Ebre 12:27 - Labib An Kreol Seselwa

²⁷ Sa parol: Ankor en fwa, i montre klerman ki bann keksoz ki'n ganny kree, pou ganny sekwe e disparet pour ki zis sa ki solid ki reste.

Ebre 12:27 ပူးပေါင်းရင်းမြစ်များ

Ezai 34:4

Tou bann larme lesyel pe pouri. Lesyel in roul roule parey en liv. Tou son larme pou grennen parey fey rezen ki'n fletri, oubyen parey fey fig ki'n fletri.

Ezai 54:10

SENYER ki annan konpasyon pour ou, i deklare: Menm si bann montanny i kapab tonbe; bann kolin i kapab sanz plas, mon lanmour anver ou pa pou zanmen bouze, e lalyans lape ki mon'n fer avek ou pou reste ferm.

Ezai 65:17

Mon pou kree en nouvo lesyel ek en nouvo later. Dimoun pou oubliy letan pase. Zot souvenir pa pou zanmen retourn dan lespri.

Ezai 66:22

Annefe, parey bann nouvo lesyel e nouvo later ki mon pou kree pou dire devan mwan, demenm, ou bann desandan e ou non pou reste devan mwan. SENYER i deklare:

Ezekyel 21:27

Larin! Larin! Larin! Mon pou fer sa lavil tonm anrin! Tou in deza sanze: Me pa avan ki sa enn ki posed zizman i arive, avek ki mon pou remet li sa pouvwar.

Agze 2:21

Koz avek Zorobabel, gouverner provens Zida, garson Sealtiel. Dir li: Mwan SENYER liniver, mon pou fer tranble lesyel ek later.

Matye 24:35

Lesyel ek later pou disparet, me mon parol pa pou disparet.

Romen 8:19

Lakreasyon antye ki Bondye in kree pe esper avek enpasyans sa moman kan Bondye pou revele lekel son bann zanfan.

Romen 8:21

Sa kreasyon pou ganny libere en zour kont pouvwar destrikter ki pe gard li dan lesklavaz, pour li partisip dan laliberte ek laglwar bann zanfan Bondye.

1 Korentyen 7:31

e bann ki pe profite dan lemonn, fer konmsi zot pa ganny okenn profi, akoz lemonn tel ki i ete, pa pou dir lontan.

Ebre 1:10

I'n osi deklare: Ou menm, Senyer, ki'n kree later o konmansman; lesyel i travay ou lanmen.

Ebre 13:14

Annefe, nou demer lo sa later pa pou dire pour touzour; nou pe rod sa lavil ki dan lavenir.

Ebre 9:11

Me Kris in vini koman Gran-Pret bann bon keksoz ki'n arive. I'n penetre dan en latant ki meyer e pli parfe, ki pa'n fer par zonm e ki pa form parti sa kreasyon.

Revelasyon 11:15

Setyenm lanz ti soufle dan son tronpet. Dan lesyel, bann lavwa tre for ti rezonnen. Zot ti pe dir: Aprezan, rwayonm lemonn in vin pour nou Senyer, e pour son Kris. I pou rennyen pour touzour.

Revelasyon 21:1

Alor, mon ti war en nouvo lesyel ek en nouvo later akoz sa premye lesyel ek sa premye later ti'n disparet. Lanmer osi ti nepli egziste.

Revelasyon 21:4

I pou eswiy tou larm dan zot lizye. Lanmor pou nepli egziste. Pou nepli annan ni dey, ni larm, ni soufrans, akoz lemonn ansyen in disparet.

Revelasyon 21:5

Sa enn ki ti pe asiz lo tronn ti dir: La mon refer tou keksoz nouvo. Apre i ti dir mwan: Ekri! Sa bann parol i serten e vre.