hotemu yono emoo no siya, la ana na tehe ayocneni ci 'oanʉ, maica 'ola yaahioa 'alaeno anana'o yaa hnooa. 'ote i'mi ta emoo tan'e ho noezuhu no emoo no mocmo.
i'on'a yoyana ci vcongʉ to khusa cila yaahioa to emoo to honte helote, ho i'o susanna, ac'ʉhʉ to mocmo ci maamespingi. la acʉhʉ titho to iachihe yupasʉ ho aʉt'ʉt'ʉca 'o iesu ho i'o tesisi.
maica 'atato ahtuo'te yac'ʉ to tuhcu to kilisto, tiou no yʉsvʉtʉsi. 'emo macicihi tena ieni no nia peipeis'ausna ta feango, ʉmnʉ hocieno kuzo, te tiou no evei.
ho teeno so'ehti ta kiokai, leaʉt'ʉcʉ ta emoo to hamo, nte uk'a 'o'emamzi no koica, o'ate ʉmnʉ hoci bobitano, pak'i, voemi, youbobai, makonvosʉ no yupasʉ;
totiski, 'o kilisto yaeza i'nʉska sʉ'teni, peuonvacu 'e kuisi tamo botngonʉ ci cou. tena maezo i'nʉskʉ aopa'to, o'ate cmʉ'ho ho mi'usni 'e kuisi, mate cmʉ'ho ho to'usni 'emo mingsoyʉ mooteo ci cou.
'e macicihi ho mioeno acʉhʉ yaa mav'ov'o ci mengumi ho ʉmnʉ ci le'aʉt'ʉcʉ emoo to hamo, 'atelaeno maino imu tiova to hamo ci mav'ov'o ci mengumi ho yupa fifiho.
