Yòwanìrzɛ̀ 20:17 - Mokpwe: Bakwery (New Testament)

¹⁷ Yerzù rzìi a mò òhweyà nanù ema, “O rzi nò hwàkɛ lìya la aŋgɔ̀ èhwanja na rzìi timbi òma Tatɛ̀. Ndi ɛ̀ndɛ òma hwà-òkòwèlì hwa ami, hwa wònyanyàŋgò wa ami, ò hwa òhweyà nanù ema, na timbeya Tatɛ̀ wa ami ema a hwèlì hvɛ ndi Tatɛ̀ hwa anyu. Mɔ̀ ndi à hwèlì Lohwà la ami na Lohwà la anyu.”

Yòwanìrzɛ̀ 20:17 ပူးပေါင်းရင်းမြစ်များ

Matiyò 12:50

Tɔ̀ ima mɔ̀ ema à gbèyi lì emeyà la ama Tatɛ̀ wa ami ema a hwèlì ò ŋmanyu yà lohwà, mɔ̀ ndi à hwèlì nyàŋgò wa ami, nà wònyanyàŋgò hwa amì.”

Matiyò 25:40

Ndi e Kiŋgɛ̀ e hwa alàhwɛ̀ nanù ema, ‘O tɛ̀ɛ̀tɛ̀ɛ na e òhweyà ema tɔ̀ mamɛ ema e ma gbèeyà mɔ̀kɔ wa hwanù wònyanyàŋgò wa ami ema hwa rza òhvɛ hwe tɛmelì, imba ndi ema gbèeyà.’

Matiyò 28:7

È ɛ̀ndɛ rzɔ karzi-karzi e òhweyà Hwà-òkòwèlì hwa eni nanù ema, ‘À mà Hvùmùwà ò kpelì. A ma màa lì ɛ̀ndɛ ò wòrzò wò anyu ò Galìlì, aŋga ndi e mò ɛnɛ.’ È ɔ̀ŋgɛ̀lɛ̀ mamɛ ema na e òhweyà.”

Makòrzì 12:26

Nàŋgɛ rzɔ lì hvòmɛ̀nɛ̀ Hwehvùmuwelì hwe kpelì. È rzi laŋgi ò kààtì yà ama Mòrzè ehvarzù ema è òhwa lì hvòmɛ̀nɛ̀ è ŋmanà gbèe ema è mà rzèeyà e? Àŋga è tìlàhwì nanù ema nà òmà Lohwɛ̀ à mà hwɛ lì òhwìrzɛ̀nɛ̀ Mòrzè lì hvòmɛ̀nɛ̀ Abràhamù, Irzàkì, nà Jèkɔ̀bu ema hwa mà ŋwɛ̀ɛ̀, Lohwɛ̀ à mà òhwa nanù ema, ‘Imba ndi nà hwèlì Lòohwà là ama Abràhamù, Irzàkì nà Jèkɔ̀bù.’

Makòrzì 16:19

Ò mburzà hvònda ema Rzàŋgò Yerzù à mà hwa òhweyà hwenè hweyà, rzìi Lohwɛ̀ à mò gbeyà à kòòhwà ò ŋmanyu yà Lohwà. À mà lìyà ò lìya là mòmɛ̀ là ama Lohwɛ̀.

Lukàrzɛ̀ 10:4

Nà òmà e ɛ̀ndɛ, è rzì ɛ̀ndɛnɛ tɔ̀ ekpa ya wòlì, tɔ̀ lì hvɛhvɛ lìkpà nà hwètàmbì. È rzì tɛ̀mɛ̀ ò njìya ò lì kɔ̀mɔ̀ mòtò.

Yòwanìrzɛ̀ 13:1

O ma kòmbɛ̀nɛ̀ ndi e hvònda ya è Ndèma yà lì Akà Ɔ̀nɛ̀yi. Yerzù à mà hwiya ema e hvònda ya eni e ma kòmbɛnɛ ò mɔ̀ lì hwɛmɛ ene rze, ò lì tìmba ò ma Tatɛ̀. À mà lìŋgàna hwatò hwa rze ema hwà mà mò lòkɛ̀yi. À mà hwa uŋmɛ̀lɛ̀ e ndìŋgɛ natɛ̀ɛ na ò lìrzùkù.

