Oze 3:1 - Labib An Kreol Seselwa

¹ SENYER ti dir mwan ankor: Ale e kontan ankor en fanm adilter ki annan en galan. Kontan li parey SENYER i kontan pep Izrael, menm si zot al ver lezot Bondye e zot kontan pake rezen.

Oze 3:1 ပူးပေါင်းရင်းမြစ်များ

2 Samyel 6:19

Apre, i ti distribye avek pep Izrael antye, zonm ek fanm, sakenn en dipen, en morso lavyann ek en pake rezen. Apre, tou dimoun ti al se zot.

2 Rwa 13:23

SENYER ti pran pitye pour zot e i ti pardonn zot, akoz son lalyans ki i ti'n fer avek Abrahanm, Izaak, ek Zakob. I pa ti oule detri zot; ziska aprezan, i pa'n rezet zot lwen avek li.

1 Kronik 16:3

I ti distribye en morso lavyann ek pake rezen sek avek pep Izrael antye. Sakenn, zonm koman fanm, ti ganny en dipen ron, en gato dat ek en pake rezen.

Nehemi 9:31

Me, dan ou gran konpasyon, ou pa ti detri zot, ou pa ti abandonn zot, akoz ou en Bondye avek konpasyon ki konn pardonnen.

Psonm 123:2

Parey en serviter ki gard son lizye fikse lo lanmen son met; parey en servant ki pa kit lanmen son met; nou osi, nou lev nou regar ver SENYER nou Bondye, ziska ki i pran pitye pour nou.

Egzod 32:6

Tou dimoun ti leve lannmen granmaten. Zot ti ofer bann sakrifis konplet ek bann sakrifis lape. Lepep ti asize manze, bwar. Apre, zot ti leve pour anmize.

Kantik Salomon 2:5

Fortifye mwan avek pake rezen; rafresi mwan avek ponm, akoz lanmour i fer mwan feb.

Ezai 45:22

Zot tou ki reste dan bout later, retourn kot mwan e zot ava ganny sove. Akoz mwan menm ki Bondye e napa okenn lot.

Zeremi 3:20

Me, parey en move fanm i kit son mari, pep Izrael in enfidel anver mwan, in kit mwan. SENYER ki deklare.

Zeremi 31:20

La sa ki SENYER i deklare: Efraim! Ou menm mon garson prefere. Ou menm ki mon pli kontan. Sak fwa ki mon menase pour pini ou, mon kontinyen mazin ou an byen. Akoz mon annan bokou lanmour pour ou, mon pou pran pitye pour ou SENYER i deklare.

Oze 11:8

Ki mannyer mon pou kapab abandonn Efraim, e debarase avek ou, Izrael? Ki mannyer mon pou kapab tret ou parey Adma, e tret ou parey avek Seboim? Sa lide i boulvers mon leker, mon konpasyon i tro for.

Oze 2:5

Annefe, zot manman i en prostitye. Sa enn ki'n met zot omonn, i kouver avek laont. I ti dir: Mon pou swiv mon bann galan ki donn mwan mon manze ek mon delo, mon lalenn ek mon latwal linenn, mon delwil ek mon diven.

Oze 4:11

Diven ek diven nouvo i fer perdi latet.

Oze 7:5

Zour lafet pour lerwa, bann minis i bwar diven ziska zot malad; zot vin gaga e lerwa i fer parey.

Amos 2:8

Kot bann lotel, zot dormi lo bann lenz ki zot in pran koman gaz avek bann malere. Dan tanp zot bondye, zot bwar diven ki zot in konfiske avek dimoun.

Amos 6:6

Zot bwar diven dan bann gran lakoup; zot parfim zot lekor avek bann pli bon lesans. Me zot pa montre lapenn pour dezas ki menas Izrael.

Mise 7:7

Mwan, mon pou tourn ver SENYER, mon pou esper Bondye, mon sover. Mon Bondye pou antann mwan.

Zakari 1:16

Pour sa rezon, la sa ki SENYER i deklare: Par pitye, mon pou retourn Zerizalenm avek konpasyon; lanmenm la kot mon tanp pou ganny rekonstri. SENYER liniver ki deklare; latres pour mezire ava ganny drese lo Zerizalenm.

Matye 26:50

Zezi ti dir li, “Mon zanmi! Sa ki ou annan pour fer, fer li.” Alor, lafoul ti aprose. Zot ti met lanmen lo Zezi e aret li.

1 Korentyen 10:21

Zot pa kapab bwar dan lakoup Senyer e dan lakoup demon anmenmtan. Zot pa kapab manz otour latab Senyer e otour latab demon anmenmtan.

1 Korentyen 10:7

Pa ador zidol parey serten parmi zot ti fer. Parey Lekritir i deklare: Lepep ti asize manze, bwar. Apre, zot ti leve pour anmize.

1 Pyer 4:3

Annefe, pandan ase lontan, zot in viv parey bann etranze, dan vis, move dezir, lavi soular, bann parti bwar avek move aksyon ek ladorasyon zidol degoutan.

Ziz 10:16

Bann Izraelit ti debaras zot avek bann bondye etranze parmi zot e konmans servi SENYER ki ti pran pitye pour soufrans pep Izrael.

Ziz 9:27

Zot ti al dan lakanpanny pour rekolte zot rezen ki zot ti kraze pour fer diven e apre, fer lafet. Zot ti al dan tanp zot bondye kot zot ti manze e bwar; apre, zot ti modi Abimelek.