i'o lac'o envonvo, la micic'o biebimi no iachi psoevohngʉ; at'inghi 'ola bikoyu no poa psoevohngʉ 'o mo popeosmuhnu, 'aeno ic'o namo mou'ʉmtʉ ho o'te emeknuyu.
o'a mimza mais'a 'o botngonʉ ci cou, titha 'amamhimhino 'e e'e to hamo; maica isi skuna to hamo a'mi, poa yonto tuhcusi a'mi ho boemi no ongko no soskuskunu to kilisto ho aʉ'ʉmta psoyaska 'e e'e.
ho itoeno cohivi te mainenu nate hia einu to nooe'oca, tec'u ieni tan'e ho poucufnu ta cou. isi a'sʉftona honga to hamo a'to; os'o tata'za hocimu i'mi no 'tohʉngʉ ho yaeza honga a'o.
ko'koeno, 'anatemza i'vaho i'tohungu tala hia bʉhsʉftʉ ta cou ho hʉsvʉta 'e cou. momzala e'vono i'tohungu tala hia bʉhsʉftʉ ta cou ho aiti 'o kilisto, o'ana lamza i'vaho maica maitan'e.
homo maica co e'e'u mi'o nana mici noa emomoengʉa ta cou? o'amo maica! mi'o mici noa emomoengʉa to hamo! mi'os'aeno mici m'eya ʉm'ʉmnʉa ta cou? hoci'un'a mici m'eya ʉm'ʉmnʉa ta cou, o'anas'a soskuskunu to kilisto a'o.
at'inghi, i'o lahe ta'unano mo yaa ongko ci masoso'ehti (na hia pepe no ca'hʉhe, o'a os'o siya no 'tohʉngʉ'u, maica 'o hamo o'amo buhmi ta yafana ho yʉsvʉta 'e cou), os'o yainca, i'e mo yaa ongko ci cou. o'aihe fii nomo faeva ci mahsʉftʉ a'o.
apuyu, isi taa'uzva to hamo a'mi. toveineni a'mi 'ete yaahioa no psoyaski ta fukuin, ko'koeno. lamzac'o pateafa 'o tesi poa pateafneni a'mi ci e'e, o'a lamza noa ʉmnʉa ta cou, lamzac'o noa so'eu'ʉmnʉa tola bʉhsʉftʉ ta 'ayumona ta 'tohʉngʉ ci hamo.
