Matiyò 24:24 - Mokpwe: Bakwery (New Testament)

²⁴ Èhwanja rzayi-rzayi ja hwatò hwa ò wurza lì kɔ̀ hweyà a lì òhwa ema wɔ̀ ndi hwa hwèlì hwaŋga ema hwa ɔ̀kirzɛ̀hwɛyi. Nà hwà-òhwèlì hwa hwèlìŋgɛ̀ hwa mòlaŋgà hwa ò wurza, hwa ò gbeyà hweyà hwe ndɛnɛ hwe mànyakà nà lì uŋmɛ̀lɛ̀ hwèembànèlì hwe ndɛnɛ hwe mànyakà. Hwa ò gbeyà ndi nanù ò lì lùkɛlɛ hwatò ema Lohwɛ̀ a hvɔ̀rzì, wɔ hwa lu tɛ njiya ya lì hwa lukɛlɛ.

Matiyò 24:24 ပူးပေါင်းရင်းမြစ်များ

Matiyò 22:14

Yerzù rzì a umbana mònò ŋmàna nanù ema, “Lohwɛ̀ a hwɛlɛyi rzayì-rzayì ja hwatò ò lì hwɛ ò rze ya lìkànèyà la eni ndi ŋgurzu ndi i hvɔ̀rzɔ̀hwì.”

Matiyò 24:11

Rzayì-rzayì ja hwà-òhwèlì hwa hwèlìŋgɛ̀ hwa mòlàŋgà hwa ò wurza na lì lukɛlɛ rzayì-rzayì ja hwatò ò lì hwa nɔ̀ŋgɔ̀.

Matiyò 24:22

Ndi Lohwɛ̀ à mà màa lì utulɛ merzɔ̀ŋgi me meŋge mèenyà me mòhvùŋgu. A rzi gbèèye tɛ nanù, ò ma tɔ̀ mòtò a rza ò kàrzòwà. Ndi Lohwɛ̀ a ò utulɛ meŋge menya ò nyòla hwatò hwa eni ema mò a hvɔ̀rzì.

Matiyò 24:25

È òkànèyà, nà mà e òhweyà ene eyà ndèŋgànà e ò gbèyɛ̀nɛ.

Matiyò 24:31

Lìyɔ̀mi lì ndɛnɛ lì ò tòŋga, ndèŋgànà mɔ̀ à ò òma i aŋgèlì ja eni ò marzuku ma aniyɛ ma ene rze ò lì rzàŋga hwatò hwa eni ema Lohwɛ̀ à mà hvɔ̀rzɛ̀ lì wòteyà njuka hvɔ̀kɔ na enɛyi ja ene rze ya arzɛ.”

Matiyò 24:5

Rzayì-rzayì ja hwatò hwa ò ja ema hwa ò òhwɛ nanù ema wɔ̀ ndi hwa hwèlì e mò ema a Ɔ̀kirzɛ̀hwɛ̀yi. Ndèŋgànà hwa ò lùkɛlɛ rzayi-rzayi ja hwatò.

Matiyò 7:15

“È aŋgòhweya hwà-òhwèlì hwa hwèlìŋgɛ̀ hwa mòlàŋgà. Wɔ̀ hwa ɛnɛ ndi ŋmɛɛ nàa mɛ̀lɛ̀ŋgù, ndi ò tenì yà mèèmà mè awu hwa hwèlì wòhwe nàa njuwɛ.

Makòrzì 13:22

Rzayì-rzayì ja hwatò hwa ò ja, tɔ̀ ima mɔ̀ à ò kɔ hweyà nanù ema mɔ̀ ndi à hwèlì è Mɔ̀ ema à Ɔ̀kirzɛ̀hwɛ̀yi. Rzìi hwà-òhwèlì hwa hwèlìŋgɛ̀ hwa mèlàŋgà wɔ̀ hvɛ hwa ò wurza. Hwa ò gbeyà hweyà hwe mànyaka na lì uŋmɛ̀lɛ̀ hwèèmbànèlì hwe nyàyì na nyàyì. Hwa ò gbeyà nanù ò lì arza nanù ema hwa lùkɛlɛ hwaŋga ema Lohwɛ̀ à mà lòme lì hvɔ̀rzɔ̀, hwa lù tɛ hvèyò yà lì hwa lùkɛ̀lɛ.

