Hwègbèèlì 15:32 - Mokpwe: Bakwery (New Testament)

³² Jùdàrzì na Rzàyìlàrzì, ema wɔ̀ hwiti hwà mà hwɛ ndi hwà-òhwèlì hwa hwèlìŋgɛ̀, hwà mà òhwa rzayi-rzayi ò lì kɔ̀mɛ̀lɛ̀ na lì embɛ hwàlòkèlì.

Hwègbèèlì 15:32 ပူးပေါင်းရင်းမြစ်များ

Matiyò 23:34

Ene ŋgàna e gbèyi na e òmeya hwà-òhwèlì hwa hwèlìŋgɛ̀, na hwatò hwa mahwiye, nà Hwà-òkòlèlì. Lòŋgò la hwanù hwatò, inyɔ e hwa òŋwa, hwanɛyi hvɛ e hwa wòmeya ò mbarza. Lòŋgò hvɛ e hwa gbiyɛ hvònji ò tenì ja mandawò ma anyu ma màkanɛ̀, na hwahvɛhvɛ, e hwa hvaya ò lì anjiya ò mambòwà na mambòwà.

Lukàrzɛ̀ 11:49

Nànù ndeŋgàtɛ Lohwɛ̀ ò lìhwiyè la eni à mà òhwa nanù ema, ‘Nà hwa òmeyà hwà-òhwèlì hwa ami hwa hwèlìŋgɛ̀, nà i àpɔ̀rzìtòlò. Hwa hwɛnì lì òŋwà lòŋgò la hwaŋga hwatò. Lòŋgò hvɛ hwa takìrzɛ̀hwɛ.’

Hwègbèèlì 11:23

Nà òma mɔ̀ à mà ùke àŋga rzi a ɛnɛ mamɛ e ndèli ya ama Lohwɛ̀ e ma gbeyɛ, à mà ònda na mɔ̀nyɛ̀ŋgì. Rzìi à kòkòwɛ̀lɛ̀ hwaŋga hwàlòkèlì nanù ema wɔ̀ hwa òŋgame Rzàŋgò na ŋmèma mɔ̀kɔ.

Hwègbèèlì 11:27

O ene hvònda ndi lòŋgò la hwà-òhwèlì hwa hwèlìŋgɛ̀ hwà mà anjiye ò mbòwa ya Jèrurzalɛ̀mù lì ɛ̀ndɛ ò mbòwà ya Antìyɔ̀kì.

Hwègbèèlì 13:1

O ŋmèmba ema mò hwèlì ò Antìyɔ̀kì lòŋgò la hwà-òhwèlì hwa hwèlìŋgɛ̀ na hwà-òkòlèlì hwà mà hwɛ aŋga. Hwàŋga hwatò hwà mà hwɛ ndi Bànàbàrzì, Rzimɔ̀nì (à mà hwɛ̀lɛ̀hwɛ̀ e Ŋmindò), Lùrzìyùrzì (ema à mà uwɛ̀lɛ̀lɛ̀yi ò Rzìlènè), Manayene (ema wɔ̀ na Hɛ̀rɔ̀dì e Gɔ̀winà hwà mà òŋgɛnɛ ekì yɔ̀kɔ), na Rzàwòlò.

Hwègbèèlì 14:22

Tɔ ima èki ema hwà mà uke, hwà mà hwɛ lì òkòlɛ hwatò ema hwà mà lòkɛ̀ Yerzù na lì etìrzɛ mèèmà me awu aŋga nanù hwa ò alɛ̀mbɛ̀nɛ lì lòkɛ̀ la awu. Hwà mà hwɛ lì hwa òkòlɛ nanù ema, “I hwɛni lì akeyà rzayi-rzayi ja mètàkà ndèŋgàna je e kpèeyà ò lìkànèyà la ama Lohwɛ̀.”

Hwègbèèlì 15:1

Lòŋgò la hwatò hwà mà uwɛ̀lɛ̀lɛ̀yi ò erzòòkà ya Jùdeyà rzìi hwa jà lì uka ò mbòwa ndɛnɛ ya Antìyɔ̀kì. Hwa wòteya lì òkòlɛ̀ hwàlòkèlì nanù ema, “Mòtò a rza endàhwi tɛ na òma e mbenda ya ama Mòrzè ya arza, a rza tanɛ a rzùŋgàhwà.”

