1 Dimati 4:7 - Burarra

⁷ Wurra bawa janguny gu-gata ngacha minypa ana-gugaliya nyanma aburr-weya aburr-workiya borijipa gun-guyolkiya. Nginyipa jarra Wangarr gun-nika rum derta nyi-negiya barra ny-yorkiya.

1 Dimati 4:7 ပူးပေါင်းရင်းမြစ်များ

Jama Aburr-ji 24:16

Rrapa gun-narda nula ngaypa ngu-jarlapiya ngu-workiya barra minypa wuparnana ng-galiya apula ngu-workiya minypa ngaypa ngu-molamola nula Wangarr rrapa ngu-molamola nula an-gugaliya.

1 Dimati 1:4

Gala barra marr nula gubu-ma rrapa minypa aburr-wengganachichiya aburr-workiya janguny gu-gata ngacha minypa ana-gugaliya gu-barripurda a-workiya, rrapa mola minypa aburr-birripa mu-ngoyurra aburr-guyinda ana-nga birripa. Wurra janguny gu-gurda ngacha borijipa, minypa ngarndarrk ngarndarrk gun-gunegiya gala ana-nga gu-barripa gun-burral. Wurra jarra birripa barra jama aburr-ji Wangarr gun-nika minypa marr aburr-balcha barra nula nipa.

1 Dimati 1:9

Wurpa lika ngarripa marn․gi minypa gun-gata joborr gun-guyinda nipa Wangarr gala gu-barnjingarna burrwa aburr-gata minypa jechinuwa aburr-nirra nula; ngika aburr-gata. Wurra jarra joborr gu-barnjinga marn․gi gun-gunega burrwa aburr-gata minypa mari aburr-bama gala aburr-galiya nula aburr-workiya; aburr-gata minypa Wangarr gun-nika gala gubu-borrwa nula, wurra gun-nerra jarra gubu-bitimanga aburr-workiya; aburr-gata minypa gala jal aburr-ni nula Wangarr rrapa minypa gala abu-borrwa aburr-workiya; aburr-gatiya gu-galiya yerrcha minypa burrbu-burnda nyanyapa burra rrapa mampa burra, rrapa aburr-boya, an-gugaliya abu-burnda aburr-workiya;

1 Dimati 2:10

Gun-narda ngika. Wurra jarra mu-gama yerrcha barra aburr-molamola aburr-negiya aburr-workiya minypa jama aburr-ji barra aburr-workiya gun-molamola gun-gugunggaja. Gu-gurdiya ngacha gun-molamola burrwa mu-gama yerrcha aburr-gata minypa aburr-ngurrjiya aburr-workiya marr aburr-balcharra nula Wangarr.

1 Dimati 3:16

Minypa gun-gata nula janguny meyali wana gun-bapala; wana an-bapala jarra — nipiya Christ Jesus. Minypa nipa ngubi-nana an-gugaliya a-ni, rrapa minypa Mern An-mawunga arr-gurdagurdarrana, marn․gi nguburr-ni nula ngardawa Wangarr an-nika An-walkurpa. Minypa waykin wenga an-mujaruk an-guyinda ana-nana ana-ni, rrapa minypa gun-guna rrawa janguny gu-barrjekarra, gu-werranga gu-werranga gu-rrawa aburr-galiyana nula. Minypa gu-rrawa marr aburr-balcha nula, rrapa minypa Wangarr a-menga, a-ganyja waykin.

1 Dimati 4:8

Ngardawa gun-gata minypa an-gugaliya merdamirda derta mu-nenga nula a-workiya, gun-narda marr gu-yinaga gun-molamola nula an-gata, minypa gu-gurdiya gu-rrawa. Wurra gun-gata minypa an-gugaliya derta a-negiya a-workiya Wangarr gun-nika rum, gun-narda jarra gun-molamola. Ngardawa Wangarr gochila an-dana wanngu gun-guni, minypa gun-guna rrawa rrapa mola waykin.

1 Dimati 6:11

Wurra nginyipa ny-jurda Wangarr biy-yika nyi-gugaliya, bawa gu-gata ngacha gun-nerra. Wurra jarra gun-molamola bitima rrapa minypa jechinuwa ni nula Wangarr. Janguny rrimapa mungba rrapa gurrurta rrima burrwa gu-galiya yerrcha. Jinyjapa workiya rrapa minypa gala barra marr nula ny-ma an-nga rrapa ny-yorija, wurra ny-molamola nipa workiya.

1 Dimati 6:20

Dimati, a-lay, jaga gana nula gun-gata Wangarr murna biy-wuna janguny. Bawa gun-gata minypa aburr-werranga borijipa aburr-wengganachichiya aburr-workiya Wangarr nyanma ngika rrapa minypa gala gubi-yagurrma nula gun-nigipa janguny. Birripa ngardawa gun-nerranga gubu-borrwuja aburr-workiya, jimarna bama aburr-yinaga marn․gi gun-guni gubi-rrimanga, wurra gun-guyolkiya jarra. Gu-gurdiya ngacha aburr-werranga aburr-lijiwarriyana, gun-gata gun-burral janguny gubu-morrarna — gun-burral janguny gun-gunaga, ngarla, minypa ngayburrpa ngubi-rrimanga. Ganapiya nggula janguny, a-lay. Bobo. Ngun-anya wugupa ana-gorrburrwa.

