Zeremi 7:28 - Labib An Kreol Seselwa

²⁸ Ou ava dir zot: Zot menm sa pep ki pa obei mwan, SENYER zot Bondye; sa pep ki pa oule aksepte lenstriksyon. Laverite in mor; personn nepli nonm sa mo.

Zeremi 7:28 ပူးပေါင်းရင်းမြစ်များ

Psonm 12:2

Dimoun i koz manti avek kanmarad. Zot flat avek zot labous, me zot leker pa senser.

Psonm 50:17

ou ki pa aksepte ganny korize e ki rezet mon parol?

Proverb 1:7

Respe pour SENYER i konmansman lasazes. Zis bann fou ki napa respe pour lasazes ek lenstriksyon.

Ezai 30:9

Annefe, sa pep i dezobeisan, en pep san okenn moral; zanfan i refize ekout lansennyman SENYER.

Zeremi 11:10

Zot in retourn dan fot zot zanset ki ti refize obei mwan. Zot in al ador bann bondye etranze. Izrael ek Zida in kas sa lalyans ki mon ti fer avek zot zanset.

Zeremi 17:23

Me zot pa'n ekoute, zot pa'n ouver zot zorey. Zot in reste dan zot lantetman; zot in refize obei e resevwar okenn leson.

Zeremi 2:30

Mon'n esey koriz ou bann zanfan; me sa pa'n servi dan nanryen. Parey en lyon anraze, ou'n masakre bann profet ki mon ti'n anvoy ou.

Zeremi 32:33

Olye tourn zot figir ver mwan, zot in vir zot ledo. Pourtan, mon pa'n zanmen arete averti zot; me zot pa'n oule ni ekoute ni aprann.

Zeremi 5:1

Zabitan Zerizalenm! Patrol dan bann lari lavil! Ouver zot lizye! Gete dan bann plas piblik! Gete si zot war en sel dimoun ki fer sa ki drwat e ki esey reste fidel anver Bondye. Si ou reisi, alor SENYER ava pardonn Zerizalenm.

Zeremi 5:3

I vre, SENYER: Laverite ki enteres ou! Ou'n pini zot, me pa fer zot nanryen. Ou'n preski detri zot; me zot in refize aprann. Zot in fer latet; zot refize retourn kot ou.

Zeremi 6:17

Mon'n met bann santinel pour veye. Ekout byen ler tronpet i sonnen. Me ou'n reponn: Mon pa pou port atansyon.

Zeremi 6:28

Zot tou, zot en bann rebel andirsi ki senm rimer partou. Zot leker i dir parey bronz ek fer. Zot tou, zot bann malfeter.

Zeremi 6:8

Pep Zerizalenm! Aksepte koreksyon. Sankwa, mon pou abandonn ou; mon pou fer ou vin parey en dezer, an landrwa kot personn pa pou kapab reste.

Oze 4:1

Izrael, ekoute! Ekout parol SENYER! SENYER i annan en lakizasyon kont bann zabitan sa pei, akoz napa ni lwayote, ni fidelite, ni konnesans Bondye dan sa pei.

Sofoni 3:2

I pa'n ekout personn; i'n refize ganny korize. I pa'n met son konfyans dan SENYER; i pa'n oule apros kot son Bondye.

Sofoni 3:7

Mon ti dir: Sirman ki lavil ava annan respe pour mwan, ki i ava aksepte ganny korize, e ki mon pa ti ava bezwen egzekit mon bann menas kont li. Me zot ti depese pour azir pli mal ankor.