Lukàrzɛ̀ 18:7

Rzèke Lohwɛ̀ hvɛ à ò rzùulɛ̀ hwatò hwa eni ema a hvɔ̀rzì e? Hwàŋga hwatò ema hwa mò èyeyàa ŋmerze nà wuu, a ò lìya ema a rza hwa alàhwɛ̀ e?

Yòwanìrzɛ̀ 4:48

Yerzù rzìi à mò òhweyà nanù ema, “È rza lòkɛ̀! Nàtɛ̀ɛ inyɔ hwanù hwatò è ɛnɛ hwèèmbànèlì nà mànyàka.”

Yòwanìrzɛ̀ 6:37

Hwatò hwa arzɛ ema Tatɛ̀ wà ami à nò ŋgbelì hwa ò nò jèeyà. Tɔ̀ njɛnɛ ema à nò jɛ̀lɛ̀lɛ̀ nà rza mò rzɔ̀rzɔ̀.

Yòwanìrzɛ̀ 6:39

Ndèŋgànɛ̀lɛ̀ lì lùtèyà la ama e mɔ̀ ema a nò òmi lìini ema ò ìtììtènì ja hwatò hwa arzɛ ema a nò ŋgbelì, na rza wɔ̀lɛ̀nɛ̀ tɔ̀ mɔ̀kɔ, ndi ema na hwa hvùmùlɛ̀ hwa arzɛ ò wùnyà wò lìrzukù.

Hwègbèèlì 20:16

Pàwolò mɔ̀ à mà kulɛ ndi nanù ema, i hwɛni lì hvanja e mbòwa ndɛnɛ ya Ɛ̀hvɛ̀rzɔ̀rzì ò ŋmanyu aŋga nanù i rza hvaŋga hvònda ò lì uka ò erzòòkà ya Èrzìyà. A ma hwɛ lì ahwèŋgɛ̀ ò lì uka ò mbòwa ndɛɛndɛ ya Jèrurzalɛ̀mù, ò wùnyà wò Pɛ̀ntìkɔ̀rzì à mà atanɛ tɛ.

Ròmànì 12:18

È keke e gbèye nanù ema e hwɛ ò ɛ̀yɔ̀lɛ̀ na hwatò hwa arzɛ.

Gàletìyà 4:15

O eŋge hvonda e ma onda na mɔ̀nyɛ̀ŋgì. Mamɛ e gbèyɛ̀nɛ o moŋgo mɔ̀nyɛ̀ŋgì ema e ma hwɛnɛ e? Imba mbiti na hwèlì ndi e mboŋgi ya anyu nanù ema, o eŋge hvonda e ma no lìŋgàna màlìŋgo ema e ma hwɛ tɛ nanù ema mòtò a tuma lìirzɔ̀ la eni o lì li ŋgba mbunda eni nanù ema a lì gbeyàne oma e ma tuma mìirzɔ̀ ma anyu rzi e no ŋgba e mɔ̀.

2 Tìmotì 2:19

Ndi tɔ̀ nanù hweyà ema Lohwɛ̀ à mà rzeeya, hwe rza tikowahwa. Ndèŋgana e tìlahwì o ŋmanyu ya eni nanù ema, “È Rzàŋgo e hwi hwaŋga hwatò ema hwa hwèlì e hwe eni,” ndèŋgàna e tìlahwì nanù ema, “Hwaŋga hwatò hwa arzɛ ema hwa ohwa nanù ema wɔ̀ hwa hwèlì ndi na e Rzàŋgo, hwa hwɛni lì kumbɛ e mburza o hwègbèèlì hwe wòhwe.”

