Levitik 26:14 - Labib An Kreol Seselwa

¹⁴ Me, si zot pa ekout mwan e pa met an pratik tou sa bann komannman,

Levitik 26:14 ပူးပေါင်းရင်းမြစ်များ

2 Rwa 22:13

Al konsilte SENYER pour mwan, pour lepep, e pour Zida antye, konsernan parol ki dan sa liv ki zot in dekouver. SENYER in pran en gran lakoler kont nou, akoz nou bann zanset in dezobei parol sa liv; zot pa'n azir dapre tou sa ki'n ekri ladan.

2 Kronik 34:24

La sa ki SENYER i deklare: Mon pe anvoy maler lo Zerizalenm ek son zabitan. Mon pou fer realize tou sa bann malediksyon ki'n ekri dan sa liv e ki'n ganny lir devan lerwa Zida.

2 Kronik 7:19

Me si ou tourn ou ledo avek mwan, e si ou abandonn mon bann regleman ek mon bann komannman ki mon'n plas devan zot, pour zot al servi lezot bondye e ador zot,

Psonm 81:12

Alor, mon ti les zot avek zot leker dir, pour zot fer koman zot oule.

Proverb 3:33

Malediksyon SENYER i tonm lo lafanmir en malfeter, me SENYER i beni lafanmir sa enn ki zis.

Zeremi 11:8

Me zot pa'n ekoute, zot pa'n obei. Zot in persiste dan zot move mannyer. Alor, mon'n bezwen met an laplikasyon tou bann lartik sa lalyans ki zot pa'n respekte, malgre lord ki mon ti'n donn zot.

Zeremi 17:27

Me si zot pa ekout mwan, si zot pa obzerv sa zour saba koman en zour sakre, si zot kontinyen pas avek pake dan bann laport Zerizalenm, alor mon pou met dife dan sa bann laport lavil. Sa dife ki pa pou zanmen tennyen, pou detri bann pale dan Zerizalenm.

Zeremi 26:4

Ou ava dir zot: Si ou pa obei mon lalwa ki mon met devan ou; si ou pa swiv sa ki mon'n aprann ou,

Zeremi 28:8

Bann profet ki ti vin avan ou ek mwan, dan letan pase, ti anons lager, lafanmin, lepidemi kont bokou pei e bann gran rwayonm.

Zeremi 32:23

Zot ti vin dan sa pei ki zot ti pran posesyon. Me zot pa ti ekout ou lavwa, ni obei ou komannman; zot pa ti viv dapre ou lalwa; zot pa ti fer nanryen sa ki ou ti'n ordonn zot fer. Pour sa rezon ki ou ti fer tou sa bann maler tonm lo zot.

Zeremi 40:2

Nabouzeradann ti anmenn li akote. I ti dir li: SENYER ou Bondye ti'n predir sa maler kont Zerizalenm.

Lamantasyon 1:18

SENYER ti annan rezon azir konmsa anver mwan, akoz mon'n revolte kont son komannman. Tou bann pep! Ekout mwan: Get mon soufrans. Mon bann zenn fiy ek mon bann zennzan in ganny anvoye annegzil.

Lamantasyon 2:17

Parey i ti'n deside depi byen lontan, SENYER in detri Zerizalenm san pitye. Sa ki i'n fer avek nou i'n fer lennmi rezoui lo ou maler; i'n fer ou bann lennmi vin pli for.

Danyel 9:13

Tou sa bann maler in vin lo nou, parey i'n ganny ekri dan lalwa Moiz. Nou pa'n sipliye pour kalme lakoler SENYER, nou Bondye. Nou pa'n abandonn nou bann fot; nou pa'n swiv ou laverite.

Oze 7:12

Letan zot pe ale, mon zet en latrap lo zot; mon fer zot tonbe parey zwazo; mon pou koriz zot pour krim ki zot in fer.

Levitik 26:18

Si malgre tousala, zot pa ekout mwan, mon pou kontinyen pini zot set fwa plis ankor pour zot pese.

Malasi 2:2

Si zot pa ekout mwan, e zot pa pran ka pour glorifye mon non dan sa ki zot fer, alor mon pou devers malediksyon lo zot, SENYER ki deklare. Mon pou sanz mon benediksyon an malediksyon. Annefe, mon'n fini modi zot, akoz zot pa pe pran mon lord aker.

Akt de Zapot 3:23

Tou dimoun ki pa ekout sa profet pou ganny rezete parmi pep Bondye e ganny detri.

Ebre 12:25

Alor, veye ki zot pa refize ekout sa enn ki pe koz avek zot. Bann ki ti refize ekout sa enn ki ti delivre zot lavertisman lo later, pa ti sap pinisyon. I annan plis rezon pour krwar ki nou pa pou kapab sap pinisyon, si nou rezet sa enn ki anons mesaz sorti dan lesyel.

Zozye 23:15

Parey tou bann bon parol ki SENYER, zot Bondye ti dir zot in realize lo zot, osi SENYER pou realiz lo zot, tou bann malediksyon, ziska ki i'n detri zot, e ki i'n fer zot disparet lo sa bon later ki SENYER, zot Bondye in donn zot.

Ziz 2:15

Parey SENYER ti'n dir, e par en serman, sak fwa zot ti sorti pour fer lager, lanmen SENYER ti kont zot ti tonm dan maler. Alor, zot ti dan en gran detres.

1 Samyel 12:15

Me si zot pa ekout lavwa SENYER, si zot revolte kont bann komannman SENYER, SENYER pou tourn kont zot, parey i ti fer kont zot bann zanset.