10 aʉe no faeva ci a'o. 'e faeva ci a'o, isi ieni no iachisi mi'ausnasi to moso mooyai ci hamo ho ausuhca poa yufafaeva, meelʉ a'sʉftonʉ bohngʉ to hamo.
'ote noa uv'oha ta hpʉhpʉngʉ, la poa teovahneni to hamo na muu, teofafaevai na 'tohʉngʉ ho koyumu, teeno peelʉi husansana zou cuma na 'tohʉngʉsi, cohivi zou cuma na mou'ʉmnʉ, a'sʉftonʉ ho peelʉi ʉm'ʉmnʉa.
tec'u mon'i sucaefi 'e voecʉvcʉ, tec'u cmʉ'ho 'o tiskova. 'anateto 'aoko peis'usnu nomo voecʉvcʉ ci hi'hioa; la meua soanothʉ, ae'ayocʉ ehtothomʉ ho tenac'u tiskova.
ieni to toonono, mitocu fiho mcoi, su'upa efo'a; aʉlʉ mais'a 'o amopepe isi ieni to psoevohngʉ ci tonʉsi ho poa i'mi to mcoi 'o kilisto ho smoevovei, teto totiski maezo mino mo faeva ci h'oyunsova.
teto acʉhʉ boemi no o'aisi feʉ'sa no yʉteʉ ci sapci ho psoevoveiya na psoevohngʉ to nooe'oca; i'omo i'mi to nooe'oca - i'o seilei - ci psoevohngʉ isi aezuha a'to, poa mi'u'usnu no mi'ausnasi na a'to ho poa yaa asuhcu tofsi'i ci psoevohngʉ.
i'omoso mainca ci hamo. 'aeno maezo i'omo boemi to tiskova ho psoetiskovi 'e 'to'tohʉngʉto ci hamo; isi poa bohngʉ no psoevohngʉ to hamo a'to, psoe'usna to sapci to iesu kilisto.
mioc'on'a mongoi ta emzo ci ceonʉ. 'emo maica ci cou 'anate peelʉi poa miovei, i'momhomʉ ma'vovei; maica ho ihe i'vaha spica to zuuzika 'o oko to hamo, apa'ta aokoe'iya.
at'inghi i'ola noyʉcʉ to e'e to hamo ci cou, na mi'usnu to hamo ci himngonghi micu a'sʉftonʉ. i'ola mainca pano nsou to hamo, nte maito peipeis'ausna to iesu kilisto na h'oyunsova; maicac'o, tetoeno peelʉi pahsansana ho yainca, mitocu yaa nsou to hamo.