Hwègbèèlì 15:22

O èŋgànɛ̀lɛ̀ I àpɔ̀rzìtòlò na hwàtimbèlì hwa ŋmèmba na ŋmèmba mò arzɛ hwà mà kulɛ nanù ema, hwa hvɔ̀rzɔ̀ e hwa awu hwatò rzìi hwà hwa òma ò Antìyɔ̀kì mòndèŋge na Pàwolò na Bànàbàrzì. Wɔ̀ hwà mà hvɔ̀rzɔ̀ Jùdàrzì ema à mà hwɛ̀lɛ̀hwɛ̀ Bàrzabàrzì na Rzàyilàrzì, wunyanà ema hwà mà hwɛ hwàtimbèlì ò tenì ya hwàlòkèlì.

Hwègbèèlì 15:27

O èŋgànɛ̀lɛ̀ irzɔ je e òmeya Jùdàrzì na Rzàyìlàrzì wɔ hwa e òhweyà eŋge eyà mɛnɛ ema irzɔ i ma e tìleya.

Hwègbèèlì 15:3

Hwàtò hwa ŋmèmba hwà mà ɛndɛ lì hwa lìyɛlɛ ò njiya. Nà òma wɔ̀ hwà mà akeyà ò hwèrzòòkà hwe Hvɔ̀nìrzìyà na Rzàmarìyà hwà mà nɔ̀ŋgeyà hwatò nɛ hwaŋga hwatò ema hwa rza enje wònyà Yudà hwà mà tikòwahwɛ ò lì timbeya Lohwɛ̀. Mònò ŋmɛ̀ndì mò ma lìŋgirzɛ hwàlòkèlì hwa arzɛ.

Hwègbèèlì 15:31

Nà òma hwaŋga hwatò hwà mà laŋge eŋge kààtì, wɔ hwà mà lìŋga ehwànja ò ma hwɛ ŋmɛ̀ndì ema mò ma lìŋgirzɛ mèèmà me awu.

Hwègbèèlì 15:41

Pàwolò à mà akànèyà Rzàyilarzì ò erzòòkà ya Rzìrìyà na Rzìlirzìyà, hwà mà hwɛ lì ɛndɛ na lì ètìrzɛ̀ ŋmèmba.

Hwègbèèlì 18:23

O mburzà ya hvònda ema à mà hvaŋge hvònda ò mbòwa ndɛnɛ ya Antìyɔ̀kì, Pàwolò rzìi a anjiya aŋga, rzìi a ɛ̀ndɛ ò hwèrzòòkà hwe Gàlèrzìyà na Hvrìgèyà ò lì kòkòwɛ̀lɛ̀ na lì ètìrzɛ̀ hwàlòkèlì hwa arzɛ.

Hwègbèèlì 2:40

Pètrò à mà hwa kòkòwɛ̀lɛ̀ na lì hwa òhweyà ihvɛhvɛ nyayi na nyayi ja hweyà. A ma hwa atɛkɛ nanù ema, “Tɔ̀ ima mòtò arzùŋgɛ̀ lòŋgɛ la eni. È rza enje tɛ nanù Lohwɛ̀ a e kɔ̀kìrzɛ̀ ŋgàna hvɔ̀kɔ na òma a ò kɔ̀kìrzɛ̀ ene nyɔ̀ŋgɔ̀nì ya wòhwe.”

Hwègbèèlì 20:2

Nà òma à mà akeyà hwèŋge hwèrzòòkà hwe arzɛ, à mà òhwa rzayi-rzayi ja hweyà ò lì ètìrzɛ̀ mèèmà me hwàlòkèlì hwa eŋge erzòòkà, rzìi a ɛ̀ndɛ ò èkòmè ya Àkayiyà.

Ròmànì 12:6

O èŋgànɛ̀lɛ̀ i hwɛni lì gbeyàna màhwèyà ma arzu ma nyayi na nyayi lì hvòmɛ̀nɛ̀ e ndèli ema Lohwɛ̀ a jò ŋgbelì. È hwèlì tɛ nanù ema Lohwɛ̀ à mà ŋgba mòtò jàhwèyà ja lì òhwa hweyà ò lìna la ama Lohwɛ̀, òŋgò mòtò a òhwa hweŋge hweyà lì hvòmɛ̀nɛ̀ lì lòkɛ̀ ema mɔ̀ à òhvi.

