Ерэмияа 23:17 - Библи

¹⁷ Минии үгэ дуулахаһаа арсадаг зондо тэдэ «Амар амгалан байхат» гэжэ хэдэн дахин хэлэжэл байна. Үсэд, һанаашаараа юумэ хэдэг зондо «гай тодхор таанадтай тохёолдохогүй» гээд хэлэнэ.

Ерэмияа 23:17 ပူးပေါင်းရင်းမြစ်များ

2 Хаан түрэнүүд 12:10

Тиимэ ушарһаа одоо шинии уг удамһаа хэн нэгэн заабол хүндэ хороолгожо үхэдэг байха. Иимэ юумэн хэтэ мүнхэдөө үргэлжэлхэ. Юуб гэхэдэ, ши Намда хайхарамжагүйгөөр хандажа, хээт хүн Урияа гэгшын һамгые өөрын һамган болгон абаа бэлэйш.

Исай 30:10

Тэдэ үзэлшэдтэ «үзэл бү үзэгты» гэнэ, мэдэлшэдтэ «мүн болохо юумэ бидэндэ бү харуулагты, бидэнэй дуулахаяа һанаһан юумэ хэлэгты, аятай юумэ мэргэлэгты.

Исай 57:21

Нүгэл хилэнсэгтэй зондо ямаршье амар амгалан байхагүй». Иигэжэ Бурхамнай айладхажа байна.

Ерэмияа 13:10

Энэ муу арад зон Минии үгэ дууланагүй. Тэдэ үсэд зантай, ондоо бурхадта шүтэн мүргэнэ, ондоо бурхадые хүндэлнэ, урдань һүгэдэн унана. Тиимэһээ тэдэ болбол энэ ямаршье хэрэггүй бүһэдэл адли болохо.

Ерэмияа 18:12

Теэд тэдэ: «Үгы даа! Бидэ һанаһаараа юумэ үйлэдэхэбди, үсэд, муу байһаараал байхабди», – гэжэ хэлэхэл.

Ерэмияа 18:18

Байһаар улад зон иигэжэ хэлсэбэ: «Ерэмияагай урдаһаа хамтарая! Маанадта хуули ёһо зааха санаартад, зүбшэл үгэхэ сэсэн мэргэшүүл, лүндэншэд хододоо байхал. Тэрэниие улаан хэлээрээ даража, хардая, хэлээшыень анхархаяа болие!»

Ерэмияа 3:17

Тэрэ үедэ Иерусалим Эзэнэй хан шэрээ гэжэ нэрлэгдэжэ, Намда мүргэхэеэ бүхы уласууд тэндэ сугларха. Тэдэ өөһэдынгөө муу муухай зүрхэ сэдьхэл шагнахагүй, тэрэниие дагахагүй.

Ерэмияа 4:10

Тиихэдэнь би: «Оо, Хүсэн Түгэлдэр Эзэн! Та Иерусалимай арад зониие үнэхөөр лэ мэхэлээт! Амар амгалан байхат гэжэ тэдээндэ хэлээ һэнта, теэд хоолойдонь мүнөө эритэ табяатайл», – гэжэ хэлэбэб.

Ерэмияа 5:12

Израилиин болон Иудын зон Эзэниие буруушаажа, иигэжэ хэлээ: «Тэрэ үгы! Гай гасалан бидэнтэй ушархагүй, дайн дажар, үлэсхэлэн хооһон байдал үзэхэгүйбди».

Ерэмияа 6:14

Арадаймни хүндэ шархануудай багахан шулгархай байһан мэтэ тэдэ хайша хэрэгээр тэрэнииень эмшэлнэ. «Бүхы юумэн һайн» гээд тэдэ хэлэнэ. Теэд һайн юумэн үгы!

Ерэмияа 7:24

Гэбэшье тэдэ Минии үгэ дуулаагүй, анхаралаа хандуулаагүй, харин үсэд, муу сэдьхэлэйнгээ табисуураар ажаһуужа, өөһэдыгөө хойшо татаба.

Ерэмияа 8:11

Минии арад зоной шархые оройдоол багахан шулгархай мэтээр эмшэлнэ. «Бүхы юумэн һайн» гэлдэхэ, харин һайн юумэн үгыл.

Ерэмияа 9:14

Харин үсэрхэжэ, үбгэ эсэгэнэрэйнгээ һургаһанай ёһоор Баалда мүргэн-шүтэн байба.

Гашуудал 2:14

Лүндэншэдшни шамда дэмы юумэ, худал хэлэжэ байгаа, шинии нүгэлнүүдые буруушаагаагүй, баряанда туугдан ошохыешни болюулаагүй. Тэдэ шамда худал хуурмаг үгэнүүдые хэлэжэ, туугдан ошохо туйлдаш хүргөө.

Эзэкээл 13:10

Бүгэдэ юумэн амгалан тайбан гэжэ хэлэн, тэдэ Минии арад түмэниие мэхэлнэ. Амгалан тайбан юумэн үгы! Арад зоноймни бата бэшэ хана барихадань, тэдэ ерэжэ сагаанаар будана.

Эзэкээл 13:19

Адха таряанай, зүһэм хилээмэнэй түлөө таанад Намайе арад зоноймни урда бузарланат. Амиды мэндэ үлэхэ зониие аланат, үхэхэ зониие амиды байлганат. Арад түмэндэм худал юумэ дуулганат.

