homio, 'o huomza no cmʉ'ho 'o okocou te yuyafo ta engʉca. 'e masusuezopʉ ho yatatiskova ta ceoa te acʉhʉ mongsi; tehe aiti 'o okocou te mahafo to a'sʉftonʉ ci tonʉ ho psoevohngʉ. poʉt'ʉcʉ to cmʉcmʉ i'mi ta pepe ho ohpueho.
homoeno maica, na suu, mainci eayaezoya na nanat'ot'ohaesasu? mainci potfʉnga na nanat'ot'ohaesasu? tatola acʉhʉ yac'ʉ no tuhcu to hamo ho tiou no tesi hia yʉsvʉtʉ;
maica, hotena afu'u mashʉyʉ 'o nooe'oca, i'nʉskʉ moozoyʉ 'o tensicoo, i'nʉskʉ muni 'o la'pa to hamo, te iachi i'mi ne pepe 'o nooe'oca ho ohpueho, ho mio; i'o mosola tmaa'uzo to kilisto hocu mcoi ci cou te auyu smoevovei.
isi psoevoveiya 'o tiskova to hamo, yaeza a'sʉftona psoe'ongka 'o atuhcusi feango to hamo; isi yomza to meoino tonʉ ci e'esi ho e'oca 'e aʉcʉcʉhʉ. ataveisi ne ohsicu ateop'ʉca 'e kuisi ta cou, cu yusuhngu to vhona tomo soyaatonʉa ne pepe.
teto michʉmʉ to iesu, maica 'aeno iesu 'omo moteongfongfo ho moteoepʉngʉ ta singkooto. o'amo boevovei to tuhcu to zuuzika; apuyu, nomio tomo mooteo ci 'aveoveoyʉsi, o'aisi maka cumasa na aokoe'iya homo mcoi to zuuzika. maitan'e micu yusuhngu to vhona to suoca'ha to hamo.
aiti, mo poʉt'ʉcʉ ta cmʉcmʉ hocu cmʉ'ho! te acʉhʉ baito 'e macicihi ci cou, ac'ʉhʉ to moso smuyu'cu ci cou ho baito. ho tena cmʉ'ho, tehe toehunga tngisi ta yatatiskova ta ceoa. 'ate ahtuo'te esmi 'e hi'hioa eni! 'aamen.
acnguhu, os'o aiti 'o conci mo fʉecʉ'ia ci suoca'ha. ho i'omo yusuhngu to ic'o. 'e engʉca ho ceoa mo acʉhʉ i'mi to tuhcusi ho toekameosʉ, 'anaisi ahtan'a huvahi.