Ròmànì 12:8

Mòtò ema a hwɛni jàhwèyà ja lì kɔ̀mɛlɛ hwatò, inyɛ mɔ̀ à hwa kɔ̀mɛlɛ. Tɔ̀ njɛnɛ hvɛ ema a ŋgba hwatò hwema, a hwa ŋgbaane na eenji. È mɔ̀ hvɛ ema a hwɛni jàhwèyà ò lì timba hwatò, inyɛ a hwa timbe kɔ̀yi-kɔ̀yi. È mòtò hvɛ ema a òhvi jàhwèyà ja lì uŋmɛ̀lɛ̀ hwatò ììlì, inyɛ a uŋmɛ̀lɛ̀ hwatò ììlì na màlìŋgò.

1 Kɔ̀rintìyà 1:8

Rzàŋgo Yerzù mɔ̀hvɛ à hwɛnì lì è etìrzɛ̀ màlòkɛ̀ mà anyu, natɛ̀ɛ nà ò lìrzukù là ene rze. Ò lì arza nanù ema è rza hwɛnɛ lùùrzè ò wùnyà wà ama Rzàŋgo Yerzù Krirztò a o jà o lì kàyìrzɛ̀ hwatò hwa arzɛ.

1 Kɔ̀rintìyà 14:29

È hwèlì tɛ ema hwatò hwàhwàkɛ̀ tɔ̀ Hwàyàwò hwa ohwa tɛ ŋmɛ̀ndì mo ama Lohwɛ̀, inyɛ hwanɛ̀yi hwatò hwa arzɛ hwa okànèyà kɔ̀yi-kɔ̀yi, o lì hwiya ŋga mamɛ ema hwa ohwà e hvomɛ̀nɛ̀yi.

1 Kɔ̀rintìyà 14:3

Ndi è mòtò ema à ohwa ŋmɛ̀ndì mo ama Lohwɛ̀, mɔ̀ à gbeyà ndi nanù o lì ètìrzɛ̀ hwahvɛhvɛ hwatò, à hwa kɔmɛ̀lɛ̀ o lòŋgɛ, na lì hwa lɔ̀kɔ hvɛ meèmà.

1 Kɔ̀rintìyà 14:32

È hwiye nanù ema è wɔ̀ ema hwa ohwa ŋmɛ̀ndì mo ama Lohwɛ̀ hwa hwɛnì ndi lì kaneyà jàhwèyà ema Èlìŋgɛ̀ yà Lohwà e hwa ŋgbelì.

Ɛ̀hvìrzìyà 3:5

Ò mòlòmɛ̀ Lohwɛ̀ à rzi wùluhweyà hwatò hwa hwènàmà hwene hweyà ema tɔ̀ naŋgɛ tɔ̀ mòtò tɔ̀ mɔ̀kɔ à rza rzɔ̀ŋgìtɛ̀nɛ̀. Ndi ò naŋgɛ à mà gbeyàna è Èlìŋgɛ̀ yà eni ò lì uŋmɛ̀lɛ̀ hwà-òhwèlì hwa hwèlìŋgɛ̀ nà i àpɔ̀rzìtòlò ema hwa gbèeyà Lohwɛ̀ hwene hweyà.

1 Tɛ̀rzàlonìyà 2:11

Inyɔ e hwi nanù ema i ma e aŋgoweya gbamù na oma e rzàŋgo e aŋgoweya hwàanà hwa eni.

1 Tɛ̀rzàlonìyà 3:2

I ma e omeya ŋmanyàŋgò wa arzu Tìmòtì. Irzɔ na mɔ̀ i gbèeyà èwòlò ya ama Lohwɛ̀ ema e hwèlì o lì ohwa ŋmɛ̀ndì mò gbamù mo ama Krirztò. I ma e omeya e mɔ̀, aŋga nanù a e embɛ na lì e kɔ̀mɛlɛ o lìlòkɛ̀ la anyu.

1 Tɛ̀rzàlonìyà 4:1

Ìi wònyamòwè kòkò, jo òhwa hvɛ nanù ema, i ma e okolɛ nɛ e àŋgàmɛ̀nɛ̀yi lì lìya o lì òkìrzɛ̀ Lohwɛ̀ mɔ̀nyɛ̀ŋgi. Ndeŋgànɛ̀lɛ̀ o jɔ̀kɛ̀ nanù ndi hwèlìyelì hwe anyu hwe hwèlì o nàŋgɛ. O nàŋgɛ nanù, je e akowana, na lì e ohweyà o lìna la ama Rzàŋgo Yerzù nanù ema, e hwɛ ndi o lì lìyàna ene nyayi ya ɛ̀ɛ̀mɛ̀.

