Jon A-wukurrjinga A-ngurrjinga Jesus Christ (John) 8:32 - Burarra

³² rrapa gun-burral janguny marn․gi nyiburr-ni barra, lika gu-gata wenga gugu gun-mola gu-ni barra ana-gorrburrwa,” a-yinagata a-wena burrwa.

Jon A-wukurrjinga A-ngurrjinga Jesus Christ (John) 8:32 ပူးပေါင်းရင်းမြစ်များ

Metiyu 11:29

Buburr-malcha apula ngaypa jama ngu-jirra, rrapa marn․gi buburr-nipa ngaypa nyanma. Gu-gurdiya ngacha minypa ana-goyburrpa nyiburr-ngurrnga nyiburr-nyilja barra. Ngardawa ngaypa ngu-ngurrnga ngu-dor, rrapa gala wana ngu-negiya ngu-workiya;

Jon A-wukurrjinga A-ngurrjinga Jesus Christ (John) 1:14

Nipa an-gata Wengga ana-garlmuna, minypa an-gugaliya a-ni, minypa wugupa arrkula arr-gurdiya gorlk. Minypa ngayburrpa nyiburr-guna nyibi-nana nipa warrpam an-molamola ngardawa Nyanyapa arrku an-nika An-walkurpa an-ngardapiya, rrapa minypa nipiya gun-gugunggaja gu-rrimarra rrapa gun-burral gu-rrimarra.

Jon A-wukurrjinga A-ngurrjinga Jesus Christ (John) 1:17

Minypa joborr wupa nipa Wangarr a-wuna arrburrwa Mojich (Moses), wurra gun-gugunggaja rrapa gun-burral nipa Jesus Christ guna-ganyja arrburrwa.

Jon A-wukurrjinga A-ngurrjinga Jesus Christ (John) 14:6

Jesus a-yinanga nula, “Ngaypa ana-gorrburrwa jarlakarr, rrapa ngaypa minypa gun-burral janguny, rrapa minypa wanngu gun-guni. Gala ana-nga a-yinmiya a-boy nula Nyanyapa arrku, wurra minyja ngaypa wupa ng-ga.

Jon A-wukurrjinga A-ngurrjinga Jesus Christ (John) 16:13

Wurra nuwurra waypa barra Mern An-mawunga an-gata gun-burral an-gurrimapa a-bengga, nipa nyirr-gurdagurdarra barra warrpam gun-burral janguny. Nipa gala barra a-wengga nipiya wupa nyanma, jarra a-wengga barra a-workiya gun-ngiya minypa nipa a-galiya janguny Wangarr a-wu barra, rrapa gu-ngurrja barra ana-gorrburrwa gun-gapa jurdach gu-yinmiya barra gu-ni.

Jon A-wukurrjinga A-ngurrjinga Jesus Christ (John) 17:17

Wurra aburr-nginyipa burr-nega minypa gu-janguny gu-burral; gun-nginyipa janguny gun-narda gun-burral.

Jon A-wukurrjinga A-ngurrjinga Jesus Christ (John) 6:45

Minypa Wangarr burr-yika aburr-mujaruk ngunyuna aburr-guyinda aburr-wukurrjinga aburr-workiyana, gu-yinaga gu-yurra janguny, ‘Aburr-bulapalawa nipa Wangarr marn․gi burr-nega barra,’ gu-gurda ngacha janguny. Wurra ana-nga minypa a-galiyarra nula Nyanyapa arrku rrapa janguny gu-borrwuja nula, an-gata an-gugaliya rrapa minypa ngaypa nguna-jurrjurrmunga.

Jon A-wukurrjinga A-ngurrjinga Jesus Christ (John) 7:17

Rrapa ana-nga an-gata jal a-ni barra nipa jama a-ji minypa Wangarr gun-nika jal gun-guni, an-gata an-gugaliya nipa burraya marn․gi a-ni barra nula gun-ngaypa janguny minyja Wangarr nyanma wurra waygaji ngaypa nyanma.

Jon A-wukurrjinga A-ngurrjinga Jesus Christ (John) 8:36

Rrapa ny-yinga ny-jata minyja an-guna An-walkurpa wanngu biy-nega, gun-narda minypa gun-burral gun-mola gu-ni barra nggula.

Rowm Aburr-guyinda 6:22

Wurra minypa gun-guniya gugu gun-nerra gala barrwa wana gu-ji ana-gorrburrwa, wurra jarra minypa ana-goyburrpa nyiburr-mujama nyiburr-nirra nula nipa Wangarr, gu-gatiya wenga gun-molamola guna-jeknga ana-gorrburrwa gu-workiya. Minypa Wangarr nyiburr-molamola nyirr-nenga a-nirra ana-goyburrpa nyiburr-yigipa, rrapa minypa wanngu nyiburr-nipa barra nyiburr-workiya.

