Nonm 13:27 - Labib An Kreol Seselwa

²⁷ La sa ki zot ti rakont Moiz: Nou'n al eksplor sa pei kot ou ti'n anvoy nou. I vre ki i en pei kot dile ek dimyel i koule. Gete, la son bann fri.

Nonm 13:27 ပူးပေါင်းရင်းမြစ်များ

Nehemi 9:25

Zot ti pran bann lavil fortifye ek en later fertil; zot ti pran bann lakaz ranpli avek toudsort byen, bann sitern ki'n fini ganny fouye, bann plantasyon rezen, zoliv ek en kantite pye fri. Zot ti manze ziska rasazye, angrese. Gras ou gran bonte, zot in viv dan lopilans.

Egzod 13:5

Zot ava pratik sa rityel pandan menm mwan, kan SENYER ti fer zot antre dan pei bann Kananeen, Hitit, Amorit, Hivit ek Zebizit; dan sa pei ki i ti promet avek zot zanset pour li donn zot, en pei kot dile ek dimyel i koule.

Egzod 3:17

Alor, mon ti dir: Mon pou fer zot sorti Lezip kot zot pe soufer e anmenn zot dan pei bann Kananeen, bann Hitit, bann Amorit, bann Perizit, sa pei kot dile ek dimyel i koule.

Egzod 3:8

Mon'n desann pour delivre zot dan lanmen bann Ezipsyen e fer zot sorti depi sa pei, ver sa bon pei ki gran, en pei kot dile ek dimyel i koule. Sa landrwa i kot bann Kananeen, bann Hitit, bann Amorit, bann Perizit, bann Hivit e bann Zebizit i reste.

Egzod 33:3

Al dan sa pei kot dimyel ek dile i annabondans. Me mon pa pou mont avek ou, akoz ou en pep antete; mon kapab detri ou dan semen.”

Zeremi 11:5

Alor, mon pou gard sa promes ki mon ti fer avek zot zanset, konmkwa mon pou donn zot sa pei kot dile ek dimyel i koul annabondans. Lanmenm la kot zot ete ozordi. Mon ti reponn, “Wi, SENYER”.

Zeremi 32:22

Parey ou ti'n promet avek zot bann zanset, ou'n donn zot sa later ki ris e fertil.

Ezekyel 20:15

Mon ti osi fer en serman avek zot dan dezer, pour pa pou anmenn zot dan sa pei ki mon ti'n donn zot, sa pli merveye pei kot i annan dile ek dimyel annabondans.

Ezekyel 20:6

Sa zour, mon ti fer en promes solannel, ki mon pou tir zot dan sa pei Lezip e anmenn zot dan sa pei pli merveye ki mon'n swazir pour zot, kot i annan dile ek dimyel annabondans.

Levitik 20:24

Mon ti dir zot: Zot pou erit zot later; mwan ki pou fer zot pran posesyon; sa i en pei kot dile ek dimyel i koule annabondans. Mwan menm zot Bondye ki'n separ zot avek bann pep.

Nonm 14:7

Zot ti koz avek pep Izrael: Sa pei ki nou'n al eksplore i vreman en tre bon pei.

Nonm 14:8

Si SENYER i bon anver nou, i pou anmenn nou laba e donn nou sa pei kot i koul dile ek dimyel.

Nonm 16:13

I pa ase ki ou'n deza fer nou sorti dan en pei kot i koul dile ek dimyel, pour anmenn nou mor dan dezer? Aprezan, ou oule kontinyen domin nou koman nou sef?

Nonm 16:14

Ou pa'n anmenn nou dan en pei kot i koul dile ek dimyel. Ou pa'n donn nou an leritaz bann plantasyon legim, bann plantasyon rezen. Eski ou krwar ki sa bann zonm pa war kler? Non, nou pa pe vini.

Deterononm 11:9

Konmsa, zot ava viv lontan dan sa pei ki SENYER ti fer serman avek zot zanset pour donn zot ek zot bann desandan; sa pei kot dile ek dimyel i koule.

Deterononm 26:9

I ti kondwir nou isi e donn nou sa pei, en pei kot dile ek dimyel i koule.

Deterononm 27:3

Kan ou ava travers larivyer Zourden pour antre dan pei ki SENYER, ou Bondye pe al donn ou, en pei kot dile ek dimyel i koule, parey SENYER Bondye ou bann zanset in promet ou, ou ava ekri lo sa bann gro ros, tou bann parol sa lalwa.

Deterononm 31:20

Annefe, mon pou anmenn zot dan en pei kot dile ek dimyel i koule. Sa i en serman ki mon ti fer avek zot bann zanset. Ler zot in byen manze, rasazye e vin gra, zot al kot lezot bondye e servi zot, mepriz mwan e kas mon lalyans.

Deterononm 6:3

Izrael! Ekoute alor, e obzerv byen sa bann komannman. Konmsa, zot ava viv ere e zot ava ganny bokou zanfan dan sa pei kot dile ek dimyel i koule annabondans, parey SENYER, Bondye ou bann zanset in promet zot.

Zozye 5:6

Annefe, pep Izrael ti'n mars pandan 40 an dan dezer, ziska ki tou sa nasyon ti'n disparet, bann gerye ki ti'n sorti Lezip ki pa ti'n ekout SENYER. SENYER ti'n fer serman ki sa bann zonm pa pou war sa pei ki i ti'n promet avek zot bann zanset pour donn nou, sa pei kot dile ek dimyel i koule.