nomio a'o, tenahe e'usna to le'aʉt'ʉcʉ ho ito tuhcu to honte na muu ho tuucocosi, tamu mi'usnu to le'aʉt'ʉcʉ ho honte ho ito couyafana ho 'akasi 'e fukuin.
lasi smoyoa to helote 'o yohane, isi cohivi 'o yohane mo mousʉngcʉ ho socofkoya ci cou, lasi bu'a'aʉt'ʉca 'o yohane. cono holasi talʉi to helote 'o lasi hia eʉsvʉsvʉtʉ to yohane, la na'no 'oha ma'sususeomʉ, at'inghi lasin'aso ʉmnʉa talʉi 'o lasi hia eʉsvʉsvʉtʉ.
cu elʉa, isicu hafa uhne 'antia. mo aʉlʉ cono tonsoha, 'emo yoso la noteuyunu to sinto to kiokai, po'pa'cohivi 'emo botngonʉ ci cou. 'e sinto ho lahe yainca mo aʉlʉ ahoi ta 'antia.
isi yaeza yue'engha to poolo na mou'ʉmnʉ, ma'tʉkcʉ, ho ina hia ma'cohio no yʉsvʉta ho noana'o. mo na'no ma'sasmoyo 'o fuilisu; mi'usni 'o poolo ho yainca:
yut'inga to poolo: <'upena hoci'u ekakutia ho eman'i, 'e os'o eoho'neni to hamo. 'aeno suu ho i'e mo afu'u yontan'e ho tmalʉ ta e'e'u ci cou te acʉhʉ totiski a'o, at'inghi o'ate 'ahʉyʉ maezo a'o ho mahafo ta ekʉka!>
imza acʉha hopsʉpseni 'ola afu'u nootoefʉngʉ ho h'oinveni ci hi'hioa, o'ala hioa 'omo moezʉezʉhʉ ci hi'hioa, yaeza o'ala eknon'a 'o e'e to hamo. yonto tuhcu to hamo. lamza epopayoa 'e so'emio, ieni ta iachi peipeis'ausna ho paavi na ʉmnʉ ci 'tohʉngʉ ta macicihi.
