Eklezyas 2:3 - Labib An Kreol Seselwa

³ Mon ti deside rod plezir dan labwason; mon ti touzour kontrol mwan par lasazes. Mon ti oule war pli bon fason pour dimoun pas son lavi lo later.

Eklezyas 2:3 ပူးပေါင်းရင်းမြစ်များ

Zenez 47:9

Zakob ti reponn, “I annan 130 an depi ki mon lo later. Mon bann lannen in kourt e difisil; pa otan ki pour mon bann zanset pandan zot bann long lavi nomad.”

Liv Zob 14:14

Eski en dimoun mor, i kapab reviv? Mwan mon pou espere tou letan ki fodre, ziska ki mon ganny ranplase.

Psonm 104:15

Diven pour fer leker zwaye, delwil pour fer klate figir e dipen pour redonn lafors.

Proverb 20:1

Diven i rann ensolan e labwason for i rann azite; sa enn ki les lalkol soul li, pa kapab vin saz.

Eklezyas 1:17

Mon ti deside etidye seryezman pour konpran sa ki saz e konn sa ki fou e bet. Mon'n dekouver ki sa osi, i zis konmsi ou pe tay deryer divan.

Eklezyas 10:19

Bann ris i donn festen pour diverti; diven i rann lavi gou; larzan i permet fer tou.

Eklezyas 12:13

Ekout konklizyon tousala: Annan respe pour Bondye e obei son komannman. La sa ki tou et imen i devre fer.

Eklezyas 2:24

Sel bon keksoz pour en et imen fer, se manze, bwar e war rezilta son travay; mwan mon krwar, sa i sorti kot Bondye.

Eklezyas 5:18

La sa ki mon'n war: I meyer pour en dimoun manze, bwar, profit plezir dan tou sa ki i fer anba soley, pandan tou son lavi ki Bondye in donn li; sa i son sor.

Eklezyas 6:12

Zonm i travers lavi lo later, parey en lonbraz. Lekel ki konnen kwa ki bon pour li dan son lavi kourt? Lekel ki pou rakont sa ki arive apre li lo later?

Eklezyas 7:18

I bon ki ou gard sa premye konsey san oubliy lot; sa enn ki annan respe pour Bondye i trouv en semen sorti dan tou sityasyon.

Eklezyas 7:25

Alor, mon ti etidye avek bokou atansyon pour rode kisisa lasazes e konpran pour ki rezon ki keksoz i arive. Mon'n aprann osi ki fer mesanste i en keksoz fou e bet.

Eklezyas 8:15

Alor, mon ti dir: Anmize, akoz napa nanryen ki bon pour zonm anba soley; zis manze, bwar ek diverti; se sa ki pou avek li toultan dan son travay, tou le zour son lavi ki Bondye in donn li anba soley

Matye 6:24

Personn pa kapab servi de met. Annefe, swa i pou ay enn e kontan lot; swa i pou devoue anver enn e mepriz lot. Ou pa kapab servi Bondye ek larzan anmenmtan.

Efezyen 5:18

Pa bezwen soul zot avek diven, akoz sa pou zis antrenn zot dan en lavi dezordonnen. O kontrer, zot devre ranpli avek Lespri Sen.

Ziz 9:13

Me pye rezen ti reponn zot: Eski mon pou abandonn mon diven ki donn lazwa bann bondye ek bann imen, pour mwan al balanse par lao lezot pye dibwa?

1 Samyel 25:36

Ler Abigail ti ariv kot Nabal, ti annan en festen rwayal kot li. I ti dan lazwa e konpletman sou. Alor, i pa ti dir li nanryen ziska bomaten.