ho isi popeoskuna to kilisto a'o o'a isis'a akoeva no poa toonono, ma isi poa psoyaski ta fukuin a'o, o'amo boemi no moutʉs'ʉ ci e'e, ci tes'a aapayo'ʉ na tonʉ to kilisto homo mcoi to zuuzika.
isi titha to hamo 'o moutʉs'ʉsi, o'te poa meelʉ boemi no mau'to'tohʉngʉhe 'e yatatiskova ho poa honganeni 'e iachi; apuyu, isi ieni to imza psoyaska ci mo ci e'e ho to'usni 'omo tmaa'uzo ci cou.
na a'o - poolo te'o aʉla iachia poucufna muu. hola'u no'upu muu lamu ta'unano mi'o na'no ma'cocacni, ho la o'te no'upu la na'no mouyʉcʉ; maitan'e te'o ieni to ma'cocacni ho moususeomʉ to kilisto ho m'ene muu:
poa epa'hikokoe'i a'o, 'emo maica ci hi'hioa, a'ʉmtʉ uk'a ci 'ʉteʉmza ho hioa. at'inghi, hoci panonte smeecʉ'ho yono cuma ho e'ʉ'ʉteʉ etano, poa matnʉskʉ a'o no o'amo nama boemi no fnguu ci e'e, 'uate'o maezo yaa totiski ci 'ʉteʉ.
'apano tamu ahtao'te yaa humzi, peelʉi soomei ho isi ieni a'o to kilisto ho aomotʉ'ʉ. ho tasi mi'usni to kilisto na muu o'ates'a yoheoz'u; apuyu, tena yonta taicomu tasi pa'teni na tonʉsi.