Yòwanìrzɛ̀ 13:3

Yerzù à mà hwiya nanù ema Tatɛ̀ wa eni à mà màa lì mò ika hweyà hwe arzɛ ò màa me eni. A ma hwiya ama à mà uwɛ̀lɛ̀lɛ̀yi ndi ò ma Lohwɛ̀ ndèŋgàna à mà hwɛnɛ ndi lì tìmba òma Lohwɛ̀.

Yòwanìrzɛ̀ 14:2

O ndawò ya ama Tatɛ̀ wa ami i tùu i kòki aŋga. Ndèŋgana na ɛ̀ndɛ aŋga ò lì e rzèkeya èki. È rzi hwɛ tɛ nanù, ò ma na rza e òhweyà nanù ema na ɛndɛ lì e rzèkeya èki.

Yòwanìrzɛ̀ 14:28

È ma hwèya na òma na òhwa nanù ema, ‘Nà e lìyà ndi na e timbeya hvɛ.’ È ma nò lìŋgana tɛ, òma e òki mɔ̀nyɛ̀ŋgì ema, imba na ɛ̀ndɛ ò ma Tatɛ̀, èhwanja Tatɛ̀ ndi à Olò lì nò aka.

Yòwanìrzɛ̀ 14:6

Yerzù rzìi a alàhwɛ̀ nanù ema, “Imba ndi na hwèlì e njiya ema e ɛndɛ òma Tatɛ̀ wa ami, e jɔ̀kɛ̀ e uwɛ̀lɛ̀lɛ̀yi ndi na imba, imba hvɛ ndi na ŋgbà lòŋgɛ. Tɔ̀ mòtò tɔ̀ mɔ̀kɔ a rza tànɛyi lì jà òma Tatɛ̀ wa ami ema a rza akelɛ na imba.”

Yòwanìrzɛ̀ 16:28

Nà mà uwɛ̀lɛ̀lɛ̀yi ndi òma Tatɛ̀, rzi nà jà ò rze. Nàŋgɛ nanù imba nà è lìya è rze ò lì ɛ̀ndɛ lì tìmba ò mà Tatɛ̀.”

Yòwanìrzɛ̀ 17:11

O naŋgɛ na jà lì ò ùŋmanɛlɛ, ò ŋmanà hvònda na rza ò hwɛ hvɛ ò rze ndi wɔ̀ hwa hwèlì nanù mɛnɛ anù rze. Ìi Tatà wa Wòtani! O wa ò hwa kòmbɛ ò e ŋginyà ya lìna la aŋgɔ, lìinà ema ò ma nò ŋgbe, aŋga nanù hwa hwɛ mòtò mɔ̀kɔ na òma irzɔ na òhwa i hwèlì mòtò mɔ̀kɔ.

Yòwanìrzɛ̀ 17:25

Ìi Tatà ò tɛmi ehve-ehve. È rze e rza ò hwi ndi imba na ò hwi, rzìi hwanù hwa hwi nanù ema ò wa ndi ò nò òmi.

Yòwanìrzɛ̀ 17:5

Ìi Tatà wuluhwa èluhwe ya ami ò èki ema ò wà witi ò hwèlì, mòlemilemi mò èluhwe ema nà mà hwɛnɛ na ò hwa ndèŋgàna hwewòtelì hwe ene rze.

Yòwanìrzɛ̀ 20:27

Rzìi à òhweyà Tɔ̀màrzì nanù ema, “Ika jɔ̀nɔ ja aŋgɔ ò hwene hwetɛndɛ anù. O ɔ̀ŋgɔ màà mà ami, rzìi wòwa màà mà aŋgɔ ò òkànèyà e tòŋgòŋgò ya lùuŋga la amì. O rzìi hwɛ òŋgò ema a rza lòkɛ̀yi, ò hwɛ ndi òŋgò ema a lòkɛ̀yi.”

Yòwanìrzɛ̀ 7:33

Ndi Yerzù à mà hwa òhweyà nanù ema, “Nà hwèlì nà inyɔ ndi ŋmanà mbɔ, na timba òma e mɔ̀ ema à nò òmi.

