'ote ma'unano zou'so maameoimu 'o 'avulahamu ho yainca te meelʉ totoefʉngʉ no yʉsvʉta. te'o eʉsvʉta muu, 'o hamo te meelʉ mayo ta fatu tan'e ho mooyai no tesi mʉntʉ'ca to 'avulahamu!
zou cihi cila ma'po'ʉ'ʉmtʉ ci cou; 'o conosi emoo la acʉhʉ m'ohkuyu to hamo, la asngʉcʉ to'usnu tola thi'cia ci couyutaya, a'vinano asno'zonʉ mi'usnu to hamo ho 'inoli.
ataveisi ne micu aemo'ʉ. botngonʉ ci couyutaya ho i'omo bi'usnu to yutayakio ci couyafana mo to'ofeihni to poolo ho panapa, ihe cucufni tamo yoso ci sitoo la a'cʉ'cʉnʉ noe'ocʉ to mengumi to hamo.
at'inghi, 'o poolo ho panapa nama mo asuhcu e'ʉ'ʉteʉ ho yainca: <'o e'e to hamo te ahtao'te aueva psoecʉ'ha muu. at'inghi, o'a imu tiova, iachi ma'unano o'amo 'aseolʉ no mayo no 'auesiesi nsou. ko'koeno, temia mongoi muu, uhto 'ayumona to couyafana;
mo apaezumo to'ofeihni a'mi ho ito poolo, moozoyʉ ho mainca: <'emo maica ci cou zou soskuskunu to sopepea ci hamo, te mi'usnu muu ho epeaska 'o ceonʉ no to'usnu!>
'o taisaisi ho i'o acʉcʉhʉ ci yane ngikai tehe peelʉi soomei 'e e'e'u ho mio a'ʉmtʉ maica, mo'u i'mi to emucuhe ho mayo to tengami ho faeni to mo yone tamasuko ci couyutaya, mi'ocu ko'ko meelʉ uhne'e ho tʉtpʉta 'emo tmaa'uzo ci cou, seo'eisi ho hafa yuovei ta 'elusalemu.>
'amimueno maezo maica: ne ohmucu tac'ʉhi 'o e'e ta so'emio, 'aeno ne ohmucu tac'ʉhi 'ete to'usnu ci fukuin, mimucu tmaa'uzo to kilisto, i'o ohsila teomneni to hamo ci seilei isicu faeni muu, teyai huomza ho mimu tma'usnu to kilisto.
to ahoisi, ne ohcu psoecʉ'ha muu 'e fukuin, imucu talʉi 'e isi hafa ta fukuin ci ta'usni. maicac'o, ina singkoo ho himngonghimu mo acʉhʉ i'tohungu ta isi songacveni muu ne pepe ci ta'usni.