1 Tɛ̀rzàlonìyà 5:14

Ìi wònyàmòwe kòkò, nà je e ohweyà hvɛ nanù ema e kòkòwɛ̀lɛ̀ hwatò ema hwa hwèlì rzìŋgà nanù ema hwa àŋgàmɛ̀nɛ̀yi lì gbeyà èwòlò, e embɛ̀ hwaŋga ema hwa oka wɔ̀ŋgɔ̀, e oŋgowane hwaŋga ema hwa rza ohvɛɛ ŋginyà, e a àjùlɛ̀nɛ̀ mɔ̀kɔ na ɔ̀nɛyi.

1 Tɛ̀rzàlonìyà 5:20

È rzi rzɔ̀njɛlɛ o lì ohwa ŋmɛ̀ndì ema Lohwɛ̀ a ohwi nanù ema e ohwe.

2 Tɛ̀rzàlonìyà 3:12

O lìna la ama Rzàŋgo Yerzù Krirztò i kànèyà hwanu hwatò na lì hwa kòkòwɛ̀lɛ̀ nanù ema hwa lìya lòŋgɛ ema lì tɛnɛnɛ rzìi hwa gbeye èwòlò ya awu o lì luwa lì laa la wùnyà.

1 Tìmotì 2:1

Eyà ya worzo ema na e kòkòwɛ̀lɛ̀ e hwèlì ndi nanù ema e kànɛ̀lɛlɛ hwatò hwa arzɛ. È kànɛ̀lɛlɛ hwahvɛhvɛ hwatò. È kànɛ̀ nanù ema Lohwɛ̀ a e omeya mamɛ̀ ema e arza, ndèŋgana e a mo eka o gbaamù ema a e gbèeyà na hwahvɛhvɛ hwatò.

2 Tìmotì 4:2

O lì ohwa ŋmɛ̀ndì mò gbamù mò ama Lohwɛ̀, tɔ̀ hwatò hwa lìŋgàna o lì mo hweyà tɔ̀ hwa rzi lìŋgàne. O hwa gbeye o lì hwiya nanù ema tɔ̀ mamɛ ema o hwa òhwèyà e hwèlì ndi è jɔ̀kɛ̀, o hwa gbeye hwa hwɛmɛ lì gbeyà wòhwe o hwa kɔ̀mɛ̀lɛ̀, ndèŋgàna o òkolɛ hwatò hwene hweyà hwe arzɛ na lì àjùlɛ̀.

1 Pètrò 5:1

Imba nàa mòtìmbèlì mɔ̀kɔ wa anyu, na lìŋgàna lì ŋgba màyòwà o hwatò ema hwa e kànèyà. Nà hwèlì ndi mɔ̀kɔ ema nà mà ukeya o motàkà mo ama Krirztò. Èluhwe ema Lohwɛ̀ à mà uŋmɛ̀lɛ̀ Krirztò e no ukeya imba hvɛ. Nà e kòkòwɛ̀lɛ̀ nanù ema,

1 Pètrò 5:10

È takà ndi meŋge mètàkà me rza inda. O mburza nanù, Lohwɛ̀ ema a ŋgba e ndèli ya arzɛ, mɔ̀ ŋmìti a e ŋgba tɔ̀ mamɛ ema e wɔ̀lɛnɛ. A gbeye ema a e ètìrzɛ̀ na lì e tɛmirzɛ gbamù. A hwèlì ndi Lohwɛ̀ ema e ndèli ya eni e lòŋgamɛnɛ tɔ̀ ima mòtò ndèŋgànɛ̀lɛ̀ eŋge ndèli e hwèlì o ihvonda ja arzɛ. Mɔ̀ ndi à e hvɔ̀rzì o lì luwa èluhwe ya eni ema e rza kuwa. Ndeŋgànɛ̀lɛ̀ ye e luwa ehwànja e hwèlì na Krirztò.

1 Pètrò 5:12

Rzàyilarzi ndi à nò oŋgòhwàànì ò lì è tìleya òno ŋmanà kààtì. À hwèlì ndi nàa ŋmànyàŋgo wà ami ndèŋgànɛ̀lɛ̀ nà mò lòkɛ̀yi. Nà è tìlèlì ene kààti ò lì è embɛ, nà ò lì è òhweyà nanù ema hwene hweyà ema nà è tìlèlì hwe hwèlì ndi è ndèli yà jɔ̀kɛ̀ yà ama Lohwɛ̀. Yè è tɛ̀meyà gbamù.