1 Dimati 6:3

Ana-nga an-gata minypa gun-nerranga janguny a-weya a-workiya rrapa minypa gala gu-yagurrma nula an-ngayburrpa Bunggawa Jesus Christ gun-nigipa gun-burral janguny gun-gata ngayburrpa ngubi-rrimanga,

1 Dimati 6:5

rrapa minypa gochila aburr-rrongga burrwa aburr-workiya gu-gapa gu-guta; gu-gurda ngacha. Minypa aburr-lijiwarriyanapa, ganapiya, gun-nerra wupa gubi-rrimanga. Minypa gubu-morrarna gun-burral janguny, wurra rrupiya wupa mbi-borrwuja aburr-workiya, jimarna Wangarr gun-nika birripa aburr-yinmiya barra jama aburr-ji rrapa minypa rrupiya wana mbi-ma.

2 Dimati 2:16

Burr-bawa aburr-gata minypa borijipa aburr-wengganachichiya aburr-workiya Wangarr nyanma ngika. Ngardawa aburr-gata minypa aburr-yinagata aburr-workiya, birripa minypa mu-nguy aburr-lijiwarriya aburr-bamburdapa aburr-workiya,

2 Dimati 2:23

Bawa gun-gata minypa aburr-werranga aburr-wengganachichiya aburr-workiya borijipa gun-nerra. Bawapa gun-gata. Ngardawa nginyipa marn․gi minypa birripa aburr-yinagata aburr-workiya aburr-wengganachichiya borijipa gun-nerra, gu-gatiya wenga rrapa aburr-bachirramiya burrwa aburr-workiya gu-gapa gu-guta.

2 Dimati 3:12

Minyja borrwa: Ana-nga an-jaranga jal a-ni barra Wangarr gun-nika gu-bitima, minypa marr a-balcharra nula Christ Jesus, nipa jarra aburr-werranga mari gubu-garra barra nula an-gata an-gugaliya.

2 Dimati 3:5

Aburr-ngunyangunyjiya barra rrapa aburr-gurdagurdarriya barra aburr-workiya, jimarna Wangarr gun-nika janguny gubi-rrimanga. Wurpa lika gala gubu-borrwa gun-nigipa ganyjarr gun-gata, jimarn jarra aburr-ngukurdanyjiyarna rrapa aburr-geka aburr-nirrarna; gun-narda birripa gala jal aburr-ni. Burr-bawa aburr-gurda.

2 Dimati 4:4

Gun-burral janguny gubu-bawa barra, wurra minypa ana-gugaliya gun-nika aburr-galiya barra aburr-workiya.

Daytach 1:14

Birripa gala barra gubu-borrwa gun-gata gun-guyolkiya gun-guyinda janguny Ju yerrcha gubu-ngurrjinga aburr-workiya. Gala barra gubu-borrwa ana-gugaliya gun-nika joborr, ana-gatiya gun-nika wupa joborr an-gata minypa ana-ngoyurra gu-yerrnyjinga a-workiya gun-burral janguny.

Daytach 2:12

Rrapa gu-gatiya ngacha gun-gugunggaja nipa minypa marn․gi marn․gi arr-nenga gu-nirra rrapa gu-guna gu-yika gu-rrawa gun-nerra ngayburrpa ngubu-bawujapa nguburr-garlmiyapa nguburr-jarlapiya nguburr-bamburda rrapa jechinuwa nguburr-nirra burrwa wurra gama gorlk, rrapa minypa Wangarr ngubu-borrwuja nguburr-nirra gun-guna rrawa burdak ngayburrpa nguburr-nirra.

Daytach 3:9

Wurra ny-jarlapiya barra nula gun-gata minypa borijipa aburr-wengganachichiya aburr-workiya gu-gapa gu-guta rrapa gubu-yopurda aburr-workiya aburr-birripa mu-ngoyurra aburr-guyinda birripa aburr-ngiya rrapa aburr-bachirramiya burrwa gu-gapa gu-guta rrapa ngarndarrk ngarndarrk aburr-negachichiya joborr nula. Gu-gurda ngacha bawa! Gun-nerra. Gala barra gun-molamola guna-jeka gun-gata.

Yibru Yerrcha 5:14

Wurra aburr-werranga aburr-gata balaja mbi-banga aburr-workiya, birripa minypa gipa wana aburr-ni. Gun-narda gun-maywapa minypa gun-burral gu-galiya yerrcha gubu-borrwurra aburr-workiyana janguny, yanma derta aburr-negiyana rrapa marn․gi gun-ngiya minypa gun-mola rrapa gun-ngiya gun-nerra.