ihe aiti to cou to ic'o homo maifutu to emucu to poolo 'o fkoi, mo yupa mainca: <'amosola ahtuo'te opcoi no cou na eni, e'vono esifova ta etʉpʉ o'a isic'o poa yaansou no hicu ta pepe.>
maanat'ohaesa, panto conci moumsʉ'eonʉ ci so'emio, os'o tata'za hocimu cohivi, temus'a conino ma'unano mimu iachi mau'to'tohʉngʉ. 'e so'emio eni zou: mo apaevai yameomʉ 'e cou'isolaelu, tec'o totea ho tac'u acʉhʉ ma'hi'usnu to hamo 'o couyafana.
'upena hoci mi'usnu nomo mainenu ci cou, la cono 'tohʉngʉ ho yupa maecingi. 'otela bobitano na 'tohʉngʉ, la euteozuc'o tola huaceaci; maezo 'otela ma'unano mo iachi mau'to'tohʉngʉ.
hoci o'te maica, hoteko boemi no epiepiya ho 'aveoveoyʉ to hamo, homo seolʉano nouteuyunu i'omo o'te tma'hongʉ no epiepiya ci cou o'atehe cohivi cuma na e'esu, teeno ahtu meelʉ tohmʉskʉ na 'tohʉngʉ ho mainca <'aamen>? maica o'aisi peelʉi cohivi cuma na e'esu.
ko'koeno, 'e imza engha ci e'e o'a mo boemi no ohola po'pa'cohivneni ta cou ci moutʉs'ʉ ho engha, mamo boemi no isi po'pa'cohivneni to seilei ci e'e, ho mi'usnu tamo tma'usnu to seilei ci cou ho esansana namo tma'usnu no piepiya ci so'emio.
'e cou o'ate peknui 'e iachi. ta taicomu hoci panonte fiho ta svʉta ta yatatiskova ho iachi ma'unano mo yaa moutʉs'ʉ, nte apuyu ʉmnʉ hoci nongonongo, tec'ueno a'ʉmtʉ yaa moutʉs'ʉa.
ci temzaeno ahta seecʉ'ha patotiska 'ola iachi ma'unano mo afnaso ci cou. la a'ʉmtʉ nongonongo, la yaa 'o iachi svʉta ho svʉti 'e iachi, iachia patotiska ta iachi!
i'mi tan'e, mi'o nomio to isi epeiya to hamo ci 'o'okosi ho uveica 'e acʉcʉhʉ, te ko'ko peelʉi poa maezo mayo tomo i'mi to kilisto iesu ci to'usnu ho 'auesiesi ci psoevohngʉ.
ne auyusi mohto la maezo nongonongo, yutasufku, eʉngcʉ; mohtola tolei to mav'ov'o ci ma'cac'ou ho ma'nou no peispak'i, yunsou to 'ayumona no ma'papak'i ho smo'eububut'u. yupania mihango.