1 Pyer 4:13 - Labib An Kreol Seselwa

¹³ Okontrer, zot devre kontan ki zot pe partisip dan soufrans Kris. Konmsa, zot osi, zot ava ranpli avek lazwa, kan son laglwar ava ganny revele.

1 Pyer 4:13 ပူးပေါင်းရင်းမြစ်များ

Ezai 25:9

Sa zour, dimoun pou dir: Li menm li nou Bondye; nou'n esper li. In vin sov nou. Li menm SENYER ki nou ti pe espere. Annou selebre! Annou rezouir! I'n sov nou.

Ezai 35:10

Tou bann ki SENYER in libere pou retournen. Zot pou ariv Siyon dan lazwa. Zot figir pou reyonnen avek en boner san limit. Zot pou ranpli avek en gran lazwa. Soufrans ek latristes pou'n disparet.

Ezai 51:11

Konmsa, bann ki SENYER in sove ava retournen e sant bann kantik letan zot mont Siyon; pou touzour annan lazwa lo zot figir; zot ava touzour dan lakontantman ek lazwa; zot pou nepli ni sagren ni plere.

Matye 16:27

Annefe, Fis-de-Lonm pou vini dan mazeste son Papa avek son bann lanz. I pou rekonpans sakenn dapre son bann aksyon.

Matye 25:21

Son met ti dir li: Ou'n byen fer. Ou en bon e fidel serviter! Ou'n fer byen dan en pti zafer; alor, mon pou donn ou en pli gran responsabilite. Vin partaz mon lazwa.

Matye 25:23

Son met ti dir li: Ou'n byen fer. Ou en bon e fidel serviter. Ou'n fer byen dan en pti zafer; alor, mon pou donn ou en pli gran responsabilite. Vin partaz mon lazwa.

Matye 25:31

“Kan Fis-de-Lonm pou vini dan son mazeste avek tou son bann lanz, i pou asiz lo son tronn rwayal.

Matye 25:34

Alor, lerwa pou dir avek sa bann lo son kote drwat: Vini, zot ki mon Papa in beni! Vin erit Rwayonm ki'n ganny prepare pour zot depi kreasyon lemonn.

Matye 5:12

Rezoui e santi zot ere, akoz annan en gran rekonpans pe esper zot dan lesyel! Konmsa menm ki zot bann zanset ti persekit bann profet avan zot.

Mark 8:38

Annefe, sa enn ki onte akoz mwan ek mon bann parol parmi sa zenerasyon adilter, ranpli avek pese, Fis-de-Lonm osi pou onte pour li, kan i pou vini dan mazeste son Papa avek bann lanz sen.”

Levanzil dapre Lik 17:30

I pou parey, zour ki Fis-de-Lonm pou aparet.

Akt de Zapot 16:25

Ver minwi, Pol ek Silas ti pe priye e sant kantik pour rann glwar Bondye. Lezot prizonnyen ti pe ekout zot.

Akt de Zapot 5:41

Bann zapot ti kit lasal Konsey, byen kontan, ki zot ti'n ganny konsidere diny pour ganny maltrete pour sa non Zezi.

Romen 5:3

Anplis ki sa, nou rezoui osi menm dan nou bann soufrans, akoz nou konnen ki lasoufrans i prodwi lapasyans;

Romen 8:17

E si nou son bann zanfan, alor, nou osi son bann zeritye: Zeritye Bondye, e zeritye ansanm avek Kris, akoz si nou soufer avek li, nou pou osi ganny glorifye avek li.

Romen 8:18

Mon annan sa lasirans ki sa ki nou pe soufer konmela, pa kapab ganny konpare avek laglwar ki Bondye pou revel nou dan lavenir.

2 Korentyen 1:5

Annefe, parey nou pe partaz bokou soufrans Kris, par Kris nou ava resevwar en gran konsolasyon.

2 Korentyen 1:7

Nou lespwar dan zot i solid. Annefe, nou konnen ki koman zot annan par dan nou soufrans, zot osi annan par dan konsolasyon ki nou gannyen.

2 Korentyen 4:10

Nou pe touzour anmenn dan nou lekor, soufrans Zezi, pour ki son lavi i ganny osi manifeste dan nou lekor.

2 Korentyen 4:17

Nou bann pti soufrans aktyel pe prepar pour nou en gran laglwar eternel ki napa okenn konparezon.

Filipyen 3:10

Annefe, tou sa ki mon dezire, se konn Kris ek pwisans son rezireksyon; partisip dan son bann soufrans, pour vin parey li dan son lanmor,

Kolosyen 1:24

Aprezan, mon trouv mon lazwa dan bann soufrans ki mon pe pas atraver pour zot. Par mon bann soufrans fizik, mon pe kontinyen konplet soufrans lekor Kris, setadir, Legliz.

2 Timote 2:12

Si nou persevere, avek li nou pou rennyen. Si nou rezet li, li osi i pou rezet nou.

1 Pyer 1:13

Alor, gard zot lespri touzour alert, reste touzour vizilan. Met tou zot lesperans dan lagras ki zot pou resevwar kan Zezi-Kri pou ganny revele.

1 Pyer 2:21

Pour sa rezon ki Bondye in apel zot, akoz Kris li menm in soufer pour zot; i'n les zot en legzanp pour zot swiv.

1 Pyer 5:1

Aprezan mon adres mwan avek bann ansyen ki la parmi zot. Mwan osi, mon en ansyen parey zot. Mon temwen bann soufrans Kris, e mon pou partisip dan laglwar ki pou ganny revele.

1 Pyer 5:10

Zot pou bezwen soufer pour ankor en pti pe letan. Me Bondye ki sours tou lagras, ki'n apel zot pour partisip dan son laglwar eternel ini avek Kris, i ava li menm rann zot parfe. I ava rann zot ferm; i ava fortifye zot, e etabli zot lo bann fondasyon solid.

Let Zid 1:24

Pour sa enn ki anpes zot tonbe; ki kapab fer zot konparet san fot e dan lazwa devan son prezans glorye;

Revelasyon 1:7

La i pe vini parmi bann nyaz, e tou dimoun pou war li; menm sa bann ki ti transpers li. Tou bann nasyon lo later pou lamante lo son size. Wi! Amenn.

Revelasyon 1:9

Mwan menm Zan, zot frer, ki'n partisip dan soufrans, dan rwayote, e ki'n andire avek pasyans, ini avek Zezi. Mon ti annegzil lo zil Patmos, akoz Parol Bondye ek temwannyaz Zezi.