ataveisi, tesi yainca to honte 'omo yonto vhonasi: <<'e isi fii no ʉm'ʉmnʉ to amo ci cou, temu uhtan'e! uhtan'e ho tiou ta ahoi ne ohon'a teyai 'e ceoa ho ayocneni muu ci hpʉhpʉngʉ.
homo maica 'e e'e ta maameoisi mo smoyo to masoso'ehti to couyutaya; ne mio ohecu esvʉta, hoci panonte ebobohngʉ to iesu zou kilisto, te popeoyafa to kaitoo.
i'mi tan'e, 'atekos'a ta'unano isi h'oinveni ci hi'hioa ho teko 'akasi 'o nooe'oca, yaeza teav'a h'oinveni ho mi'o nomio to nooe'oca ho noekotu. teko maino isi faeni to hamo ci tonʉ, nomio ta fukuin ho e'to'usnu no 'atutumio.
os'o cohivi 'o lako yoni 'aeno 'o lasi yoni bihonte to satan. leako meot'ʉt'ʉcʉ a'o, ac'ʉhʉ ne ohsi opcoza to hupa to satan 'omo meot'ʉcʉ ho 'akasi a'o ci 'antipa, yaeza o'aosko teongasi na singkoosu no mi'usnu a'o.
inamo atpʉtʉ ci cou te maezo totiski sʉ'eʉsʉ tomo fʉecʉ'za ci yʉsʉ; o'ate'o ahta saapayo'a to tposno nsou 'o ongkosi. yonto tuhcu to amo'u ho ito tensi, te'o apa'ta esansana mo tma'usnu a'o.
