Ezai 1:21 - Labib An Kreol Seselwa

²¹ Koman eski sa lavil ki ti fidel in vin en prostitye? La kot ti annan respe pour lazistis ek ladrwatir, aprezan sa lavil i ranpli avek kriminel.

Ezai 1:21 ပူးပေါင်းရင်းမြစ်များ

2 Samyel 8:15

Alor David ti etabli son renny lo pep Izrael antye; e i ti rann lazistis son preferans lo son pep antye.

2 Kronik 19:9

I ti ordonn zot, “Dan tou, azir avek respe pour SENYER, avek fidelite e avek tou ou leker.

Nehemi 11:1

Bann sef lepep ti etabli zot dan Zerizalenm. Leres lepep ti tir osor pour swazir en dimoun lo dis pour reste Zerizalenm, lavil sakre, tandis ki nef restan, zot ava al dan lezot lavil.

Psonm 46:4

I annan en larivyer ki anmenn lazwa dan lavil Bondye, kot son sanktyer Treo i ete.

Psonm 48:1

SENYER i gran. Dan lavil nou Bondye, son montanny sakre, i merit tou louanz.

Psonm 48:8

Sa ki nou ti'n antann dir, nou'n osi war dan lavil SENYER liniver, dan lavil nou Bondye ki i'n etabli solid pour touzour.

Ezai 1:22

Ou larzan in perdi tou son valer; ou diven in ganny koupe avek delo.

Ezai 26:10

Menm si ou annan pitye pour bann malfeter, zot pa aprann pratik lazistis. Dan pei kot lazistis i ganny pratike, zot azir an malonnet e zot pa war ou grander, SENYER.

Ezai 48:2

Zot tir zot lafyerte dan lavil sen e zot depann lo Bondye Izrael ki apel SENYER liniver.

Ezai 5:7

Plantasyon rezen SENYER liniver se pep Izrael; Sa plan rezen ki i ti telman kontan, se pep Zida. SENYER ti pe esper ladrwatir sorti ladan, me ti annan zis versman disan. I ti pe esper lazistis, me i ti antann zis bann malere kriye.

Ezai 59:14

Pour sa rezon, lazistis pa'n progrese e ladrwatir in rekile; laverite i ganny dezonore dan plas piblik e napa plas pour lonnekte.

Ezai 59:15

Laverite in disparet; sa enn ki oule reste onnet i ganny depouye. SENYER in war li e in mekontan ki ti napa lazistis.

Ezai 59:3

Annefe, zot annan disan lo zot lanmen; zot ledwa i sal avek pese. Zot labous i koz lalang; zot lalang i mirmir lenzistis.

Zeremi 3:1

La sa ki SENYER i deklare: Kan en zonm i divorse avek son fanm, e sa fanm i kit li pour en lot zonm, son mari pou kapab repran li ankor? Si i fer sa, pa i pe rann pei enpir? Sa ki Izrael in fer: In prostitye li avek en kantite lanmoure. Aprezan i oule retourn kot mwan!

Oze 11:12

Efraim in antour mwan avek mansonz. Izrael in anvlop mwan dan son bann tronpri; me Zida i reste fidel e i mars avek Bondye sen.

Oze 2:5

Annefe, zot manman i en prostitye. Sa enn ki'n met zot omonn, i kouver avek laont. I ti dir: Mon pou swiv mon bann galan ki donn mwan mon manze ek mon delo, mon lalenn ek mon latwal linenn, mon delwil ek mon diven.

Habakouk 1:4

Alor, lalwa nepli ganny pratike. Personn pa rann lazistis koman fodre. Malfeter i atak sa enn ki bon. Alor, lazistis i ganny bafwe bann ziz i rann bann zizman enzis.

Zakari 8:3

La sa ki SENYER i deklare: Mon pou retourn Siyon. Mon pou reste ankor dan milye Zerizalenm. Zerizalenm pou ganny apele Lavil Fidelite. Montanny SENYER liniver pou ganny apele Montanny Sakre.

Levanzil dapre Lik 13:34

Zerizalenm, Zerizalenm! Ou ki touy bann profet e donn koudros bann ki Bondye in anvoy kot ou! Konbyen fwa mon ti oule rasanble ou bann zanfan, parey en mer poul i rasanble son bann piti anba son lezel, me ou pa'n oule!

Akt de Zapot 7:52

Lekel profet ki zot bann zanset pa'n persekite? Zot in touy tou bann ki'n anons larive sa enn ki Zis. Aprezan, li menm ki zot in trai e ki zot in touye.

Ebre 12:22

Me zot, o kontrer, zot in apros montanny Siyon, lavil Bondye ki vivan, Zerizalenm ki dan lesyel, avek son bann mil milyon lanz dan rasanbleman lafet.

Revelasyon 11:2

Me pa mezir lakour eksteryer Tanp, akoz i'n ganny abandonnen avek bann nasyon ki pou kraz lavil sen pandan 42 mwan.

Revelasyon 11:8

Zot kadav pou reste dan lari sa gran lavil, ki apel senbolikman, Sodonm ek Lezip, lanmenm kot zot Senyer ti ganny krisifye.

Revelasyon 17:1

Apre sa, enn parmi bann lanz ki ti pe tenir sa set lakoup ti vin koz avek mwan: Vini! Mon ava montre ou kondannasyon ki pe esper sa gran prostitye ki pe asize lo losean.