16 pantomo mainca ci coufalisai: panto h'unasi ci cou ihe yainca: <'e cihi cimo yaa kuisi ci cou teeno ahtu meelʉ peismi tamo maica ci po'e?> micu i'mi tan'e ho yupa 'eehcʉvho.
temula taa'uzva a'o, mi'o no'ayumonʉ to nsou to amo, 'o amo mo no'ayumonʉ ta nsou'u; hoci o'te taa'uzva 'e e'e eni, 'atemueno mako nomio ta os'o hioa ho taa'uzva a'o.
hoci mo'u o'te yonta taicohe ho hioa 'o o'amocu ohola ahta hioa ci hi'hioa, uk'a ci tehe nama kuisi. na a'ʉmtʉsi, ohecu aiti 'o o'u hioa, ihec'on'a sʉ'nova a'o, yaeza sʉ'nova 'o amo'u.
na eni ohsi ahoza hioa to iesu ci po'e, ohsi hioa to hosa ta kaana ne ngalilaya. na eni isi pa'teni na psoevohngʉsi; 'o tesisi mo acʉhʉ tmaa'uzo to iesu.
at'inghi te'o meelʉ tuyafo tamo asuhcuhe yaa tonʉ to yohane ci 'akasi, 'ai'ecueno hi'hioa'u. 'ai'o isieno toveineni a'o to amo'u ho poa aepʉngneni ci hi'hioa. 'e hi'hioa eni te peelʉicu 'akasi ho isi popeoskuna to amo a'o.
hoci yono 'ansokunici ho hioa ta cou na s'e'honga, na atuhcusi te noʉt'ʉci 'o hoolicu to moose, hocieno maica, ho mi'o yonta 'ansokunici ho a'sʉftona poa yov'o yoayokeo 'emo cihi ci cou, mainci temu aac'o yu'hanga a'o?
