Levitik 26:39 - Labib An Kreol Seselwa

³⁹ Bann sirvivan dan pei zot bann lennmi, ava deperi pa zis akoz zot bann pese, me osi akoz pese zot bann zanset.

Levitik 26:39 ပူးပေါင်းရင်းမြစ်များ

2 Kronik 34:24

La sa ki SENYER i deklare: Mon pe anvoy maler lo Zerizalenm ek son zabitan. Mon pou fer realize tou sa bann malediksyon ki'n ekri dan sa liv e ki'n ganny lir devan lerwa Zida.

Esdras 9:7

Depi lepok nou bann zanset ziska ozordi, nou koupab e nou'n komet en gran fot. Akoz nou bann fot ki nou bann lerwa, nou bann pret, nou'n sibir dominasyon bann lerwa etranze, lager, deportasyon, piyaz, ek imilyasyon; rezon akoz nou konmsa ozordi.

Nehemi 1:9

Me si zot retourn ver mwan, gard mon bann komannman e met zot an pratik, menm si zot ava ganny sase tre lwen, mon pou al rod zot kot zot ete e fer zot retourn dan landrwa kot mon'n swazir pour etabli mon non.

Egzod 20:5

Ou pa pou azenou devan zot e ou pa pou ador zot. Annefe, mwan SENYER ou Bondye, mon en Bondye zalou. Mon pini bann zanfan pour pese zot papa ziska trwazyenm ek katriyenm zenerasyon bann ki ay mwan.

Egzod 34:7

ki gard son fidelite ziska mil zenerasyon; ki pardonn fot, dezobeisans ek pese. Me mon pa deklar inosan, sa enn ki koupab. Mon fer zanfan ek pti zanfan rann kont pese zot bann paran, ziska trwazyenm ek katriyenm zenerasyon.

Ezai 14:21

Prepar masak bann zanfan akoz krim zot papa. Zot pa pou lev ankor pour al anvai lemonn, oubyen konstri lavil partou lo later.

Ezai 24:16

Bann ki sorti lwen pou sant louanz, e laglwar, an loner Bondye lazistis. Me mwan, mon dir ki mon'n perdi; mon'n perdi. Maler lo mwan! Bann tret in trai! Traizon! Wi! Bann tret in trai!

Zeremi 29:12

Alor, ou ava envok mwan e ou ava kapab ale. Ou ava priy mwan e mon ava antann ou lapriyer.

Zeremi 3:25

Annou kasyet dan nou laont e ganny kouver avek dezoner. Annefe, depi nou lanfans, nou, avek nou paran, nou pe komet pese anver SENYER, nou Bondye. Nou pa'n ekout sa ki SENYER nou Bondye ti'n dir nou.

Zeremi 31:29

Kan sa zour pou vini, dimoun pou nepli dir: Bann paran ti manz rezen ver, me ledan bann zanfan ki pe grense.

Lamantasyon 1:3

Popilasyon Zida i annegzil; i'n ganny kraze avek lanmizer. I pe asiz parmi bann nasyon san trouv okenn repo. Son bann lennmi in anserkle li, napa semen pour zot sove.

Lamantasyon 4:9

Sa bann ki ti ganny masakre ti pli sanse ki bann viktim lafen; zot deperi dousman akoz napa nanryen pour manze.

Ezekyel 18:19

Selman, ou demande: Akoz en garson pa responsab pese son papa? En garson ki'n respekte lalwa e fer sa ki zis, ki obei tou mon komannman, i pou sirman viv.

Ezekyel 20:43

La, zot ava rapel zot lavi pase, tou bann aksyon ki zot in fer pour rann zot enpir. Zot pou degout zot menm akoz tou zot bann move aksyon.

Ezekyel 24:23

Gard zot tirban lo zot latet e zot sandal dan zot lipye. Zot pa bezwen ni lamante, ni plere, me zot ava zemir dan zot fot e zot ava konsol kanmarad.

Ezekyel 33:10

Ou ki en imen, dir pep Izrael: Zot pe dir: Nou fot ek nou pese i en fardo lo nou akoz nou move konportman, nou pe deperi anba son pwa. Ki nou pou fer pour viv?

Ezekyel 36:31

Alor, zot ava rapel zot bann move lavi ek zot bann aksyon ki fer onte. Zot pou kanmi pour zot bann fot ek bann aksyon degoutan ki zot in komet.

Ezekyel 4:17

Zot pou mank manze ek delo. Zot pou get kanmarad avek dezespwar. Zot pou deperi dan dezespwar, akoz zot pese.”

Ezekyel 6:9

Bann sirvivan ava mazin mwan parmi bann nasyon kot zot pou viv koman bann egzile. Zot ava rapel ki mannyer mon'n detri zot, avek zot leker enfidel ki'n abandonn mwan e zot lizye ki'n reste fikse lo sa bann zidol. Zot pou ganny repinyans pour zot prop lekor, akoz bann aksyon degoutan ki zot in komet.

Oze 5:15

Mon pou ale, mon pou retourn kot mwan, ziska zot avoue ki zot koupab e rod mwan. Dan zot maler, zot pou retourn ver mwan.

Zakari 10:9

Mon ti'n dispers zot parmi bann nasyon, me menm dan bann pei etranze, zot pou mazin mwan. Zot pou fer zanfan e zot pou retournen.

Nonm 14:18

Mwan SENYER, mon pasyan, ranpli avek labonte ek fidelite, ki pardonn fot ek pese. Me mon pa fer koupab pas pou inosan. Mon azir kont sa enn ki'n komet pese e kont son bann desandan, ziska trwazyenm e menm katriyenm zenerasyon.

Deterononm 28:65

Ou pa pou ganny latrankilite parmi sa bann nasyon; ou pa pou ganny okenn landrwa pour poz ou lipye. La, SENYER ava rann ou enkyet, tris e ou ava tonm dan dezespwar.

Deterononm 30:1

Kan tousala ava'n realize avek ou, bann benediksyon ek bann malediksyon ki mon'n met devan ou, ou ava reflesi la kot SENYER, ou Bondye in dispers ou parmi bann nasyon;

Deterononm 5:9

Ou pa pou prostern devan zot ni ador zot. Mwan SENYER, ou Bondye, mon en Bondye zalou. Mon pini bann zanfan pour pese zot paran, ziska trwazyenm e menm katriyenm zenerasyon bann ki deteste mwan.

Deterononm 8:20

Zot pou disparet parey bann nasyon ki SENYER pou detri devan ou, akoz zot pa'n obei lavwa SENYER, ou Bondye.