1 Pètrò 1:5

Lohwɛ̀ à gbeyàna è ŋginyà yà eni ò lì è kɔmɛ̀lɛ̀ lìlòkɛ̀ là anyu, natɛ̀ɛ è lùwa lì rzuŋgàhwa. Lìŋgi lì rzuŋgàhwa lì ò ɛnɛhwɛ o wùnyà wo lìrzukù.

2 Pètrò 3:17

Ndi inyɔ, imbùnda ja ami e ma màa lì hwiya hwene hweyà. O eŋgànɛ̀lɛ̀ rzɔ, e hwɛ ndi o lì ijàneyà kɔ̀yi-kɔ̀yi, aŋga nanù hwatò ema hwa rza ika imbenda ja ama Lohwɛ̀, hwa rzi e gbèeyà e kpa na hwèyòkòlèlì hwe awu hwe wòhwe ema wɔ̀ hwa e okolɛ. Inyɔ e oŋgami tɛ hwèyòkòlèlì hwe awu hwe wòhwe nanù oma lìlòkɛ̀ la anyu lì rza tɛ̀mɛ̀.

1 Yòwanìrzɛ̀ 2:18

Inyɔ ema è hwèlì nàa hwàànà hwa ami, è hvonda yà lìrzùkù è mà kombɛnɛ. Ndèŋgàna, nà oma inyɔ è mà hwèyɛ nanù ema è Mɔ̀kɔ̀yèlì wà ama Krirztò à ò jà, tɔ̀ ò naŋgɛ, rzayi-rzayi jà hwàkɔ̀ɔ̀yèlì hwa ama Krirztò hwa mà màà lì jà. Ò eŋgànɛ̀lɛ̀, è hwiyè nanù ema è hvonda lìrzùkù è mà kombɛ̀nɛ̀.

1 Yòwanìrzɛ̀ 2:22

Njɛnɛ mò à hwèlì è wà mòlàŋgà e? È mòtò wà mòlàŋgà à hwèlì ndi è mɔ̀ ema à ohwa nanù ema rzeketɛ Yerzù ndi à hwèlì è Mɔ̀ ema à Ɔ̀kirzɛ̀hwɛ̀yi. Èŋge nyayi yà mòtò ndi è hwèlì è Mɔ̀kɔ̀yèlì wà ama Krirztò. A rzɔ̀rzɔ̀ Tatɛ̀ nà è Ŋmanà wà eni wà Mùnyanà.

1 Yòwanìrzɛ̀ 5:18

Ì hwi nanù ema tɔ̀ ima mòtò ema à mà jɛ̀ɛ̀ è ŋmanà wà ama Lohwɛ̀ à rza tànɛ lì eleyà ò wòhwe. Oŋgo ema à mà jɛ̀ɛ̀ è ŋmanà wà ama Lohwɛ̀, Yerzù à mò kombɛ̀ komba-komba aŋga nanù è Mɔ̀ wà Wòhwe à rza mò gbeyà tɔ̀ eyà yà wòhwe.

Hwèwulùwèlì 19:20

Rzìi hwa lɛmbɛ eŋge nyàmà yà wòhwe nà hwà-òhwèlì hwa hwèlìŋgɛ̀ hwa mòlàŋgà. Oŋgo mòòhwèlì wà èlìŋgɛ̀ wà mòlàŋga à mà hwɛ ò worzo wò eni, à mà hwɛ lì uŋmɛ̀lɛ̀ embànelì ò lì lùkɛ̀lɛ̀lɛ̀ hwatò ema hwa mà luwɛ eembànelì yà eŋge nyàmà yà wòhwe ndèŋgànɛ̀lɛ̀ hwa mà hwɛ lì kanɛ̀ eŋge elìŋgɛ̀. È hvonda ema hwà mà hwɛ lòŋgɛ hwà mà hwa hvimba wɔ̀ hwahwàkɛ o tenì ya ehvɔ̀ndi ya mùnya, ndèŋgànɛ̀lɛ̀ hwà mà rzeeya na mùùnya ema mo ma hwɛ lì tumbana rzayi-rzayi.