Ròmànì 8:29

Lohwɛ̀ mɔ̀ à màa lì tɛ̀yirzɛ nanù ema hwatò ema à mà lòme lì hvɔ̀rzɔ̀, ɛ̀ɛ̀mɛ̀ ya awu e ò hwɛ ndi nàa e ya ama è Ŋmanà wà eni aŋga nanù òŋgò Ŋmanà à ò hwɛ ndi è Ŋmanà wà wòrzò ò ìtììtènì ja ama wònyanyàŋgò wa eni.

2 Kɔ̀rintìyà 6:18

Imba na o ò hwɛ e Tatɛ̀ hwa anyu, inyɔ hvɛ e o hwɛ hwàànà hwa ami. Imba Lòohwà ema lì karzami, imba ndi na ohwa nanù.”

Gàletìyà 3:26

Inyɔ hwa arzɛ è hwèlì ndi hwàanà hwa ama Lohwɛ̀ èhwanja è lòkɛ̀yì Yerzù Krirztò.

Hibrù 11:16

Ndi tɔ̀ nanù hwà mà lìya o lì ambɛlɛlɛ èki ya gbamù, o èkomè ya ŋmanyu yà lohwà. O èŋgànɛ̀lɛ̀ rzɔ Lohwɛ̀ a rza ohvi ìrzɔnì nanù ema hwa mo hwɛlɛ Lòohwà la awu, èhwanja a hwa rzekelì mbowà ndɛnɛ.

Hibrù 8:10

Lohwɛ̀ à ohwa hvɛ nanù ema, Imba è Rzàŋgo ndi nà ohwa. Ò nàŋgɛ nanù yòòmbò ene ema nà hwɛni lì ààtɛ̀ɛ̀ nà wònyà Irzàyɛ̀lì, ò è hvonda ema è ò jɛ̀ɛ̀ è hwèlì ndi nanù ema: nà ò hwa gbeyà ò lì hwiya imbenda jà ami, ndèŋgànɛ̀lɛ̀ hwa ò ohva ŋmèma mò lì ika iŋgi mbenda. Imba nà ò hwɛ Lòohwà là awu, ndèŋgànɛ̀lɛ̀ wɔ̀ hvɛ hwa ò hwɛ hwatò hwa ami.

1 Pètrò 1:3

Jèka ì hwɛ nà Lohwɛ̀ è Tatɛ̀ yà ama è Rzàŋgo wà arzu Yerzù Krirztò. À mà hvùmùlɛ̀ Yerzù Krirztò ò kpelì. Ò eŋgànɛ̀lɛ̀ i mà luwa lòŋgɛ lì hvènya. Nà oma mɔ̀ à gbèyi nanù, à mà jò ŋgba lìhvìta là lòŋgɛ là gbìndèyà.

1 Yòwanìrzɛ̀ 3:2

Wònyàmòwe kòkò, o naŋgɛ nanù irzɔ i hwèlì ndi hwàanà hwa ama Lohwɛ̀, ndèŋgànɛlɛ hvɛ mamɛ ema irzɔ jo ò hwɛ o e ŋmɛlɛ irzɔ i rzi e hwi. Ndì i hwi hvɛ nanù ema Krirztò a jelì tɛ, irzɔ jo ò hwɛ ndi nàa mɔ̀, ehwànja i hwɛni lì mo ɛnɛ na oma mɔ̀ à hwèlì.

Hwèwulùwèlì 21:3

Nà ma hweyà lìlo lì ndɛnɛ ema lì uwɛlɛlɛyi o konda ya lìkànèyà lì ohwa nanù ema, “È ɔŋgɔ̀ tɛ, o naŋgɛ èki ya hwèlìyelì hwe ama Lohwɛ̀ e hwèlì ndi na hwatò hwa hwènàmà! Lohwɛ̀ a o lìiya na wɔ̀ èki yɔ̀kɔ ndèŋgànɛ̀lɛ̀ wɔ̀ hvɛ hwa o hwɛ ndi hwatò hwa eni. Lohwɛ̀ a o lìiya èki yɔ̀kɔ na wɔ̀.

Hwèwulùwèlì 21:7

È mòtò ema à ò rzùùwànɛ̀ mètàkà ehwànja à nò lòkɛ̀, imba nà ò mò ŋgba hwene hwèèmà hwe arzɛ. Nà ò hwɛ Lòohwà là eni ndèŋgànɛ̀lɛ̀ mɔ̀ hvɛ à ò hwɛ è ŋmanà wà ami.