Rowm Aburr-guyinda 8:15

Minypa nginyipa gala ny-manggarna an-mawunga ana-gata ngacha jimarn jarra n-delipa biy-nengarna nyi-gugurkuja. Gun-narda ngika. Wurra jarra nipa Wangarr biy-wuna nipiya An-mawunga nginyipa barra ny-jaliya wuparnana minypa nginyipa ny-yalkurpa nyi-nirra nula. Gu-gurda ngacha minypa ngayburrpa ngubu-burrmaymburda nguburr-workiya, nguburr-yinaga, “Anya!”

Rowm Aburr-guyinda 8:2

Ngardawa nipiya nyanma Christ Jesus nipa Mern An-mawunga wanngu nguna-negarra ngaypa, rrapa gala barrwa gun-nerra gu-yu apula rraka ngaypa ngu-juwa.

1 Gorint Aburr-guyinda 7:22

Ngardawa an-gata ana-nga mu-ngoyurra ana-werranga ana-gugaliya an-nika an-mujama a-ni nula minypa nipa a-galiyana Wangarr a-gonyjinga nula, wurra nipa an-gata an-gugaliya gugu an-borrmunga a-nirra nula Christ rrapa nipa an-ngurrnga gun-molamola gu-nirra nula. Rrapa an-gata ana-nga mu-ngoyurra gun-molamola gu-ni nula rrapa nipa a-galiyana Wangarr a-gonyjinga nula, wurra gu-gata wenga gugu nipa an-gata an-gugaliya an-mujama a-nirra nula Christ.

Galéychiya Aburr-guyinda 5:1

Ngayburrpa barra gun-molamola gu-ni arrburrwa, gun-nardiya nula Christ arr-jarlapuna arr-menga. Ganapiya, lika buburr-jinyjapa, rrapa gala barra nyibi-yagurrma burrwa aburr-gata minypa jal aburr-nirra ana-goyburrpa barra barrwa nyiburr-bichiya nyiburr-ni.

Galéychiya Aburr-guyinda 5:13

Wurra, jela, worla, Wangarr a-gonyjinga ana-gorrburrwa ana-goyburrpa barra gun-molamola gu-ni ana-gorrburrwa. Wurpa lika gala barra nyibu-borrwa jimarna gun-mola ana-gorrburrwa gun-nerra jama nyiburr-ji barra minypa gun-gatiya ana-goyburrpa gu-galiya yerrcha wupa jal nyiburr-nirra. Wurra jarra jal buburr-ni ana-gorrburrwa gu-gapa gu-guta rrapa gu-gatiya nyanma nyiburr-mujama buburr-ni ana-gorrburrwa.

2 Dimati 3:7

Ji-gata ngacha gama minypa marn․gi jinyu-nirra jiny-bamburda jiny-yorkiya janguny gun-guyinda, wurra jarra gala jiny-yinmiya gu-malawa gun-ngiya gun-burral. Ji-gurdiya ngacha aburr-gata aburr-guyolkiya aburr-nyala jibu-yolkaja aburr-workiya.

Jeymch 1:25

Wurra joborr gun-molamola warrpam gun-gata wanngu gun-gunega ana-nga minyja galginy a-dericha gu-na a-bamba joborr rrapa gu-borrwapa a-bamba, minypa gala borijipa a-galiya rrapa yibirrich a-bamapa, wurra jarra gu-rrimapa a-ni, an-gata an-gugaliya an-molamola a-ni barra a-workiya. Minypa gun-gata gun-nga nipa jama a-jirra, nipa Wangarr ana-nyala a-gunggaja barra nula a-workiya rrapa minypa gun-molamola gu-nega barra nula.

Jeymch 2:12

Wurra buburr-jarlapiya ana-goyburrpa nyiburr-yinmiya barra nyiburr-wengga rrapa nyiburr-yinmiya barra nyiburr-bamba nyiburr-workiya. Bubu-borrwa buburr-boy joborr gun-gata wanngu gun-gunega. Ngardawa gu-gurdiya ngacha minypa jurdach guna-bamburda nipa Wangarr nyirr-na barra a-yinmiya barra a-wengga ana-gorrburrwa ngardapa ngardapa.

1 Birta 2:16

Nyiburr-molamola buburr-rrigirrga minypa Wangarr gipa baywarra gu-negarra ana-gorrburrwa gun-nerra nyibi-rrimarra. Wurpa lika gala barra nyibu-borrwa, jimarna gun-mola ana-gorrburrwa minypa mu-nguy ana-goyburrpa gun-nerra jama nyiburr-jingin. Wurra nyiburr-nipa barra minypa ana-goyburrpa Wangarr nyiburr-yika nyiburr-mujama jarra.

2 Jon 1:1

Mun-guna jurra ngaypa ng-guna ngu-wukurrjinga ana-gorrburrwa, ng-gunaga ngu-murnangana. Bambay, a-jay, gun-guna janguny ana-gorrburrwa, minypa nginyipa rrapa aburr-nginyipa gu-ngarda yerrcha nyiburr-garda minypa ngaypa gun-burral jal ngu-nirra ana-gorrburrwa. Minypa ngaypa ngardapa ngika, wurra aburr-werranga aburr-jaranga minypa gun-burral janguny gubi-rrimanga birripa burr-guta jal aburr-nirra ana-gorrburrwa.