Zeremi 31:4 - Labib An Kreol Seselwa

⁴ Izrael ki zoli! Mon pou rekonstri ou! Ou pou ganny remet lo ou de lipye. De nouvo, ou pou fer sorti ou bann tanbouren, e selebre dan lazwa avek bann danser.

Zeremi 31:4 ပူးပေါင်းရင်းမြစ်များ

2 Rwa 19:21

La parol ki SENYER in prononse kont li: Siyon i mepriz ou, i ensilte ou; Fiy Zerizalenm i sekwe latet deryer ou ledo.

Psonm 149:3

Loue son non avek ladans, avek tanbour, avek laarp; zwe bann lenstriman lanmizik pour loue son non.

Psonm 30:11

Ou'n sanz mon lamantasyon an ladans. Ou'n ranplas mon lenz dey par en lenz lafet.

Psonm 51:18

Fer sa ki bon pour Siyon. Rekonstri bann miray Zerizalenm.

Psonm 69:35

akoz Bondye pou sov Zerizalenm. I pou rekonstri bann lavil dan Zida. Son pep pou vin viv la e sa pei ava pour zot.

Ezai 14:1

Me SENYER pou pran konpasyon pour Zakob e swazir Izrael ankor; i pou fer li viv anpe lo son prop later. Bann etranze ava zwenn avek li pour form parti desandan Zakob.

Ezai 30:32

Sak kou ki SENYER pou donnen pou ganny akonpannyen par lanmizik pti tanbour avek laarp; i pou konbat kont zot.

Ezai 37:22

la parol ki SENYER in prononse kont li: Lavil Siyon i mepriz ou, i ensilte ou. Zerizalenm i ridikiliz ou deryer ou ledo.

Zeremi 1:10

Ozordi, mon donn ou lotorite lo tou bann rwayonm, pour ou derasinen, kraze, detrir, demoli pour konstri e plante.”

Zeremi 14:17

La sa ki ou ava dir lepep: Mon lizye i ranpli avek larm nwit e zour; mon pa aret plere, akoz mon pep ki mon kontan parey mon fiy in soufer en kantite. Son blesir i vreman grav.

Zeremi 18:13

La sa ki SENYER i deklare: Alor, demann bann nasyon etranze si zot in deza tande ki en nasyon in azir parey Izrael.

Zeremi 24:6

Mon pou pran gran swen avek zot, e mon pou fer zot retourn dan sa pei. Olye demoli zot ankor, mon pou relev zot; olye derasin zot, mon pou replant zot.

Zeremi 31:13

Alor, bann zenn fiy ava danse dan lazwa; zennzan ek vyeyar pou fet ansanm. Mon pou sanz zot dey an lazwa; mon pou konsol zot e sanz zot tristes an lazwa.

Zeremi 31:21

Met bann sinyal tou dilon semen; rapel byen larout ki ou ti pran kan ou ti ale. Izrael ki zoli! Retournen. Retourn dan ou bann lavil.

Zeremi 31:38

Sa zour pe vini, SENYER i deklare, kan lavil Zerizalenm pou ganny rekonstri zis pour mwan, depi latour Hananeel, ziska laport Dan Kwen.

Zeremi 33:7

Mon pou fer Zida ek Izrael prospere, e mon pou rekonstri zot parey zot ti ete avan.

Zeremi 46:11

Bann Ezipsyen! Monte ziska Galaad pour zot rod en latizann ki pou geri zot bann blesir. Me sa pa servi dan nanryen akoz zot bann blesir pa pou geri.

Lamantasyon 1:15

SENYER in rezet tou bann vayan gerye ki ti pe defann mwan. I'n anvoy en larme pour detri mwan. I'n detri tou mon bann zennzan. Parey rezen i ganny kraze pour fer diven, SENYER in kraz Zida, sa zoli zenn fiy.

Lamantasyon 2:13

Zerizalenm! Ki mon kapab dir dan ou faver? Avek ki mon kapab konpar ou? Ki mon kapab fer pour konsol ou? Zanmen personn in soufer parey ou. Dezas ki ou'n pas ladan i osi gran ki losean. Lekel ki pou kapab geri ou?

Amos 5:2

Izrael, sa zenn fiy vyerz, in tonbe e personn pa pou lev li! I'n tale ater dan son pei; napa personn pour lev li.

Amos 9:11

La sa ki SENYER i deklare: Sa zour pe vini kan mon pou rekonstri lavil David ki'n tonm anrin parey en payot. Sa zour la, mon pou repar li, mon pou remet li debout. Mon pou rekonstri li e retourn li parey i ti ete avan.

Levanzil dapre Lik 15:23

Anmenn sa zenn bef ki nou'n angrese, e touy li. Annou manze, annou fete!

Akt de Zapot 15:16

Apre sa, mon pou retournen, e mon pou rekonstri latant David ki'n tonbe. Mon pou relev sa ki'n tonm anrin, e redres li,

Ziz 11:34

Ler Zefte ti pe retourn kot li Mispa, son fiy ti sorti pour rankontre li avek bann tanbouren ek ladans. Sa fiy ti son sel zanfan. Apard li, Zefte ti napa okenn garson ni fiy.