Ezai 51:3 - Labib An Kreol Seselwa

³ SENYER pou konsol Siyon. I pou pran pitye pour bann landrwa devaste. I pou fer bann dezer vin parey zarden Edenn, parey zarden SENYER. I pou reganny lazwa ek kontantman; avek bann kantik louanz ek psonm.

Ezai 51:3 ပူးပေါင်းရင်းမြစ်များ

Zenez 13:10

Lot ti lev lizye, e i ti war vale Zourden kot ti annan bokou delo. Avan ki SENYER ti detri Sodonm ek Gomor sa landrwa ziska ver Soar, ti parey zarden SENYER, parey Lezip.

Psonm 85:8

Mon pou ekout sa ki SENYER Bondye i annan pour li dir. I promet lape pour son pep, pour dimoun ki reste fidel anver li, me ki pa retonm dan menm betiz.

Ezai 12:1

Sa zour, ou pou dir: Mon loue ou, SENYER! Menm si ou ti ankoler avek mwan. Ou ti ankoler avek mwan, me aprezan, ou lakoler in tonbe e ou konsol mwan.

Ezai 25:9

Sa zour, dimoun pou dir: Li menm li nou Bondye; nou'n esper li. In vin sov nou. Li menm SENYER ki nou ti pe espere. Annou selebre! Annou rezouir! I'n sov nou.

Ezai 35:6

Bann ki bwete pou sote parey en serf e lalang bann kozpa pou sant dan lazwa. Delo pou sourse annabondans dan dezer e bann larivyer pou koule dan bann landrwa sek.

Ezai 41:16

Ou pou vann zot e zot pou anvole dan divan; tanpet pou dispers zot. Apre sa, ou pou dan lazwa akoz SENYER; ou pou met ou lafyerte dan Bondye sen Izrael.

Ezai 43:19

Mon pe al fer keksoz nouvo; deza i pe konmans bourzonnen; ou devre rekonnet! Mon pou tras semen dan dezer e fer sours delo koule dan bann landrwa sek.

Ezai 44:26

Mon fer realize parol mon serviter e fer arive sa ki mon bann mesaze i anonse. Mon dir lo size Zerizalenm: I pou ganny abite. Konsernan bann lavil dan Zida: Zot ava ganny rekonstri e remet an valer sa ki'n ganny devaste.

Ezai 49:13

Lesyel! Sant ou lazwa. Later! Rezoui ou. Bann montanny! Fer tande zot bann sanson. SENYER in konsol son pep; in pran konpasyon pour sa bann ki pe soufer.

Ezai 49:19

I vre ki ou bann zabitan pou santi zot sere lo sa later ki'n ganny devaste, en landrwa dezer, en landrwa ki'n ganny detri, e bann ki ti oule devor ou ava'n fini ale.

Ezai 49:8

La sa ki SENYER i deklare: Dan letan favorab, mon ti reponn ou. Zour delivrans, mon ti sekour ou; mon'n gard ou pour fer ou vin en lalyans pour lepep, pour ou relev sa pei e partaz bann patrimwann ki'n reste abandonnen;

Ezai 51:12

La sa ki SENYER i deklare: Mwan menm ou konsolater. Alor, akoz ou per zonm ki parey ou en et imen ki mor parey zerb?

Ezai 52:9

Bann debri Zerizalenm! Ansanm, sant avek lazwa, akoz SENYER in konsol son pep, in sov Zerizalenm!

Ezai 61:10

Mon pou rezoui dan SENYER. Tou mon leker pou dan lazwa dan mon Bondye, akoz in abiy mwan dan lenz delivrans, in kouver mwan avek rob lazistis, parey en nouvo marye, parey en pret avek son zoli lornman, parey en nouvel marye dan tou son bann bizou.

Ezai 65:18

Me rezoui e viv dan lazwa pour touzour dan sa ki mon pe kree: Mon pe al fer Zerizalenm vin lazwa e son bann zabitan, en plezir.

Zeremi 31:25

Mon pou rekonfort sa bann ki fatige, e sa bann ki lafen, mon pou donn zot tou sa ki zot bezwen.

Ezekyel 28:13

Ou ti reste dan Edenn, zarden Bondye. Ou ti kouver avek tou kalite pyer presyez: Ribi, topaz ek dyanman, krizolit, beril ek oniks, safir, grena ek emerod. Tou ou bann bizou ek ornman ti annor prepare depi sa zour ki ou ti ganny kree.

Ezekyel 36:11

Mon pou ogmant ou popilasyon, dimoun koman zannimo. Zot pou ganny bokou zanfan e vin en gran pep. Zot pou ganny peple parey dan lepase e mon pou ogmant zot prosperite plis ki avan. Alor, zot ava konnen ki mwan menm SENYER.

Ezekyel 36:35

Zot pou dir: Sa later devaste in vin koman zarden Edenn; bann lavil detri e abandonnen, aprezan, in ganny rekonstri e repeple.

Zoel 2:3

Par devan, konmsi en dife ki devor tou. Par deryer, laflanm i detri tou. Oparavan, later ti parey zarden Edenn, me in vin sek, parey en dezer. Napa nanryen ki sap li.

1 Pyer 1:8

Zot kontan li, menm si zot pa'n zanmen war li. Zot krwar dan li, menm si zot pa ankor war li. Pour sa rezon, zot dan en lazwa si gran ki pa kapab ganny eksprimen par parol.