Porque atoq ngechꞌupeꞌ ri nabꞌey teq ruwech, qetaman chi kꞌa kꞌo más ruwech ri tikoꞌ ngebꞌechꞌuputej.

2 Corintios 1:3

Kin ta xtiyoꞌox ruqꞌij ri ru-Dios y Rutataꞌ ri Qajaw Jesucristo, porque rijaꞌ Tataꞌaj ri kin ndijoyowan, y Dios chuqaꞌ ri ngojrutoꞌ chupan nojel ri kꞌayew ndiqaqꞌasaj chin ndubꞌochiꞌij qánima.

Gálatas 6:16

Rix ri ikꞌuan ikꞌaslen achel ndirajoꞌ ri kꞌakꞌakꞌ kꞌaslen riꞌ, kin ta xtikꞌojeꞌ pa iwánima ri uxlanen y ri rujoyowaxik iwech nduyaꞌ pe ri Dios, junan kikꞌin ri eqetzij israelitas pa ruwech ri Dios.

Efesios 1:17

Nikꞌutuj chare ri Tataꞌaj Dios ri kin nimalej ruqꞌij, ri ru-Dios ri Qajaw Jesucristo, chi tusipaj nojibꞌel pataneq rikꞌin ri Espíritu Santo chiwa y tuqꞌalajrisaj chiwech ri utzulej runoꞌoj chin ndiwetamaj utz-utz achike rijaꞌ.

Efesios 1:3

Kin ta xtiyoꞌox ruqꞌij ri ru-Dios y Rutataꞌ ri Qajaw Jesucristo, roma ruyoꞌon nojel ruwech favores chin chikaj chaqe roma xe jun qabꞌanun rikꞌin ri Cristo.

Efesios 1:7

Y roma xbꞌiyin ri rukikꞌel ri Rukꞌajol, xojrelesaj pa ruqꞌaꞌ ri tzꞌamayon qichin y xukuy qamak, chin keriꞌ ndiqꞌalajin chi ri favor ruyoꞌon pa qawiꞌ kin nimalej bꞌeyomal.

Efesios 2:4

Pero ri Dios ri kin santienta ndijoyowan, xojrajoꞌ rikꞌin ri nimalej rajowabꞌel rijaꞌ.

Efesios 3:20

Tiqayaꞌ ruqꞌij ri Dios ri nditiker ndubꞌen más chuwech ri achike ndiqakꞌutuj o ndiqanojij, rikꞌin ri nimalej ruchuqꞌaꞌ ri ndisamej pa qánima.

Colosenses 1:23

Pero chin ndibꞌanatej keriꞌ rikꞌin ri ikꞌaslen, ndikꞌatzin chi jumul kuqul ikꞌuꞌx rikꞌin ri Ajaw, kaw rix peꞌel chiraqen, y ma ndiyaꞌ kan royobꞌexik ri sujun chupan ri utzulej teq tzij chin kolotajik ri iwakꞌaxan. Y ja utzulej teq tzij riꞌ ri nditzijox chake konojel wineq chochꞌulew, y riyin Pablo yin okuneq samajel chin ndibꞌa más rutzijol.

Colosenses 1:27

ri achoq chake ri Dios xrajoꞌ xukꞌut ri nimalej ruqꞌij ri bꞌeyomal rukꞌamon pe ri utzulej teq tzij ri ma kin ta qꞌalej rubꞌeyal ojer, y wokami ndajin ruqꞌalajrisaxik chikiwech konojel wineq. Y ri nimalej bꞌeyomal riꞌ ja ri ndikꞌojeꞌ ri Cristo pa iwánima, ri ndibꞌanun chi iwoyobꞌen ri qꞌij atoq ngixbꞌekꞌojeꞌ rikꞌin chupan ri nimalej ruqꞌij.

1 Tesalonicenses 1:3

porque atoq ndiqabꞌen orar chuwech ri Qatataꞌ Dios, jumul ndiqakꞌuxlaꞌaj ri samaj ibꞌanun pe roma kuqul ikꞌuꞌx rikꞌin ri Ajaw y chi ngixsamej chikitoꞌik chꞌaqa chik roma ngixojowan, y chi kin ndikachꞌ ri kꞌayew ndiqꞌasaj roma iwoyobꞌen ri Qajaw Jesucristo.

