Ezai 40:1 - Labib An Kreol Seselwa

¹ Konsole mon pep! Konsole mon pep, ou Bondye i dir.

Ezai 40:1 ပူးပေါင်းရင်းမြစ်များ

Nehemi 8:10

Apre, Esdras ti dir zot, “Ale! Manz bann bon pla gra e bwar bann liker dou; anvoy en pe pour bann ki pa'n prepar nanryen, akoz sa zour i sakre pour nou SENYER. Pa bezwen pran lapenn, akoz lazwa SENYER i zot lafors!”

Psonm 85:3

Ou'n aret ankoler; ou'n abandonn tou lakoler ki ou ti annan kont nou.

Psonm 85:8

Mon pou ekout sa ki SENYER Bondye i annan pour li dir. I promet lape pour son pep, pour dimoun ki reste fidel anver li, me ki pa retonm dan menm betiz.

Eklezyas 3:4

I annan en letan pour plere e en letan pour riye; en letan pour plennyen e en letan pour danse.

Ezai 12:1

Sa zour, ou pou dir: Mon loue ou, SENYER! Menm si ou ti ankoler avek mwan. Ou ti ankoler avek mwan, me aprezan, ou lakoler in tonbe e ou konsol mwan.

Ezai 3:10

Dir sa ki inosan koman i ere, akoz i pou rekolte fri son travay.

Ezai 41:27

Mwan ki ti premye pour anons sa bon nouvel Zerizalenm: Gete! Ou pep pe retournen!

Ezai 50:10

Lekel parmi zot ki annan respe pour SENYER e ekout lavwa son serviter? Lekel ki mars dan fernwanr san okenn lalimyer, me ki kanmenm fer konfyans dan non SENYER e apiy lo son Bondye?

Ezai 51:12

La sa ki SENYER i deklare: Mwan menm ou konsolater. Alor, akoz ou per zonm ki parey ou en et imen ki mor parey zerb?

Ezai 51:3

SENYER pou konsol Siyon. I pou pran pitye pour bann landrwa devaste. I pou fer bann dezer vin parey zarden Edenn, parey zarden SENYER. I pou reganny lazwa ek kontantman; avek bann kantik louanz ek psonm.

Ezai 52:9

Bann debri Zerizalenm! Ansanm, sant avek lazwa, akoz SENYER in konsol son pep, in sov Zerizalenm!

Ezai 60:1

Zerizalenm! Leve! Briye! Akoz ou lalimyer in arive e laglwar prezans SENYER in leve lo ou.

Ezai 61:2

pour proklanm lannen faver SENYER e zour vanzans pour nou Bondye, pour konsol tou sa bann ki dan sagren;

Ezekyel 16:42

Kan mon ava'n satisfer mon lakoler kont ou, mon zalouzi ava arete e mon ava repran mon kalm; mon lakoler ava tonbe.

Zakari 1:13

Apre, SENYER ti reponn lanz ki ti pe koz avek mwan, par bann parol konsolasyon ek bann parol lankourazman.

Zakari 1:17

Anons ankor sa mesaz: La sa ki SENYER liniver i deklare: Mon bann lavil pou ranpli ankor en fwa avek en kantite larises. Ankor en fwa, SENYER pou rekonfort Siyon e swazir Zerizalenm.

Zakari 9:9

Fiy Siyon! Danse avek lazwa. Fiy Zerizalenm! Kriy byen for! Ou lerwa pe vin kot ou! I pe vin an triyonf e viktorye; i pe vini koman en dimoun senp, lo en bourik, en pti bourik, piti en femel bourik.

2 Korentyen 1:4

Par sa konsolasyon ki nou menm nou gannyen avek li, nou ava kapab konsol tou bann ki pe soufer.

1 Tesalonisyen 4:18

Alor, konsol kanmarad avek sa bann parol.