Эзэкээл 13:22

Минии дайрангүй орхихоёо һанаһан арюун сэбэр ябадалтай зондо таанад һаад хэнэт. Харин муу муухай ябадалтай зониие муу ябадалтай зандаа үлэхэдэнь урмашуулжа, дэмжэжэ байнат.

Амоос 9:10

«Гай тодхор болохогүй, маанадта тэрэ хүрэхэгүй» гэжэ арад түмэнэйм дундаһаа хэлээшэ нүгэлтэд бултадаа һэлмээр сабшагдаха!

Михей 2:11

Һалхин мэтэ хүн, таанадай һанаае худалаар тэгшэлжэ, «үзэмэй дараһан архи тухай болон үшөө дахин үзэмэй дараһан архи тухай!» гэжэ хэлэжэ байгааша хүн һанаандатнай таараха байгаа.

Михей 3:11

Бэлэг абажа, удамаршадынь сүүд үйлэдэнэ, түлбэри абажа, санаартадынь һургаал заана, мүнгэ абажа, лүндэншэдынь лүндэн табина. Тэдэ бүгэдэ «Эзэн бидэнтэй хамта! Гай тодхор бидэнтэй болохогүй!» гэлдэн, Эзэндэ түшэглэнэ.

Михей 3:5

Эдилгэ үгэдэг зондо амгалан тайбаниие худал найдуулжа, эдилгэ үгэдэггүй зондо дайн дажар болохо гэжэ һүрдөөжэ байгааша худалша лүндэншэд арад зониием мэхэлнэ. Эзэн эдэ лүндэншэдтэ иигэжэ айладхана:

Цэпаанияа 1:12

Тэрэ сагта Би дэн абаад, Иерусалимые нэгжэн харахаб. Сайн шаара мэтэ үлдөөсөөрөө сэдьхэлээ ханаад һуугааша, «Эзэн һайншье, муушье юумэ хэдэггүй» гэжэ һанажа байгааша зониие Би хэһээхэб.

Захарияа 10:2

Онгонууд ерээдүй саг тушаа таамаглана. Мэдэлшэбди гэдэгүүд худал үзэгдэл хаража, хуурмаг зүүдэ үзэнэ. Тэрэнь ямаршье ашагүй. Тиимэһээ хүнүүд хонин мэтэ төөрин, туһа эрин хашхаралдана. Теэд тэдэниие дахуулха хонишон байхагүй.

Малаахи 1:6

Минии нэрэ дарадаг санаартад, «Хүбүүниинь эсэгээ, зараса эзэнээ хүндэлдэг. Би эсэгэтнай болодог юм һаа, Намайе хүндэлһэнтнай алин гээшэб?» гэжэ Түмэн Сэрэгтэ Эзэн таанадта айладхажа байна. Харин таанад «Бидэ Танай нэрэ яажа доройтуулаабибди?» гэжэ асуудагта.

Тоололго 11:20

бүхэли һара эдихэт. Танай дунда байгааша Эзэниие буруушаажа гэмэрэлдэһэнэйнгээ түлөө эдихэт тэрэниие ойгоо гутатараа, бөөлжэтэрөө. «Египедһээ бидэнэр юундэ гаража ошоо гээшэбибди?!» – гэлдэн, Эзэнэй урда уйлалдаат.

Лука 10:16

Түлөөлэгшэдни, таанадые шагнажа байһан хүнүүд Намайешье шагнана, таанадые буруушааһан хүнүүд Намайешье буруушаана. Харин Намайе буруушааһан хүнүүд Намайе иишэ эльгээһэн Бурханиие буруушаана, – гэжэ хэлэбэ.

Хуули дабталга 29:18

Эзэн Бурханаа орхиһон эрэ хүн гү, али эхэнэр, гэр бүлэ гү, али обог аймаг таанадай дунда бү үзэгдэг. Ондоо арадуудай бурхадта һүгэдэхэеэ хэншье бү ошог, юуб гэхэдэ, иимэ зон хоротой, гашуун ургамалай үндэһэндэл адли болоно бшуу.

Хуули дабталга 29:19

Энэ хараал шэрээл дуулажа, хэн нэгэн досоогоо бардамлажа, «Һанаһаараа юумэ саашадаашье хэжэ байхаб, муу юумэн намда хүрэхэгүй» гээд һанажа болохо. Теэд иимэ хүнһөө боложо, ондоошье зон муу юумэндэ дайрагдажа магад.

Фессалоникиинхидтэ 1-дэхи 4:8

Тиимэһээ энэ һургаал буруушааһан хүн болбол хүниие буруушаана бэшэ, харин таанадта Арюун Һүлдэеэ үршөөжэ байгаа Бурханиие буруушаана.

1 Хаан түрэнүүд 2:30

Шинии гэр бүлэ болон үри һадаһаншни Минии урда хэтэ мүнхэдөө санаартад ябаха гэжэ Би, Израилиин Эзэн Бурхан, найдуулаа бэлэйб. Теэд мүнөө иимэ юумэн дүүрээ гэжэ айладханаб! Юуб гэхэдэ, Намайе хүндэлдэг зониие Би үргэхэб, Намайе баһадаг зондо хараал хүртөөхэб!