Хуули дабталга 30:5 - Библи

⁵ Элинсэг хулинсагайтнай газарта Эзэн таанадые асарха, тэрэ газар дахин танай болохо. Эзэн таанадта үршөөл хайраяа бэлэглэжэ, үбгэ эсэгэнэрһээтнай үшөө үнэр баян, амжалта түгэс таанадые болгохо байна.

Хуули дабталга 30:5 ပူးပေါင်းရင်းမြစ်များ

Ерэмияа 29:14

Тиимэ даа, таанад Намайе олохот гээд Би айладханаб. Тарааһан бүхы орон нютагууд, бүхы газарнууд сооһоо таанадые Би суглуулхаб, тиигээд сүлэлгын урда тээ байһан газартатнай һөөргэнь бусаахаб. Энэ болбол Би, Эзэн, айладхана мүн!» гэнэ.

Ерэмияа 30:3

Юуб гэхэдэ, Өөрынгөө арадые, Израиль болон Иудын хан түрые һэргээн бодхоохо сагни дүтэлжэ байна. Элинсэг хулинсагтань үгэһэн газарта тэдэниие бусаан асархаб, тиихэдэм тэдэ тэрэ газар дайдые дахин эзэмдэн ажаһууха. Энэ болбол Би, Эзэн, тунхаглана мүн!

Ерэмияа 33:9

Иерусалим хадаа баярай, нэрэ хүндын һүлдэ боложо, Би тэрэнээр омогорхон байхаб. Иерусалимай түлөө Минии хэһэн һайн һайхан хэрэгүүд тушаа, энэ хотодо үршөөһэн Минии хэрэгүүд тухай дэлхэйн үндэһэ яһатан бүхэн дуулажа, айха, шэшэрхэ.

Эзэкээл 36:11

Улад зон, адууһа мал олошорхо, үнэржэн үдэн байха. Иигэжэ таанад хаясаанай бэшэ, олон зоной орон нютаг болохот. Би таанадые урданһаа үшөө ехээр үршөөхэб. Тиихэдэм Намайе Эзэн гээд мэдэдэг болохот.

Эзэкээл 36:37

Намһаа дахин туһа гуйхыетнай, хонин һүрэг мэтээр олошорхыетнай Би зүбшөөхэб.

Тоололго 10:29

Моисей мидиан үндэһэ яһанай болохо хадам эсэгэ Рэүһээлэй хүбүүн Хобаабта иигэжэ айладаба: – Бидэндэ үгэхэб гэжэ үбгэ эсэгэнэртэмнай үгэеэ үгэһэн Эзэнэй газар тээшэ бидэнэр ошожо ябанабди. Ши бидэнтэй ябалса, ушар юуб гэхэдэ, Эзэн израильшуудта олон һайн юумэ найдуулаа, шамдашье һайн юумэн хүртэхэ.

Хуули дабталга 13:17

Тэрэ усадхагдаха юумэнһээ юундэньшье гар бү хүрэгты. Тиигэбэлтнай, Эзэнэй уур хилэн намдажа, Тэрэ таанадта үршөөл үгэхэ, хайрлаха, үбгэ эсэгэнэртэтнай тангариглаһанайнгаа ёһоор, таанадые үнэр арад болгохо.

Хуули дабталга 7:13

Тэрэ таанадта дуратай байха, үреэхэдэнь, улад зонтнай олошорхо, олон үхибүүдтэй болохот; газар таряалангыетнай үршөөхэдэнь, талха таряатай, үзэмэй дараһан архитай, олива тоһотой байхат; бодо болон жэжэ малайтнай түл олошорхо. Үбгэ эсэгэнэртэтнай тангариглан, үгэхэб гэжэ найдуулһан тэрэ газарта бүхы үршөөл хайрануудынь таанадта хүрэхэл.