1 Tesalonicenses 4:13

Hermanos, roj ndiqajoꞌ chi rix ndiwetamaj ri ndebꞌanatej kikꞌin ri xkitaqij ri Ajaw y xeken yan e, chin keriꞌ ma ngixbꞌison koma ri ekamineq achel ngebꞌison ri wineq ri pa kitzij rejeꞌ ma ngekꞌastajbꞌex ta pe ri animaꞌiꞌ.

2 Tesalonicenses 2:16

Y ri Qajaw Jesucristo y ri Qatataꞌ Dios ri xojowan qichin, ri ruyoꞌon ruchuqꞌaꞌ qánima chin jumul, y rubꞌanun chuqaꞌ chaqe chi qoyobꞌen ri kꞌaslen ma ndikꞌis ta ri nduyaꞌ rijaꞌ roma ri ru-favor,

1 Timoteo 1:14

Pero ri Qajaw tzꞌan favor xuyaꞌ pa nuwiꞌ, y xuyaꞌ pa wánima chi kuqul nukꞌuꞌx rikꞌin y chi nginojowan roma nutaqin ri Cristo Jesús.

Tito 2:13

Keriꞌ tiqabꞌanaꞌ ri janipeꞌ tiempo ndiqoyobꞌej ri favor ri rusujun kan ri Dios chi nduyaꞌ chaqe atoq nduqaqa chik jumbꞌey ri nimalej qa-Dios y Qakolonel Jesucristo rikꞌin nimalej ruqꞌij.

Hebreos 3:6

Jakꞌa ri Cristo ma relik ta ok rusamajel ri Dios achel ri Moisés. Ri Cristo kin Rukꞌajol wi ri Dios, y jumul ndubꞌen nojel ri ndikꞌatzin pa ruwiꞌ rutinamit ri Dios, y ri tinamit riꞌ ja roj, si qetzij ma ndiqayaꞌ ta kan chi kuqul qakꞌuꞌx rikꞌin y ngojkikot ndiqoyobꞌej ri rusujun kan.

Santiago 1:18

Y roma keriꞌ xrajoꞌ rijaꞌ, xuyaꞌ ri aj chikaj kꞌaslen chaqe, roma xqataqij ri utzulej teq tzij chin kolotajik ri ndichꞌaꞌa pa ruwiꞌ ri qetzij. Y keriꞌ xojok achel ri nabꞌey teq ruwech tikoꞌ ri ngechꞌup chin ngesuj chuwech.

1 Pedro 1:13

Roma kꞌa riꞌ, utz rukusaxik tibꞌanaꞌ ri inojibꞌal, y kin pa iwuxnaqil tibꞌanaꞌ nojel. Nojel iwánima tiwoyobꞌej ri favor rusujun ri Dios chin nduyaꞌ chiwa chupan ri qꞌij atoq nduruqꞌalajrisaj chik riꞌ ri Jesucristo.

1 Pedro 1:21

Rix roma itaqin ri Cristo, xe chare ri Dios iyoꞌon wi itzij, ri Dios ri xkꞌastajbꞌan e ri Cristo chikikajal ri animaꞌiꞌ y xubꞌen chare chi xkꞌojeꞌ chik nimalej ruqꞌij, y keriꞌ kin rikꞌin ri Dios ikuqubꞌan ikꞌuꞌx y iwoyobꞌen ri rusujun kan.

1 Pedro 1:23

Rix xixalex chik jumbꞌey, pero ri jun alaxik riꞌ, ma achel ta ri alaxik chikiqꞌaꞌ ri ite-itataꞌ ri xa ngeken e, xa kin xixalex roma rutzij ri Dios, ri kin kꞌaslik wi y ma ndikꞌis ta.

