'e mamespingi ho tec'u mon'ia peyafa na foinana la ma'tipvongʉ, maica ho te esmi 'o 'atutumzo; at'inghi ho isicu peyafa 'o foinana tec'u acʉha ta'payo'a na 'atutumzo, maica ho isi kaebeni homo yayo ta hpʉhpʉngʉ 'e foinana.
'ela buhpotfʉngʉ to hamo ci cou, aiti, temu yohzʉ. te mcoi! maica i'o o'ula afu'a hioa ta 'ayumonamu ne mio, 'upena hoci pano mo mi'usnu muu ho eʉsvʉsvʉta, lamu conino o'te taa'uzva!>
to hiesi no i'vaho cmʉ'ho 'o nooe'oca, 'emo maica ci cou tena noa patvovei, 'auesiesi aapayo'ʉ. tahesa to tuhcu to nooe'oca, mongoi to psoevohngʉ ci tonʉ to hamo.
mimu esmi ta 'oyona yu'eteuyunu 'aveoveoyʉ to pehoza ci 'o'oko to hamo, 'o ongko tamo maica ci mapepehoza isicu acʉha tposi ne pepe. mimu esmi ta tuhcu tola yʉsvʉtʉ ta yatatiskova ci hamo, esmi to micu a'sʉftonʉ ehcʉ'ho to moulʉlʉ ci piepiya.
homoeno maica, hocito peaezoni 'emo maica ci taunona'vʉ ci to'usnu, teenana meelʉ pkaako no patvovei? 'o nooe'oca isi ahoza iachia psoevaha 'e to'usnu eni; ohe yaeza mi'usneni a'to ho soomei to moso tmac'ʉhʉ ci cou.