1 Pedro 2:2

Achel ri chꞌuteq akꞌolaꞌ ri kꞌa tzꞌun kipan tzꞌan ndikirayij ngetzꞌuman, keriꞌ tibꞌanaꞌ rix. Kin tirayij tikanoj rukꞌiyilen ri ikꞌaslen rikꞌin ri qetzij rutzij ri Dios, chin ngixkꞌiy pa ikꞌaslen, hasta kꞌa kixkolotej na e chin jumul,

1 Pedro 3:15

Pa iwánima tinimrisaj ruqꞌij ri Cristo, rikꞌin ndibꞌen chare chi ja rijaꞌ rajaw ri ikꞌaslen. Kin jumul kꞌes inoꞌoj chin nditzolij ruwech kitzij ri ngekꞌutun razón chiwa chi achike roma kuqul ikꞌuꞌx iwoyobꞌen ri rusujun kan ri Dios.

1 Pedro 3:21

Y achel xkibꞌen ri wineq ojer ri xkikal kiꞌ chupan ri yaꞌ, roj wokami ndiqabꞌen bautizar qiꞌ, chin ndiqakꞌut chi xojkolotej yan chuwech ri castigo nduyaꞌ ri Dios. Ri bautismo ma chin ta nduchꞌajchꞌojrisaj ri qa-cuerpo. Ri bautismo ndukꞌut chi ndiqajoꞌ chi jumul utz rubꞌanun ri qánima chuwech ri Dios, y chi rijaꞌ roj rukolon roma ri Jesucristo xkꞌastej pe chikikajal ri animaꞌiꞌ.

1 Pedro 3:5

Porque keriꞌ ruweqbꞌel kánima xkibꞌen ri loqꞌolej teq ixoqiꞌ ojer, xkikuqubꞌaꞌ kikꞌuꞌx rikꞌin ri Dios y xeniman chikiwech ri kachijil.

1 Juan 2:29

Rix iwetaman chi ri Jesucristo pa ruchojmil ndubꞌen nojel, romariꞌ tiwetamaj chuqaꞌ, chi konojel ri ndikikꞌuaj jun chojmilej kꞌaslen, ndiqꞌalajin chi kikꞌuan ri kꞌakꞌakꞌ alaxik nduyaꞌ ri Dios.

1 Juan 3:3

Y konojel ri koyobꞌen chi keriꞌ ndibꞌanatej, jumul ndikichꞌajchꞌojrisaj ri kikꞌaslen, chin ndikibꞌen chare achel rukꞌaslen ri Jesucristo, ri kin chꞌajchꞌaj wi.

1 Juan 3:9

Konojel ri kikꞌuan ri kꞌaslen nduyaꞌ ri Dios, ma ndikibꞌen chi ta mak, porque ri ru-Espíritu ri Dios kꞌo pa kánima, y jariꞌ ri ndibꞌanun chake chi ma ndikibꞌen chi ta mak.

1 Juan 4:7

Rix ri tzꞌan ngixinwojoꞌ, nibꞌij chiwa: Tiqajoꞌ qiꞌ chiqawech, porque rikꞌin ri Dios pataneq chi ngojojowan. Y konojel ri ngeꞌojowan, kikꞌuan chik ri kꞌaslen nduyaꞌ ri Dios y ketaman runoꞌoj ri Dios.

1 Juan 5:1

Konojel ri ndikitaqij chi ri Jesús jariꞌ ri Jun taqon pe roma ri Dios chukolik ri rutinamit, kikꞌuan chik ri kꞌakꞌakꞌ alaxik nduyaꞌ ri Dios. Y konojel ri ndikajoꞌ jun tataꞌatz, ndikajoꞌ chuqaꞌ ri ralkꞌuaꞌl ri tataꞌatz riꞌ.

1 Juan 5:18

Qetaman chi konojel ri kikꞌuan chik ri kꞌaslen nduyaꞌ ri Dios, ma ndikibꞌen chi ta mak, porque ri Rukꞌajol ri Dios ndichajin kichin, y ri itzel maneq ruqꞌaꞌ chake.

1 Juan 5:4

Porque qonojel ri qakꞌuan chik ri kꞌaslen nduyaꞌ ri Dios, ngojtiker pa ruqꞌaꞌ ri itzel teq rayinik chin ri rochꞌulew, y roj ngojtiker pa ruqꞌaꞌ ri itzel teq rayinik, roma qataqin ri Ajaw.